₹2,000 ನೋಟು ಮುದ್ರಣ ಸ್ಥಗಿತವಾಗಲಿದೆಯೇ? ವಿತ್ತ ಇಲಾಖೆ ಸ್ಪಷ್ಟನೆ ಇದು!

ಹೊಸದಿಲ್ಲಿ: ಸರಕಾರ 2,000 ರೂ. ಮುಖಬೆಲೆಯ ನೋಟಿನ ಮುದ್ರಣವನ್ನು ಸ್ಥಗಿತಗೊಳಿಸಲು ನಿರ್ಧರಿಸಿಲ್ಲ ಎಂದು ಹಣಕಾಸು ಖಾತೆ ಸಹಾಯಕ ಸಚಿವ ಅನುರಾಗ್‌ ಠಾಕೂರ್‌ ತಿಳಿಸಿದ್ದಾರೆ.

2019-20 ಮತ್ತು 2020-21ರಲ್ಲಿ2,000 ರೂ. ನೋಟಿನ ಮುದ್ರಣಕ್ಕೆ ಪ್ರಸ್ತಾಪ ಇರಲಿಲ್ಲ. ಹೀಗಿದ್ದರೂ, ಇದರ ಮುದ್ರಣವನ್ನೇ ಸ್ಥಗಿತಗೊಳಿಸಲು ಸರಕಾರ ನಿರ್ಧರಿಸಿಲ್ಲ ಎಂದು ಲೋಕಸಭೆಗೆ ಲಿಖಿತ ಉತ್ತರದಲ್ಲಿ ತಿಳಿಸಿದ್ದಾರೆ.

2020ರ ಮಾರ್ಚ್ 31ರ ವೇಳೆಗೆ 2 ಸಾವಿರ ರೂ.ಗಳ 27,398 ಲಕ್ಷ ನೋಟುಗಳು ಚಲಾವಣೆಯಲ್ಲಿದ್ದವು. ಲಾಕ್‌ ಡೌನ್‌ ವೇಳೆ ತಾತ್ಕಾಲಿಕವಾಗಿ ನೋಟುಗಳ ಮುದ್ರಣವನ್ನು ಆರ್‌ ಬಿಐ ಸ್ಥಗಿತಗೊಳಿಸಿತ್ತು ಎಂದು ಠಾಕೂರ್‌ ಹೇಳಿದರು.

ಈ ಮೂಲಕ ದೇಶಾದ್ಯಂತ 2000 ರೂಪಾಯಿ ನೋಟು ಸ್ಥಗಿತಗೊಳ್ಳುತ್ತಿದೆ ಎಂಬ ವದಂತಿಗಳಿಗೆ ಸರ್ಕಾರ ತೆರೆ ಎಳೆದಿದೆ. ಈ ನಿಟ್ಟಿನಲ್ಲಿ ಹಣಕಾಸು ಸಚಿವಾಲಯದಿಂದ ಯಾವುದೇ ಸೂಚನೆ ಇಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ನವೆಂಬರ್ 8, 2016 ರಂದು ಸರ್ಕಾರ 500 ಮತ್ತು 1000 ರೂಪಾಯಿ ನೋಟುಗಳನ್ನು ಚಲಾವಣೆಯಿಂದ ತೆಗೆದುಹಾಕಿತು. ಅದರ ನಂತರ ರಿಸರ್ವ್ ಬ್ಯಾಂಕ್ ಹೊಸ 500ರೂ. ನೋಟಿನೊಂದಿಗೆ 2,000 ರೂ. ಮುಖಬೆಲೆಯ ಹೊಸ ನೋಟನ್ನು ಪರಿಚಯಿಸಿತು.