ಕೊರೊನಾ ಮೆಟ್ಟಿ ನಿಂತ ನ್ಯೂಯಾರ್ಕ್ ಟೈಮ್ಸ್‌, 3 ತಿಂಗಳ ಅವಧಿಯಲ್ಲಿ ಷೇರು ಮೌಲ್ಯ ಶೇ. 45 ಹೆಚ್ಚಳ!

ಹೊಸದಿಲ್ಲಿ: ಕೊರೊನಾದಿಂದಾಗಿ ವಿಶ್ವಾದ್ಯಂತ ಎಲ್ಲಉದ್ಯಮ, ವ್ಯವಹಾರಗಳಿಗೂ ಹೊಡೆತ ಬಿದ್ದಿರುವಂತೆ ಪತ್ರಿಕೋದ್ಯಮವೂ ನಲುಗಿದೆ. ಆದರೆ, ಕೆಲವು ಪತ್ರಿಕೆಗಳು ವಿಭಿನ್ನ ಕಾರ್ಯತಂತ್ರಗಳ ಮೂಲಕ ಪರಿಸ್ಥಿತಿಯನ್ನು ದಿಟ್ಟವಾಗಿ ಎದುರಿಸಿವೆ. ಈ ನಡುವೆ, ಅಮೆರಿಕದ ಜನಪ್ರಿಯ ದಿನಪತ್ರಿಕೆ 'ನ್ಯೂಯಾರ್ಕ್ ಟೈಮ್ಸ್‌' ಕೊರೊನಾ ಕಾಲದಲ್ಲೇ ಅತಿ ಹೆಚ್ಚು ಲಾಭ ಪಡೆದು ಅಚ್ಚರಿ ಮೂಡಿಸಿದೆ. ಪತ್ರಿಕೆಯನ್ನು ನಡೆಸುತ್ತಿರುವ ನ್ಯೂಯಾರ್ಕ್ ಟೈಮ್ಸ್‌ ಪಬ್ಲಿಕೇಷನ್ಸ್‌ನ ಷೇರು ಮೌಲ್ಯ ಕಳೆದ ಮೂರು ತಿಂಗಳ ಅವಧಿಯಲ್ಲಿ ಶೇ. 45ರಷ್ಟು ಹೆಚ್ಚಿದೆ.

2020ರ ಏ.2ಕ್ಕೆ ನ್ಯೂಯಾರ್ಕ್ ಟೈಮ್ಸ್‌ ಷೇರು ಮೌಲ್ಯ 28.88 ಡಾಲರ್‌ ಇದ್ದರೆ, ಜುಲೈ 2ರ ವೇಳೆಗೆ ಅದು 41.81 ಡಾಲರ್‌ಗೆ ಏರಿದೆ. ಅಮೆರಿಕದ ದೈತ್ಯ ಕಂಪನಿಗಳಲ್ಲಿ ಒಂದಾದ ಗೂಗಲ್‌ ಕೂಡ ಈ ಮಟ್ಟದ ಏರಿಕೆಯನ್ನು ಕಂಡಿಲ್ಲ. ಅದರ ಷೇರು ಮೌಲ್ಯ ಏರಿಕೆ ದರ ಕೇವಲ ಶೇ. 30 ಮಾತ್ರ. ಜನ ಪತ್ರಿಕೆ ಬಿಟ್ಟು ಸಾಮಾಜಿಕ ಜಾಲತಾಣಗಳಿಗೆ ಒಗ್ಗಿಕೊಂಡಿದ್ದಾರೆ ಎಂಬ ಸುದ್ದಿಗಳ ನಡುವೆಯೂ ಜನಪ್ರಿಯ ಜಾಲತಾಣ ಫೇಸ್‌ಬುಕ್‌ನ ಷೇರು ಮೌಲ್ಯ ಏರಿಕೆಯಾಗಿದ್ದು 47% ಮಾತ್ರ.

ಯಶಸ್ವಿಯಾಗಿದ್ದು ಹೇಗೆ?

- ನ್ಯೂಯಾರ್ಕ್ ಟೈಮ್ಸ್‌ ವಿಶ್ವಾಸಾರ್ಹ ಪತ್ರಿಕೆಯಾಗಿದ್ದು ಚಂದಾದಾರರನ್ನೇ ಹೆಚ್ಚು ನೆಚ್ಚಿಕೊಂಡಿದೆ.

- 1990ರ ದಶಕದಲ್ಲೇ ಡಿಜಿಟಲ್‌ ಆವೃತ್ತಿ ಆರಂಭಿಸಿದ್ದ ಪತ್ರಿಕೆ, 2009ರಲ್ಲಿ ಜಾಹೀರಾತು ಪಡೆಯಲಾರಂಭಿಸಿತ್ತು.

- 2020ರ ಮೊದಲ ತ್ರೈಮಾಸಿಕದಲ್ಲಿ ಪತ್ರಿಕೆಯು 5,87,000 ಡಿಜಿಟಲ್‌ ಚಂದಾದಾರರನ್ನು ಹೊಂದಿತ್ತು.

- ಕಳೆದ ಒಂದು ವರ್ಷದ ಅವಧಿಯಲ್ಲಿ ಡಿಜಿಟಲ್‌ ಚಂದಾದಾರಿಕೆ ಆದಾಯ 5.4% ಹೆಚ್ಚಳವಾಗಿತ್ತು

- ಕೊರೊನಾ ಬಳಿಕ ಮುದ್ರಣ ಪ್ರತಿ ಕಡಿಮೆಯಾದರೂ ಡಿಜಿಟಲ್‌ ಚಂದಾದಾರರ ಸಂಖ್ಯೆ ವಿಪರೀತ ಏರಿತ್ತು.

- ಡಿಜಿಟಲ್‌ ಬೇಡಿಕೆ ಹೆಚ್ಚುತ್ತಿದ್ದಂತೆಯೇ ಜಾಹೀರಾತಿನ ಬೇಡಿಕೆಯೂ ಹೆಚ್ಚಾಗಿ ಪತ್ರಿಕೆಯ ಮೌಲ್ಯ ಹೆಚ್ಚಿತು.

- ಪತ್ರಿಕಾ ಜಾಹೀರಾತಿನ ಪ್ರಮಾಣ ಇಳಿಕೆಯಾದರೂ ಡಿಜಿಟಲ್‌ ಜಾಹೀರಾತಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ.