ಹೊಸದಿಲ್ಲಿ: ಅಂಚೆ ಇಲಾಖೆಯು ನಾನಾ ಸಣ್ಣ ಉಳಿತಾಯ ಯೋಜನೆಗಳಿಗೆ 2019-20ರಲ್ಲಿ ಕನಿಷ್ಠ ಹೂಡಿಕೆಯನ್ನು ಮಾಡದವರಿಗೆ ವಿಧಿಸುವ ದಂಡವನ್ನು ರದ್ದುಪಡಿಸಿದೆ. 2020ರ ಜೂನ್‌ 30ರ ತನಕ ಈ ದಂಡ ರದ್ದತಿ ಅನ್ವಯವಾಗಲಿದೆ.

ಸಾರ್ವಜನಿಕ ಭವಿಷ್ಯನಿಧಿ (ಪಿಪಿಎಫ್‌), ರಿಕರಿಂಗ್‌ ಡೆಪಾಸಿಟ್‌ (ಆರ್‌.ಡಿ) ಇತ್ಯಾದಿ ಸಣ್ಣ ಉಳಿತಾಯ ಯೋಜನೆಗಳಲ್ಲಿ 2019-20ರ ಸಾಲಿನ ಬಾಬ್ತು ಏಪ್ರಿಲ್‌ ಒಳಗೆ ಕನಿಷ್ಠ ಹೂಡಿಕೆಯನ್ನು ಮಾಡಬೇಕು ಎಂಬ ನಿಯಮಗಳಿದ್ದರೂ, 2020ರ ಜೂನ್‌ 30ರ ತನಕ ಯಾವುದೇ ನವೀಕರಣ ಶುಲ್ಕ ಅಥವಾ ದಂಡ ಪಾವತಿಸದೆ ಹೂಡಿಕೆ ಮಾಡಬಹುದು ಎಂದು ಇಲಾಖೆ ತಿಳಿಸಿದೆ.

ಎಸ್‌ಬಿಐ ಸಾಲ, ಠೇವಣಿಯ ಬಡ್ಡಿದರ ಕಟ್‌: ಉಳಿತಾಯ ಖಾತೆ ಬಡ್ಡಿ ಶೇ.2.75ಕ್ಕೆ ಇಳಿಕೆ!

ಕೊರೊನಾ ವೈರಸ್‌ ದಾಳಿಯ ಪರಿಣಾಮ ದೇಶಾದ್ಯಂತ ಲಾಕ್‌ಡೌನ್‌ ಇರುವುದರಿಂದ ಸಣ್ಣ ಉಳಿತಾಯಗಾರರಿಗೆ ಖಾತೆಗಳಲ್ಲಿ ಸಕಾಲಕ್ಕೆ ಅಗತ್ಯ ಠೇವಣಿ ಇಡಲು ಸಾಧ್ಯವಾಗುತ್ತಿಲ್ಲ. ಹೀಗಾಗಿ ಹೂಡಿಕೆಗೆ ಹೆಚ್ಚುವರಿ ಕಾಲಾವಧಿಯನ್ನು ನೀಡಲಾಗಿದೆ. ಪಿಪಿಎಫ್‌ನಲ್ಲಿ ವರ್ಷಕ್ಕೆ ಕನಿಷ್ಠ 500 ರೂ. ಹೂಡಿಕೆ ಅಗತ್ಯ. ಒಂದು ವೇಳೆ ಅಷ್ಟು ಮೊತ್ತ ಪಾವತಿಸದಿದ್ದರೆ ಖಾತೆ ನಿಷ್ಕ್ರಿಯ ಎಂದು ಪರಿಗಣನೆಯಾಗುತ್ತದೆ. ನಂತರ ವರ್ಷಕ್ಕೆ 50 ರೂ. ಗಳಂತೆ ದಂಡ ಕಟ್ಟಿ ಸಕ್ರಿಯಗೊಳಿಸಬಹುದು. ಇದೇ ರೀತಿ ಆರ್‌.ಡಿಗೂ ವಿಳಂಬ ಪಾವತಿಗೆ ದಂಡ ಇದೆ.