ದಿಲ್ಲಿ ಟೋಲ್‌ಗಳಲ್ಲಿ ಸೆ.13ರಿಂದ ನಗದುರಹಿತ ವ್ಯವಹಾರ

ಹೊಸದಿಲ್ಲಿ: ರಾಜಧಾನಿ ನಗರವನ್ನು ಪ್ರವೇಶಿಸುವ ಮತ್ತು ನಿರ್ಗಮಿಸುವ ಮಾರ್ಗಗಳಲ್ಲಿನ 13 ಟೋಲ್‌ ಪ್ಲಾಜಾಗಳಲ್ಲಿ ಸೆ.13ರಿಂದ ನಗದುರಹಿತ ಸುಂಕ ಪಾವತಿ ವ್ಯವಸ್ಥೆ ಜಾರಿಗೆ ಬರಲಿದೆ.

ನಗದುರಹಿತ ವ್ಯವಸ್ಥೆಯನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಪರಿಸರ ಮಾಲಿನ್ಯ ನಿಯಂತ್ರಣ ಪ್ರಾಧಿಕಾರ(ಇಪಿಸಿಎ) ಮತ್ತು ದಕ್ಷಿಣ ದಿಲ್ಲಿ ಮುನಿಸಿಪಲ್‌ ಕಾರ್ಪೊರೇಷನ್‌ ಈ ವ್ಯವಸ್ಥೆಯನ್ನು ಜಾರಿಗೆ ತರುತ್ತಿದೆ. ಸೆ.13ರಿಂದ ನಗದು ಪಾವತಿಸಿ ಯಾವುದೇ ವಾಹನವು ಟೋಲ್‌ ಗೇಟ್‌ಗಳನ್ನು ದಾಟಲು ದಿಲ್ಲಿ ವ್ಯಾಪ್ತಿಯಲ್ಲಿ ಸಾಧ್ಯವಿಲ್ಲ ಎಂದು ಹೇಳಲಾಗಿದೆ.

ಟೋಲ್‌ಗೇಟ್‌ಗಳಲ್ಲಿ ಡಿಜಿಟಲ್‌ ಪೇಮೆಂಟ್‌ಗೆ ಪೂರಕವಾಗಿ ಸುಮಾರು 3 ಲಕ್ಷ ವಾಣಿಜ್ಯ ವಾಹನಗಳಿಗೆ ಆರ್‌ಎಫ್‌ಐಡಿ ಟ್ಯಾಗ್‌ಗಳನ್ನು ಮಾರಾಟ ಮಾಡಲಾಗಿದೆ. ಆದರೆ, ಕೇವಲ 547 ಮಂದಿಯಷ್ಟೇ ರೀಚಾರ್ಜ್‌ ಮಾಡಿಸಿದ್ದಾರೆ. ಉಳಿದ ಎಲ್ಲ ವಾಹನಗಳೂ ನಗದು ಪಾವತಿಸಿ ಟೋಲ್‌ ದಾಟುತ್ತಿವೆ. ಇದನ್ನು ತಡೆಯುವ ನಿಟ್ಟಿನಲ್ಲಿ ಕ್ಯಾಶ್‌ರಹಿತ ವ್ಯವಸ್ಥೆಯನ್ನು ಜಾರಿಗೊಳಿಸಲಾಗುತ್ತಿದೆ.

ಕರ್ನಾಟಕದಲ್ಲಿ ಏನು ಕತೆ?
ದಿಲ್ಲಿಯಲ್ಲಿ ಹೆಚ್ಚಿನ ಜನರು ಟೋಲ್‌ ಶುಲ್ಕ ಪಾವತಿಗೆ ನಗದು ಬಳಸಲು ಏನು ಕಾರಣ? ಟೋಲ್‌ಗಳಲ್ಲಿನ ಪಿಒಎಸ್‌ಗಳ ಮುಂದೆ ದೊಡ್ಡ ಸಾಲುಗಳು ಇರುತ್ತವೆ. ದಾಖಲೆಗಳ ಫಿಸಿಕಲ್‌ ವೆರಿಫಿಕೇಷನ್‌ ಮತ್ತು ಅವುಗಳ ಅಪ್‌ಲೋಡ್‌ ಮಾಡುವುದೂ ಸೇರಿದಂತೆ ಡಿಜಿಟಲ್‌ ಪಾವತಿಗೆ 10-15 ನಿಮಿಷ ಬೇಕಾಗುತ್ತಿದೆ. ಹೀಗಾಗಿ ಚಾಲಕರು ನಗದು ಪಾವತಿಗೆ ಒಗ್ಗಿ ಹೋಗಿದ್ದಾರೆ. ಆರ್‌ಎಫ್‌ಐಡಿ ಟ್ಯಾಗ್‌ ರೀಚಾರ್ಜ್‌ಗೆ ಮನಸ್ಸು ಮಾಡುತ್ತಿಲ್ಲ. ದಿಲ್ಲಿಯಲ್ಲಿ ಮಾತ್ರವಲ್ಲ ಕರ್ನಾಟಕ ಸೇರಿದಂತೆ ಬಹುತೇಕ ರಾಜ್ಯಗಳಲ್ಲೂ ಇಂಥದ್ದೇ ಪರಿಸ್ಥಿತಿ ಇದೆ.