ಹೊಸದಿಲ್ಲಿ: ಸುದೀರ್ಘ ಕಾಲದಿಂದಲೂ ನಿಷ್ಕ್ರಿಯವಾಗಿರುವ ಸುಮಾರು 1.62 ಲಕ್ಷಕ್ಕೂ ಅಧಿಕ ಕಂಪನಿಗಳನ್ನು ನೋಂದಣಿ ಪಟ್ಟಿಯಿಂದ ತೆಗೆದು ಹಾಕಲಾಗಿದೆ. ಜು.12ರ ತನಕ ಇಷ್ಟು ದೊಡ್ಡ ಕಂಪನಿಗಳು ನೋಂದಣಿ ಕಳೆದುಕೊಂಡಿವೆ ಎಂದು ಕೇಂದ್ರ ಸರಕಾರವು ಸಂಸತ್ತಿಗೆ ಮಂಗಳವಾರ ತಿಳಿಸಿದೆ.
ರಾಜ್ಯಸಭೆಗೆ ಈ ಬಗ್ಗೆ ಲಿಖಿತ ಉತ್ತರ ನೀಡಿದ ಕೇಂದ್ರ ಕಾರ್ಪೊರೇಟ್ ವ್ಯವಹಾರಗಳ ರಾಜ್ಯ ಸಚಿವ ಅರ್ಜುನ್ ರಾಮ್ ಮೇಘ್ವಾಲ್, 'ನೋಂದಣಿ ಕಳೆದುಕೊಂಡಿರುವ ಕಂಪನಿಗಳಲ್ಲಿ ಅರ್ಧದಷ್ಟು ದಿಲ್ಲಿ, ಮುಂಬಯಿ ಮತ್ತು ಹೈದರಾಬಾದ್ಗೆ ಸೇರಿದವುಗಳಾಗಿವೆ. ಕಂಪನಿಗಳ ಕಾಯ್ದೆ 2013ರ ಸೆಕ್ಷನ್ 248ರ ಅನ್ವಯ 1,62,618 ಕಂಪನಿಗಳನ್ನು ಕಂಪನಿಗಳ ನೋಂದಣಿ ಪಟ್ಟಿಯಿಂದ ಹೊರಗೆ ಹಾಕಲಾಗಿದೆ,' ಎಂದಿದ್ದಾರೆ.
ಎರಡು ಹಣಕಾಸು ವರ್ಷಗಳಲ್ಲಿ ಯಾವುದೇ ವ್ಯವಹಾರ ನಡೆಸದ ಕಂಪನಿಗಳ ನೋಂದಣಿ ರದ್ದಿಗೆ ಸೆಕ್ಷನ್ 248 ಅವಕಾಶ ಮಾಡಿಕೊಡುತ್ತದೆ. 'ತೆರಿಗೆ ವಂಚನೆ ಸೇರಿದಂತೆ ಅಕ್ರಮವೆಸಗಿದ 37 ಸಾವಿರ ನಕಲಿ ಕಂಪನಿಗಳನ್ನು ಪತ್ತೆ ಹಚ್ಚಲಾಗಿದೆ. ಅಲ್ಲದೇ 3 ಲಕ್ಷಕ್ಕೂ ಅಧಿಕ ಕಂಪನಿಗಳ ಅನುಮಾನಾಸ್ಪದ ವ್ಯವಹಾರಗಳು, ನೋಟು ಅಮಾನ್ಯತೆ ಅವಧಿಯಲ್ಲಿನ ಅಕ್ರಮಗಳ ಕುರಿತಾಗಿ ನಿಗಾ ಇಡಲಾಗಿದೆ,' ಎಂದು ಕಳೆದ ತಿಂಗಳಷ್ಟೇ ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದರು.