ಹೊಸದಿಲ್ಲಿ: ನೋಟು ಅಮಾನ್ಯೀಕರಣ ಕುರಿತು ಮುಂದಿನ ಮುಂಗಾರು ಅಧಿವೇಶನದಲ್ಲಿ ವರದಿ ಮಂಡಿಸಲಿರುವ ಸಂಸತ್ತಿನ ಹಣಕಾಸು ಸಮಿತಿ, ನೋಟ್‌ ರದ್ಧತಿ ವಿಷಯಕ್ಕೆ ಸಂಬಂಧಿಸಿದಂತೆ ಬುಧವಾರ ಆರ್‌ಬಿಐ ಗವರ್ನರ್‌ ಊರ್ಜಿತ್‌ ಪಟೇಲ್‌ರಿಂದ ಎರಡನೇ ಬಾರಿ ವಿವರ ಪಡೆಯಿತು.
ಸುಮಾರು 3 ಗಂಟೆಗಳ ಕಾಲ ಊರ್ಜಿತ್‌ ಪಟೇಲ್‌ ವಿವರ ನೀಡಿದರು. ಇಷ್ಟೆಲ್ಲ ವಿವರದ ಹೊರತಾಗಿಯೂ ಅವರು ಅಮಾನ್ಯೀಕರಣದ ಬಳಿಕ ಸಂಗ್ರಹವಾದ ಹಳೆಯ ನೋಟುಗಳ ಮೊತ್ತದ ನಿಖರ ಮಾಹಿತಿ ನೀಡಲು ವಿಫಲರಾದರು ಎಂದು ಸಮಿತಿಯ ಕೆಲವು ಸದಸ್ಯರು ತಿಳಿಸಿದ್ದಾರೆ.
ರದ್ದಾದ 500 ಮತ್ತು 1000 ಮುಖಬೆಲೆಯ ನೋಟುಗಳ ಎಣಿಕೆ ಇನ್ನೂ ಮುಗಿದಿಲ್ಲ. ಆರ್‌ಬಿಐನ 15 ಸಾವಿರ ಸಿಬ್ಬಂದಿ ಹಗಲಿರುಳು ಈ ಕಾರ್ಯದಲ್ಲಿ ನಿರತರಾಗಿದ್ದಾರೆ. ಭಾನುವಾರ ಹೊರತುಪಡಿಸಿ ಎಲ್ಲಾ ಸರಕಾರಿ ರಜಾದಿನಗಳಲ್ಲೂ ತಮ್ಮ ಸಿಬ್ಬಂದಿ ಕಾರ್ಯನಿರತರಾಗಿದ್ದಾರೆ ಎಂದು ಪಟೇಲ್‌ ಹೇಳಿದ್ದಾರೆ.