ಜೈಲಿನ ಒಂದೇ ಸೆಲ್‌ನಲ್ಲಿ ನೀರವ್‌ ಮೋದಿ, ಮಲ್ಯಗೆ ವ್ಯವಸ್ಥೆ

ಮುಂಬಯಿ : ಮುಂಬಯಿನ ಅರ್ಥರ್‌ ರಸ್ತೆಯ ಕಾರಾಗೃಹದ ನಂ.12ರ ಕೊಠಡಿಯನ್ನು ವಿತ್ತಾಪರಾಧಿಗಳಾದ ನೀರವ್‌ ಮೋದಿ ಹಾಗೂ ವಿಜಯ್‌ ಮಲ್ಯ ಅವರಿಗೆ ಸಜ್ಜುಗೊಳಿಸಲಾಗಿದೆ. ಇಬ್ಬರೂ ಬ್ರಿಟನ್‌ನಿಂದ ಭಾರತಕ್ಕೆ ಗಡಿಪಾರಾದರೆ ಇದೇ ಜೈಲಿನ ಒಂದೇ ಸೆಲ್‌ನಲ್ಲಿ ಇರಲಿದ್ದಾರೆ. ಜೈಲಿನ ಕೊಠಡಿಯಲ್ಲಿನ ಸ್ಥಿತಿಗತಿ, ಅನುಕೂಲಗಳ ವಿವರಗಳನ್ನು ಬ್ರಿಟನ್‌ ಕೋರ್ಟ್‌ಗೆ ಈಗಾಗಲೇ ಸಲ್ಲಿಸಲಾಗಿದೆ. ಕಳೆದ ವಾರ ಬಂದಿಖಾನೆ ಇಲಾಖೆಯು ಗೃಹ ಇಲಾಖೆಗೆ ಕೈಲಿನ ಸ್ಥಿತಿಗತಿಗಳ ಬಗ್ಗೆ ಮಾಹಿತಿ ಸಲ್ಲಿಸಿತ್ತು. ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ನಲ್ಲಿ ನಡೆದ ಹಗರಣಕ್ಕೆ ಸಂಬಂಧಿಸಿ ನೀರವ್‌ ಮೋದಿಯನ್ನು ಲಂಡನ್‌ನಲ್ಲಿ ಕಳೆದ ಮಾರ್ಚ್‌ 19ರಂದು ಬಂಧಿಸಲಾಗಿತ್ತು.

ಜೈಲಿನ ಬ್ಯಾರಾಕ್‌ ನಂ.12ರಲ್ಲಿ ಎರಡು ಕೊಠಡಿಗಳಿದ್ದು, ಒಂದರಲ್ಲಿ ಮೂವರು ಕೈದಿಗಳು ಇದ್ದಾರೆ. ಖಾಲಿ ಇರುವ ಮತ್ತೊಂದರಲ್ಲಿ ನೀರವ್‌ ಮೋದಿ, ವಿಜಯ್‌ ಮಲ್ಯರಿಗೆ ಇರಲು ವ್ಯವಸ್ಥೆಯಾಗಲಿದೆ. 20-15 ಅಡಿಯ ಜಾಗದ ಕೊಠಡಿಯಲ್ಲಿ ಮೂರು ಫ್ಯಾನ್‌, 6 ಟ್ಯೂಬ್‌ಲೈಟ್‌, 2 ಕಿಟಿಕಿ ಇದೆ.