ವೋಕ್ಸ್‌ವ್ಯಾಗನ್‌ ವಿರುದ್ಧ ದಬ್ಬಾಳಿಕೆಯ ಕ್ರಮ ಇಲ್ಲ: ಸುಪ್ರೀಂ

ಹೊಸದಿಲ್ಲಿ : ಪರಿಸರ ನಿಯಮಗಳನ್ನು ಪಾಲಿಸಲು ವಿಫಲವಾಗಿ, 500 ಕೋಟಿ ರೂ. ದಂಡ ತೆರಬೇಕಾಗಿದ್ದ ಜರ್ಮನಿಯ ಪ್ರಮುಖ ವಾಹನ ಕಂಪನಿ ವೋಕ್ಸ್‌ವ್ಯಾಗನ್‌ಗೆ ಸುಪ್ರೀಂ ಕೋರ್ಟ್‌ ತೀರ್ಪಿನಿಂದ ತುಸು ನಿರಾಳವಾಗಿದೆ. ದಂಡ ಪಾವತಿಗೆ ಹೆಚ್ಚಿನ ಸಮಯವೂ ಸಿಕ್ಕಿದೆ.

ವೋಕ್ಸ್‌ವ್ಯಾಗನ್‌ ವಿರುದ್ಧ ದಬ್ಬಾಳಿಕೆಯ ಕ್ರಮ ಬೇಡ ಎಂದು ಕೋರ್ಟ್‌ ಸೋಮವಾರ ಹೇಳಿದೆ. ವೋಕ್ಸ್‌ವ್ಯಾಗನ್‌ ಇಂಡಿಯಾ ಕಂಪನಿಗೆ ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿ 500 ಕೋಟಿ ರೂಪಾಯಿ ದಂಡ ವಿಧಿಸಿತ್ತು. 2 ತಿಂಗಳೊಳಗೆ ದಂಡ ಪಾವತಿಸುವಂತೆ ಸೂಚಿಸಿತ್ತು. ಇದನ್ನು ಪ್ರಶ್ನಿಸಿ, ಸುಪ್ರೀಂ ಕೋರ್ಟ್‌ಗೆ ವೋಕ್ಸ್‌ವ್ಯಾಗನ್‌ ಅರ್ಜಿ ಸಲ್ಲಿಸಿತ್ತು. ಈ ಬಗ್ಗೆ ವಿಚಾರಣೆ ನಡೆಸಿದ ಕೋರ್ಟ್‌, ದಂಡ ಪಾವತಿಸ ಕಂಪನಿ ವಿರುದ್ಧ ದಬ್ಬಾಳಿಕೆಯ ಕ್ರಮ ಜರುಗಿಸದಂತೆ ಹೇಳಿದೆ.

ಡೀಸೆಲ್‌ ಕಾರುಗಳಲ್ಲಿ ಸಾಧನವೊಂದನ್ನು ಅಳವಡಿಸಿ ಪರಿಸರ ನಿಯಮಗಳಿಂದ ವೋಕ್ಸ್‌ವ್ಯಾಗನ್‌ ನುಣುಚಿಕೊಂಡಿತ್ತು. ವಂಚನೆ ಹಿನ್ನೆಲೆಯಲ್ಲಿ ಈ ಹಿಂದೆ 171 ಕೋಟಿ ರೂಪಾಯಿ ದಂಡ ವಿಧಿಸಲಾಗಿತ್ತು. ದಂಡ ಪಾವತಿಸದ ವೋಕ್ಸ್‌ವ್ಯಾಗನ್‌ ವಿರುದ್ಧ ಕಿಡಿ ಕಾರಿದ್ದ ಹಸಿರು ಮಂಡಳಿ ದಂಡದ ಮೊತ್ತವನನ್ನು 500 ಕೋಟಿ ರೂ.ಗೆ ಏರಿಸಿತ್ತು.

ಆರೋಪಗಳ ಹಿನ್ನೆಲೆಯಲ್ಲಿ ವೋಕ್ಸ್‌ವ್ಯಾಗನ್‌ ಇಂಡಿಯಾ 2015ರ ಡಿಸೆಂಬರ್‌ನಲ್ಲಿ ಭಾರತದಲ್ಲಿ 3,23,700 ಲಕ್ಷ ವಾಹನಗಳನ್ನು ವಾಪಸ್‌ ಪಡೆದಿತ್ತು.