ಗೋಲ್ಡನ್‌ ವೀಸಾದಿಂದ ಬ್ರಿಟನ್‌ಗೆ ನೀರವ್‌ ಎಂಟ್ರಿ!

ಲಂಡನ್‌: ಬ್ರಿಟನ್‌ ಸರಕಾರವು ಬೃಹತ್‌ ಹೂಡಿಕೆದಾರರಿಗೆ ನೀಡುವ 'ಗೋಲ್ಡನ್‌ ವೀಸಾ' ಪಡೆದು ನೀರವ್‌ ಮೋದಿ ಅವರು ಬ್ರಿಟನ್‌ ಪ್ರವೇಶಿಸಿದ್ದಾರೆ. ಬ್ರಿಟನ್‌ ಸರಕಾರದ ಬಾಂಡ್‌ಗಳು ಮತ್ತು ಕಂಪನಿ ಷೇರುಗಳಲ್ಲಿ 20 ಲಕ್ಷ ಪೌಂಡ್‌(ಸುಮಾರು 1,832 ಕೋಟಿ ರೂ. ) ಹೂಡಿಕೆ ಮಾಡಲು ಬದ್ಧರಾದವರಿಗೆ ಈ ವೀಸಾ ನೀಡಲಾಗುತ್ತದೆ.

ಐರೋಪ್ಯ ಒಕ್ಕೂಟದ ಹೊರಗಿನ ಹೂಡಿಕೆದಾರರಿಗೆ ನೀಡುವಂಥ ಗೋಲ್ಡನ್‌ ವೀಸಾ ಮೂಲಕ ನೀರವ್‌ ಅವರು ಬ್ರಿಟನ್‌ ಪ್ರವೇಶಿಸಿರುವುದನ್ನು ಅಲ್ಲಿಯ ಸರಕಾರದ ಮೂಲಗಳು ಟೈಮ್ಸ್‌ ಆಫ್‌ ಇಂಡಿಯಾಗೆ ತಿಳಿಸಿವೆ. ಈ ವೀಸಾ ಬಳಸಿ ಬ್ರಿಟನ್‌ನಲ್ಲಿ ಬ್ಯುಸಿನೆಸ್‌ ಆರಂಭಿಸಲು, ಉದ್ಯೋಗ ಮಾಡಲು ಇಲ್ಲವೇ ವ್ಯಾಸಂಗ ಮಾಡಲು ವ್ಯಕ್ತಿಯೊಬ್ಬನಿಗೆ ಅವಕಾಶ ದೊರೆಯುತ್ತದೆ. ಅಲ್ಲದೇ, 20 ಲಕ್ಷ ಪೌಂಡ್‌ಗಳನ್ನು ಹೂಡಿಕೆ ಮಾಡಿದ 5 ವರ್ಷಗಳ ಬಳಿಕ, ಬ್ರಿಟನ್‌ನಲ್ಲಿ ಕಾಯಂ ಪೌರತ್ವವನ್ನೂ ಪಡೆಯಲು ಅರ್ಹತೆ ದೊರೆಯುತ್ತದೆ. ಆದರೆ, ವ್ಯಕ್ತಿಯು ಹೆಚ್ಚಿನ ಹೂಡಿಕೆಗೆ ಮುಂದಾದರೆ ಈ ಅವಕಾಶವು ಸಿಗುತ್ತದೆ.

ಬ್ರಿಟನ್‌ನಲ್ಲಿ ನೀರವ್‌ ಹೊಂದಿರುವ ಜ್ಯುವೆಲ್ಲರಿ ಬ್ಯುಸಿನೆಸ್‌ನ ಜಾಡುಗಳನ್ನು ಹುಡುಕುವ ಕೆಲಸವನ್ನು ಟೈಮ್ಸ್‌ ಆಫ್‌ ಇಂಡಿಯಾ ನಡೆಸಿದೆ. ಆದರೆ, ನೀರವ್‌ ಅವರು ಬ್ರಿಟನ್‌ ಪ್ರವೇಶಿಸಿದ ನಿರ್ದಿಷ್ಟ ದಿನಾಂಕವು ಸ್ಪಷ್ಟವಾಗಿಲ್ಲ. 13,000 ಕೋಟಿ ರೂ.ಗಳ ಪಿಎನ್‌ಬಿ ಹಗರಣದ ಬಳಿಕ ನೀರವ್‌ ಭಾರತ ತೊರೆದು ಬ್ರಿಟನ್‌ಗೆ ಪಲಾಯನ ಮಾಡಿದ್ದರು.

ನೀರವ್‌ರ ಪಾಸ್‌ಪೋರ್ಟ್‌ ಅನ್ನು ಈಗಾಗಲೇ ಭಾರತ ಅಮಾನತುಗೊಳಿಸಿದ್ದರೂ, ಕೆಲವು ವರ್ಷಗಳ ಹಿಂದೆಯೇ ಅವರು ಗೋಲ್ಡನ್‌ ವೀಸಾ ಪಡೆದಿರುವುದು ಸ್ಪಷ್ಟವಾಗಿದೆ. ಪಾಸ್‌ಪೋರ್ಟ್‌ ಅಮಾನ್ಯವಾದರೂ, ವೀಸಾಕ್ಕೆ ತೊಡಕಾಗುವುದಿಲ್ಲ ಎನ್ನಲಾಗಿದೆ.