Patanjali: ಶೀಘ್ರದಲ್ಲೇ ಮಾರುಕಟ್ಟೆಗೆ ಪತಂಜಲಿ ಹಾಲು, ಲೀಟರ್‌ ಬೆಲೆ 40 ರೂ.

ಹೊಸದಿಲ್ಲಿ: ಯೋಗಾ ಗುರು ಬಾಬಾ ರಾಮ್‌ದೇವ್ ಅವರ ಪತಂಜಲಿ ಸಂಸ್ಥೆ ತನ್ನ ವಾಣಿಜ್ಯ ವಹಿವಾಟನ್ನು ವಿಸ್ತರಿಸಲು ದೃಷ್ಟಿ ಹರಿಸಿದೆ. ಹೈನುಗಾರಿಕೆ ಕ್ಷೇತ್ರಕ್ಕೂ ಅಡಿಯಿಟ್ಟಿದ್ದು ಶೀಘ್ರದಲ್ಲೇ ಮಾರುಕಟ್ಟೆಗೆ ಪತಂಜಲಿ ಹಾಲು, ಹಾಲಿನ ಉತ್ಪನ್ನಗಳನ್ನು ಬಿಡುಗಡೆ ಮಾಡಲಿದೆ.

ಪತಂಜಲಿ ಸಂಸ್ಥೆ 40 ರೂ.ಗಳಿಗೆ ಟೆಟ್ರಾ ಪ್ಯಾಕ್‌ನಲ್ಲಿ ಲೀಟರ್ ಹಾಲು ಮಾರಾಟ ಮಾಡಲಿದೆ. ಪ್ರತಿಸ್ಪರ್ಧಿ ಸಂಸ್ಥೆಗಳಿಗಿಂತ 2 ರೂ. ಕಡಿಮೆಗೆ ಪತಂಜಲಿ ಹಾಲನ್ನು ಮಾರಾಟ ಮಾಡುವುದಾಗಿ ತಿಳಿಸಿದೆ. ಈಗಾಗಲೆ ಪತಂಜಲಿ ಆಕಳ ತುಪ್ಪ ಮತ್ತು ಹಾಲಿನ ಪುಡಿಯನ್ನು ಮಾರಾಟ ಮಾಡುತ್ತಿದೆ.

ಡೈರಿ ಮಾರುಕಟ್ಟೆಯಲ್ಲಿ ಈಗಾಗಲೆ ಅಮೂಲ್, ಮದರ್ ಡೈರಿ‌ಗಳು ಏಕಸ್ವಾಮ್ಯ ಸಾಧಿಸಿವೆ. ಇದೀಗ ಇವುಗಳಿಗೆ ಪ್ರತಿಸ್ಪರ್ಧೆ ಒಡ್ಡಲಿದೆ ಪತಂಜಲಿ. ಡೈರ ಕ್ಷೇತ್ರದಲ್ಲಷ್ಟೇ ಅಲ್ಲದೆ ವಸ್ತ್ರ, ಚಪ್ಪಲಿಗಳನ್ನೂ ಸಹ ಪತಂಜಲಿ ಬ್ರ್ಯಾಂಡ್ ಹೆಸರಿನಲ್ಲಿ ಮಾರುಕಟ್ಟೆಗೆ ತರಲಿದೆ.

ಮೊದಲ ಹಂತದಲ್ಲಿ ಪಂತಂಜಲಿ ಡೈರಿ ಉತ್ಪನ್ನಗಳನ್ನು ದಿಲ್ಲಿ-ಎನ್‌ಸಿಆರ್, ರಾಜಸ್ಥಾನ, ಮಹಾರಾಷ್ಟ್ರಗಳಲ್ಲಿ ಮಾರಾಟ ಮಾಡಲಾಗುತ್ತದೆ ಎಂದು ಬಾಬಾ ರಾಮ್ ತಿಳಿಸಿದ್ದಾರೆ. ನಿತ್ಯ 10 ಲಕ್ಷ ಲೀಟರ್ ಹಾಲು ಮಾರಾಟ ಮಾಡಬೇಕೆಂಬ ಗುರಿ ಇಟ್ಟುಕೊಳ್ಳಲಾಗಿದೆ ಎಂದು ರಾಮ್‍ದೇವ್ ತಿಳಿಸಿದ್ದಾರೆ.

ಇದಕ್ಕಾಗಿ 56 ಸಾವಿರ ಮಂದಿ ರೀಟೇಲರ್‌ಗಳೊಂದಿಗೆ ಪತಂಜಲಿ ನೆಟ್‌ವರ್ಕ್ ವ್ಯವಸ್ಥೆ ಮಾಡಲಿದೆ. ಮೊದಲ ದಿನ 4 ಲಕ್ಷ ಲೀಟರ್ ಆಕಳ ಹಾಲನ್ನು ಉತ್ಪತ್ತಿ ಮಾಡಿರುವುದಾಗಿ ಪತಂಜಲಿ ಸಂಸ್ಥೆ ತಿಳಿಸಿದೆ. ಹಾಲಿನ ಉತ್ಪನ್ನಗಳ ಮೂಲಕ 2020ಕ್ಕೆ 1000 ಕೋಟಿ ರೂ. ಆದಾಯ ಗಳಿಸಬೇಕೆಂದ ಗುರಿಯನ್ನು ಸಂಸ್ಥೆ ಇಟ್ಟುಕೊಂಡಿದೆ. ಈ ಹಣಕಾಸು ವರ್ಷದಲ್ಲಿ ಹಾಲಿನ ಉತ್ಪನ್ನಗಳ ಮೂಲಕ ರೂ.500 ಕೋಟಿ ಸಂಪಾದಿಸಲು ಪತಂಜಲಿ ಉದ್ದೇಶಿಸಿದೆ.

ಶೀತಲೀಕರಿಸಿದ ತರಕಾರಿಯ ಜತೆಗೆ ದಿವ್ಯ ಜಲ್ ಹೆಸರಿನಲ್ಲಿ ಪ್ಯಾಕೇಜ್ ಮಾಡಲಾದ ಕುಡಿಯುವ ನೀರನ್ನು ಸಹ ಪತಂಜಲಿ ಮಾರುಕಟ್ಟೆಗೆ ತರಲು ಮುಂದಾಗಿದೆ. 250 ಎಂಎಲ್, ಅರ್ಧ ಲೀಟರ್, ಲೀಟರ್, ಎರಡು ಲೀಟರ್, 5 ಲೀಟರ್, 20 ಲೀಟರ್‌ಗಳ ದಿವ್ಯ ಜಲ್ ನೀರನ್ನು ಪತಂಜಲಿ ಮಾರಾಟ ಮಾಡಲಿದೆ.