ಆರ್‌ಟಿಜಿಎಸ್‌, ಎನ್‌ಇಎಫ್‌ಟಿ ಶುಲ್ಕ ರದ್ದು

ಹೊಸದಿಲ್ಲಿ: ಆನ್‌ಲೈನ್‌ ಮತ್ತು ಮೊಬೈಲ್‌ ಬ್ಯಾಂಕಿಂಗ್‌ನಲ್ಲಿ ಎನ್‌ಇಎಫ್‌ಟಿ ಮತ್ತು ಆರ್‌ಟಿಜಿಎಸ್‌ ವರ್ಗಾವಣೆಗಳ ಮೇಲಿನ ಶುಲ್ಕಗಳನ್ನು ಜುಲೈ 1ರಿಂದ ಅನ್ವಯವಾಗುವಂತೆ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ (ಎಸ್‌ಬಿಐ) ರದ್ದುಪಡಿಸಿದೆ.

ಮೊಬೈಲ್‌ ಫೋನ್‌ ಮೂಲಕ ಐಎಂಪಿಎಸ್‌ (ಇಮಿಡಿಯೇಟ್‌ ಪೇಮೆಂಟ್‌ ಸವೀರ್‍ಸ್‌) ವಿಧಾನದಲ್ಲಿ ಮಾಡುವ ವರ್ಗಾವಣೆಗೂ ಆಗಸ್ಟ್‌ 1ರಿಂದ ಶುಲ್ಕ ರದ್ದುಪಡಿಸಿದೆ.

ಕಡಿಮೆ-ನಗದಿನ ಆರ್ಥಿಕತೆ ಉತ್ತೇಜಿಸುವ ನಿಟ್ಟಿನಲ್ಲಿ ಬ್ಯಾಂಕ್‌ಗಳಿಗೆ ಈ ಶುಲ್ಕಗಳನ್ನು ಆರ್‌ಬಿಐ ರದ್ದು ಮಾಡಿತ್ತು. ಇದರ ಲಾಭವನ್ನು ಎಸ್‌ಬಿಐ ಗ್ರಾಹಕರಿಗೆ ವರ್ಗಾಯಿಸಿದೆ.

ದೇಶದ ಬ್ಯಾಂಕಿಂಗ್‌ ಮಾರುಕಟ್ಟೆಯಲ್ಲಿ ಶೇ.25ರಷ್ಟನ್ನು ಹೊಂದಿರುವ ಎಸ್‌ಬಿಐ, ಈ ಮೊದಲು ಎನ್‌ಇಎಫ್‌ಟಿ ಮೂಲಕ ನಡೆಯುತ್ತಿದ್ದ ವ್ಯವಹಾರಗಳಿಗೆ ರೂ.1ರಿಂದ ರೂ.5ರ ತನಕ ಶುಲ್ಕ ವಿಧಿಸುತ್ತಿತ್ತು. ಆರ್‌ಟಿಜಿಎಸ್‌ ಸೇವೆಗಳಿಗೆ ರೂ.5ರಿಂದ 50ರ ತನಕ ಶುಲ್ಕಗಳನ್ನು ವಿಧಿಸುತ್ತಿತ್ತು.

2019ರ ಮಾರ್ಚ್‌ ಅಂತ್ಯದ ಹೊತ್ತಿಗೆ ಎಸ್‌ಬಿಐನ ಇಂಟರ್‌ನೆಟ್‌ ಬ್ಯಾಂಕಿಂಗ್‌ ಬಳಸುವ ಗ್ರಾಹಕರ ಸಂಖ್ಯೆ 6 ಕೋಟಿಯನ್ನು ದಾಟಿದೆ. 1.41 ಕೋಟಿ ಗ್ರಾಹಕರು ಎಸ್‌ಬಿಐನ ಮೊಬೈಲ್‌ ಬ್ಯಾಂಕಿಂಗ್‌ ಸೇವೆಗಳನ್ನು ಬಳಸುತ್ತಿದ್ದಾರೆ. ದೇಶದ ಮೊಬೈಲ್‌ ಬ್ಯಾಂಕಿಂಗ್‌ ವಹಿವಾಟಿನಲ್ಲಿ ಎಸ್‌ಬಿಐ ಪಾಲು ಶೇ.18ರಷ್ಟಿದೆ. 22,010 ಶಾಖೆಗಳನ್ನು ಎಸ್‌ಬಿಐ ಹೊಂದಿದ್ದು, 58,000 ಎಟಿಎಂ/ಸಿಡಿಎಂಗಳಿವೆ (ನಗದು ಪಾವತಿ ಯಂತ್ರ)