ಕ್ರೆಡಿಟ್‌ ಕಾರ್ಡ್‌ಗಳ ಸಂಖ್ಯೆ 50 ಲಕ್ಷ ಏರಿಕೆ, ದೂರುಗಳ ಸಂಖ್ಯೆ ಶೇ 5 ಇಳಿಕೆ

ಮುಂಬಯಿ: ಬಳಕೆಯಲ್ಲಿರುವ ಕ್ರೆಡಿಟ್‌ ಕಾರ್ಡ್‌ಗಳ ಸಂಖ್ಯೆ ತೀವ್ರವಾಗಿ ಏರಿಕೆಯಾಗಿದೆ; ಆದರೆ ಅವುಗಳ ಕುರಿತ ದೂರುಗಳು ಗಣನೀಯವಾಗಿ ಕಡಿಮೆಯಾಗಿವೆ. ಭಾಋತೀಯ ರಿಸರ್ವ್‌ ಬ್ಯಾಂಕ್‌ ಬಿಡುಗಡೆ ಮಾಡಿರುವ ತಾಜಾ ವರದಿಯಲ್ಲಿ ಈ ಅಂಶ ಬಯಲಾಗಿದೆ.

ಒಟ್ಟಾರೆ ಬ್ಯಾಂಕಿಂಗ್‌ ವಲಯದಲ್ಲಿ ಕ್ರೆಡಿಟ್‌ ಕಾರ್ಡ್‌ಗಳ ಸಂಖ್ಯೆ ಶೇ 27ರಷ್ಟು ಏರಿಕೆಯಾಗಿದ್ದು, ಅವುಗಳ ಕುರಿತ ದೂರುಗಳು ಶೇ 5ಕ್ಕೆ ಇಳಿಕೆಯಾಗಿವೆ.

ಗ್ರಾಹಕರ ದೂರುಗಳನ್ನು ಬಗೆಹರಿಸುವ ಬ್ಯಾಂಕಿಂಗ್‌ ಒಂಬುಡ್ಸ್‌ಮನ್‌ ವಾರ್ಷಿಕ ವರದಿ ಪ್ರಕಾರ, ಕ್ರೆಡಿಟ್‌ ಕಾರ್ಡ್‌ ಕುರಿತ ದೂರುಗಳು ಗಣನೀಯವಾಗಿ ಕಡಿಮೆಯಾಗಿವೆ. ವಿತ್ತವರ್ಷ 2016ರಲ್ಲಿ ಒಟ್ಟು 8,740 ಕ್ರೆಡಿಟ್‌ ಕಾರ್ಡ್‌ ದೂರುಗಳನ್ನು ಓಂಬುಡ್ಸ್‌ಮನ್‌ ಸ್ವೀಕರಿಸಿತ್ತು. ಬ್ಯಾಂಕಿಂಗ್‌ ಕುರಿತ ಒಟ್ಟಾರೆ ದೂರುಗಳ ಪೈಕಿ ಶೇ 8.5 ಪಾಲು ಕ್ರೆಡಿಟ್‌ ಕಾರ್ಡ್‌ ದೂರುಗಳೇ ಆಗಿದ್ದವು. ವಿತ್ತವರ್ಷ 2017ರಲ್ಲಿ ಒಟ್ಟು ದೂರುಗಳ ಸಂಖ್ಯೆ 8,297ಕ್ಕೆ ಕುಸಿದಿದೆ. (ಶೇ 6.5) ಇದೇ ಅವಧಿಯಲ್ಲಿ ಕ್ರೆಡಿಟ್‌ ಕಾರ್ಡ್‌ಗಳ ಸಂಖ್ಯೆ 2.4 ಕೋಟಿಯಿಂದ 2.9 ಕೋಟಿಗೆ ಏರಿದೆ.

ವಿದ್ಯುನ್ಮಾನ ಬಿಲ್‌ ಪಾವತಿ ಹಾಗೂ ಡಿಜಿಟಲ್‌ ವಹಿವಾಟಿಗೆ ನೀಡಿದ ಉತ್ತೇಜನಗಳಿಂದಾಗಿ ದೂರುಗಳ ಸಂಖ್ಯೆ ಕಡಿಮೆಯಾಗಿದೆ ಎಂದು ಬ್ಯಾಂಕರುಗಳು ಹೇಳುತ್ತಾರೆ. ಅಲ್ಲದೆ ಭದ್ರತಾ ಕ್ರಮಗಳನ್ನೂ ಬಲಪಡಿಸಲಾಗಿದೆ.

ಹಾಗಿದ್ದರೂ ಎಟಿಎಂ/ಡೆಬಿಟ್‌ ಕಾರ್ಡ್‌ ಕುರಿತ ದೂರುಗಳು 12.5 ಶೇ ಹೆಚ್ಚಾಗಿದೆ. ಒಟ್ಟಾರೆ 24,731 ಕಾರ್ಡ್‌ ಸಂಬಂಧಿತ ದೂರುಗಳಲ್ಲಿ 16,434 ದೂರುಗಳು ಎಟಿಎಂ/ಡೆಬಿಟ್‌ ಕಾರ್ಡ್‌ ಕುರಿತದ್ದಾಗಿವೆ. ಕ್ರೆಡಿಟ್‌ ಮತ್ತು ಡೆಬಿಟ್‌ ಕಾರ್ಡ್‌ ಕುರಿತ ಒಟ್ಟು ದೂರುಗಳ ಪ್ರಮಾಣ ಶೇ 18.9ರಷ್ಟಿದೆ.

ಒಟ್ಟು 1.30 ಲಕ್ಷ ದೂರುಗಳು ದಾಖಲಾಗಿವೆ. ಎಟಿಎಂಗಳಲ್ಲಿ ಹಣ ಬಾರದಿರುವುದು/ ಕಡಿಮೆ ಹಣ ಬಂದಿರುವುದು ಈ ವಿಭಾಗದಲ್ಲಿ ದಾಖಲಾದ ಅತಿ ಹೆಚ್ಚು ದೂರುಗಳಾಗಿವೆ. 2016-17ರಲ್ಲಿ ಕ್ರೆಡಿಟ್‌ ಕಾರ್ಡ್‌ ಕುರಿತ ದೂರುಗಳು ಶೇ 6.4ರಷ್ಟಿವೆ.

ಪಿಂಚಣಿ ಸಂಬಂಧಿತ ದೂರುಗಳು ಶೇ 6.5ರಷ್ಟಿವೆ. ವಿಂಬ ಪಾವತಿ, ಲೆಕ್ಕಾಚಾರದಲ್ಲಿ ತಪ್ಪುಗಳು, ಪಿಂಚಣಿದಾರ ಮೃತಪಟ್ಟ ಸಂದರ್ಭದಲ್ಲಿ ಅದನ್ನು ಕುಟುಂಬ ಪಿಂಚಣಿಯಾಗಿ ಪರಿವರ್ತಿಸುವಲ್ಲಿನ ತೊಂದರೆಗಳು, ಸಿಬ್ಬಂದಿಗಳ ಅಸಹಕಾರ ಇತ್ಯಾದಿ- ಈ ವಿಭಾಗದಲ್ಲಿ ದಾಖಲಾದ ದೂರುಗಳಾಗಿವೆ.