ಶೀಘ್ರ ಬರಲಿದೆ ಹಸಿರು-ಹಳದಿಯುಕ್ತ 20 ರೂ ಹೊಸ ನೋಟು

ಹೊಸದಿಲ್ಲಿ: ಭಾರತೀಯ ರಿಸರ್ವ್‌ ಬ್ಯಾಂಕ್‌ ಶೀಘ್ರವೇ 20 ರೂ.ಗಳ ನೂತನ ಹಸಿರು ನೋಟುಗಳನ್ನು ಬಿಡುಗಡೆ ಮಾಡಲಿದೆ. ಹೊಸ 20 ರೂ ನೋಟುಗಳಲ್ಲಿ ಆರ್‌ಬಿಐ ಗವರ್ನರ್ ಶಕ್ತಿಕಾಂತ್ ದಾಸ್ ಅವರ ಸಹಿ ಇರಲಿದೆ.

'ಹೊಸ ನೋಟುಗಳು ಹಸಿರುಯುಕ್ತ ಹಳದಿ ಬಣ್ಣದ್ದಾಗಿರುತ್ತವೆ. ಒಟ್ಟಾರೆ ಹೊಸ ವಿನ್ಯಾಸ ಹೊಂದಿರಲಿದ್ದು, ಜಿಯೋಮೆಟ್ರಿಕ್ ವಿನ್ಯಾಸ ಹೊಂದಿರಲಿದೆ' ಎಂದು ಆರ್‌ಬಿಐ ಪ್ರಕಟಣೆ ಹೇಳಿದೆ.

ಹೊಸ 20 ರೂ ನೋಟುಗಳ ಹಿಂಭಾಗದಲ್ಲಿ ಎಲ್ಲೋರಾ ಗುಹೆಗಳ ಚಿತ್ರ ಇರಲಿದ್ದು, ದೇಶದ ಸಾಂಸ್ಕೃತಿಕ ಪರಂಪರೆಯನ್ನು ಬಿಂಬಿಸಲಿದೆ ಎಂದು ಆರ್‌ಬಿಐ ಹೇಳಿದೆ.

ಹೊಸ 20 ರೂ ನೋಟಿನ ಕೆಲವು ವೈಶಿಷ್ಟ್ಯಗಳು:


* ನೋಟಿನ ಮುಂಭಾಗದಲ್ಲಿ 20 ರೂ ಎಂದು ದೊಡ್ಡ ಅಂಕಿಯಲ್ಲಿ ಮುದ್ರಿಸಲಾಗಿದೆ. ಎರಡೂ ಬದಿಗಳಲ್ಲಿ ಸಣ್ಣ ಹೂವಿನ ಚಿತ್ರದ ವಿನ್ಯಾಸ ಇರುತ್ತದೆ. ವಾಟರ್‌ಮಾರ್ಕ್‌ ಪಕ್ಕದಲ್ಲಿ ಎರಡೂ ಬದಿಗಳಲ್ಲಿ ಹೂವಿನ ವಿನ್ಯಾಸ ಇರಲಿದೆ. ಬೆಳಕಿಗೆ ಹಿಡಿದು ನೋಡಿದರೆ ಈ ವಿನ್ಯಾಸ ಕಾಣಿಸುತ್ತದೆ.

* ಮುಖಬೆಲೆ ಸೂಚಕ 20 ಇಂಗ್ಲಿಷ್ ಅಂಕಿಯ ಜತೆಗೆ ನೋಟಿನ ಮೇಲೆ ದೇವನಾಗರಿ ಅಂಕಿಯಲ್ಲೂ 20 ರೂ ಎಂದು ಮುದ್ರಿತವಾಗಿದೆ. ಮಧ್ಯದಲ್ಲಿ ಮಹಾತ್ಮಾ ಗಾಂಧಿ ಚಿತ್ರವಿದೆ.

* ಆರ್‌ಬಿಐ, ಭಾರತ್‌ ಎಂಬ ಸೂಕ್ಷ್ಮ ಅಕ್ಷರಗಳು (ಹಿಂದಿಯಲ್ಲಿ) ಹಾಗೂ ಇಂಡಿಯಾ ಮತ್ತು 20 ಎಂಬ ಬರಹ ಸೆಕ್ಯುರಿಟಿ ಥ್ರೆಡ್ ಪಕ್ಕದಲ್ಲಿ ಇರಲಿದೆ.

* ಖಾತರಿ ನಿಯಮ, ಗವರ್ನರ್‌ ಸಹಿ, ಆರ್‌ಬಿಐ ಲಾಂಛನಗಳು ಮಹಾತ್ಮಾ ಗಾಂಧಿ ಚಿತ್ರ ಹಾಗೂ ಅಶೋಕಸ್ಥಂಭಕ್ಕೆ ಅಭಿಮುಖವಾಗಿ ಇರಲಿವೆ.


* ನೋಟಿನ ಹಿಂಭಾಗದಲ್ಲಿ ಎಡಕ್ಕೆ ಮುದ್ರಿತ ವರ್ಷ ಮತ್ತು ಸ್ವಚ್ಛ ಭಾರತ್ ಲಾಂಛನ ಹಾಗೂ ಘೋಷಣೆ ಇರಲಿದೆ.

* ಭಾಷಾ ಪಟ್ಟಿ ಮತ್ತು ಎಲ್ಲೋರಾ ಗುಹೆಗಳ ಚಿತ್ರ.

* ಮುಖಬೆಲೆ ಸೂಚಕ ಅಂಕಿ 20 ದೇವನಾಗರಿ ಭಾಷೆಯಲ್ಲಿ ಇರಲಿದೆ.

* ಹೊಸ 20 ರೂ ನೋಟಿನ ಗಾತ್ರ 63 x 129 ಎಂಎಂ ಇರಲಿದೆ.

* ಹಿಂದಿನ ಎಲ್ಲಾ ಸರಣಿಯ 20 ರೂ ನೋಟುಗಳು ಎಂದಿನಂತೆ ಚಲಾವಣೆಯಲ್ಲಿ ಇರುತ್ತವೆ ಎಂದು ಆರ್‌ಬಿಐ ಸ್ಪಷ್ಟಪಡಿಸಿದೆ.