ಆರ್ಥಿಕ ಹಿಂಜರಿತ, ಜಿಎಸ್‌ಟಿ ಎಫೆಕ್ಟ್: 10,000 ಉದ್ಯೋಗಿಗಳಿಗೆ ಪಾರ್ಲೆ ಕಂಪನಿಯಿಂದ ಗೇಟ್‌ಪಾಸ್‌?

ಹೊಸದಿಲ್ಲಿ: ಭಾರತದ ಪ್ರಮುಖ ಬಿಸ್ಕೆಟ್ ತಯಾರಕ ಕಂಪನಿಯಾಗಿರುವ ಪಾರ್ಲೆ ಪ್ರಾಡಕ್ಟ್ಸ್‌ ಲಿಮಿಟೆಡ್ ತನ್ನ ಉದ್ಯೋಗಿಗಳಿಗೆ ಶಾಕ್‌ ಕೊಡುವ ನಿರೀಕ್ಷೆ ಇದೆ. ಆರ್ಥಿಕ ಹಿಂಜರಿತ ಹಾಗೂ ಗ್ರಾಮೀಣ ಭಾಗಗಳಲ್ಲಿ ಡಿಮ್ಯಾಂಡ್‌ ಕಡಿಮೆಯಾಗುತ್ತಿರುವ ಹಿನ್ನೆಲೆ ಉತ್ಪಾದನಾ ಕಡಿತ ಮಾಡುವ ಬಗ್ಗೆ ಕಂಪನಿ ಚಿಂತನೆ ವ್ಯಕ್ತಪಡಿಸುತ್ತಿದೆ ಎಂದು ಕಂಪನಿಯ ಕಾರ್ಯನಿರ್ವಾಹಕ ಅಧಿಕಾರಿ ಬುಧವಾರ ತಿಳಿಸಿದ್ದಾರೆ. ಈ ಹಿನ್ನೆಲೆ ಸುಮಾರು 10,000 ಉದ್ಯೋಗಿಗಳಿಗೆ ಪಾರ್ಲೆ ಕಂಪನಿ ಗೇಟ್‌ಪಾಸ್‌ ನೀಡಲು ಮುಂದಾಗಿದೆ.

ಏಷ್ಯಾದ ಮೂರನೇ ಅತಿದೊಡ್ಡ ಆರ್ಥಿಕತೆಯಾಗಿರುವ ಭಾರತದಲ್ಲಿ ಆರ್ಥಿಕತೆಯ ಬೆಳವಣಿಗೆ ಕುಂಠಿತಗೊಂಡಿದ್ದು, ಈ ಹಿನ್ನೆಲೆ ಕಾರುಗಳಿಂದ ಹಿಡಿದು ಬಟ್ಟೆಗಳವರೆಗೆ - ಎಲ್ಲದಕ್ಕೂ ಉತ್ಪಾದನೆ ಕಡಿತ ಮಾಡಲು ಹಲವು ಕಂಪನಿಗಳು ಮುಂದಾಗಿವೆ. ಅಲ್ಲದೆ, ಆರ್ಥಿಕತೆ ಮತ್ತೆ ಚೇತರಿಸಿಕೊಳ್ಳಲು ಕೇಂದ್ರ ಸರಕಾರ ಆರ್ಥಿಕ ಉತ್ತೇಜನ ನೀಡಲಿ ಎಂದೂ ಕಂಪನಿಗಳು ಭರವಸೆ ವ್ಯಕ್ತಪಡಿಸಿವೆ.

ಪಾರ್ಲೆ ಬಿಸ್ಕೆಟ್‌ ವ್ಯಾಪಾರದಲ್ಲಿ ತೀವ್ರ ಕುಸಿತ ಕಂಡಿರುವ ಹಿನ್ನೆಲೆ ಕಂಪನಿ ಉತ್ಪಾದನಾ ಕಡಿತಕ್ಕೆ ಮುಂದಾಗಬಹುದು. ಈ ಹಿನ್ನೆಲೆ 8,000 ರಿಂದ 10,000 ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡಬಹುದು ಎಂದೂ ಪಾರ್ಲೆ ಕಂಪನಿಯ ಹಿರಿಯ ಅಧಿಕಾರಿಯೊಬ್ಬರು ಎಚ್ಚರಿಕೆ ನೀಡಿದ್ದಾರೆ. ಅಲ್ಲದೆ, ಸದ್ಯ ಪರಿಸ್ಥಿತಿ ತೀರಾ ಕೆಟ್ಟದಾಗಿದ್ದು, ಸರಕಾರ ಈಗಲೇ ಮಧ್ಯಸ್ಥಿಕೆ ವಹಿಸದಿದ್ದಲ್ಲಿ ಉದ್ಯೋಗ ಕಡಿತ ಮಾಡಲೇಬೇಕಾಗುತ್ತದೆ ಎಂದೂ ತಿಳಿಸಿದ್ದಾರೆ.

ಅಲ್ಲದೆ, 2017ರಲ್ಲಿ ದೇಶದಲ್ಲಿ ಜಿಎಸ್‌ಟಿ ಜಾರಿಗೆ ಬಂದ ಬಳಿಕ ಪಾರ್ಲೆಜಿ ಕಂಪನಿಗೆ ತೀವ್ರ ಹೊಡೆತ ಬಿದ್ದಿದೆ. ಹೆಚ್ಚು ತೆರಿಗೆಯಿಂದ ಬಿಸ್ಕೆಟ್‌ಗಳನ್ನು ಕಡಿತಗೊಳಿಸಬೇಕಾಯಿತು. ಇದರಿಂದ ಗ್ರಾಮೀಣ ಭಾಗಗಳಲ್ಲಿ ನಮ್ಮ ಕಂಪನಿಗೆ ತೀವ್ರ ಹೊಡೆತ ಬಿದ್ದಿದೆ ಎಂದೂ ಅಧಿಕಾರಿ ತಿಳಿಸಿದ್ದಾರೆ. ಸದ್ಯ, ಪಾರ್ಲೆ ಕಂಪನಿ ಸುಮಾರು 1 ಲಕ್ಷ ಉದ್ಯೋಗಿಗಳನ್ನು ಹೊಂದಿದೆ.