ಹಿಂದೂಸ್ಥಾನ್‌ ಯುನಿಲಿವರ್‌ ಹಿಂದಿಕ್ಕಲು ಪತಂಜಲಿ ಫ್ಲ್ಯಾನ್‌

ಹೊಸದಿಲ್ಲಿ: ಪ್ರಸಕ್ತ ಹಣಕಾಸು ವರ್ಷದ ಅಂತ್ಯದ ವೇಳೆಗೆ ತಮ್ಮ ಪತಂಜಲಿ ಆಯುರ್ವೇದ್‌ ಸಂಸ್ಥೆಯ ಆದಾಯವು 25,000 ಕೋಟಿ ರೂ. ಮುಟ್ಟಲಿದೆ. ಮುಂದಿನ 5 ವರ್ಷಗಳಲ್ಲಿಎಚ್‌ಯುಎಲ್‌ ಅನ್ನು ಎರಡನೇ ಸ್ಥಾನಕ್ಕೆ ತಳ್ಳಿ, ಮೊದಲ ಸ್ಥಾನಕ್ಕೆ ಬರುವುದು ಪತಂಜಲಿಯ ಗುರಿಯಾಗಿದೆ ಎಂದು ಯೋಗ ಗುರು ಬಾಬಾ ರಾಮದೇವ್‌ ಹೇಳಿದ್ದಾರೆ.

''ಅನೇಕ ಬಹುರಾಷ್ಟ್ರೀಯ ಕಂಪನಿಗಳು ನಮ್ಮ ಜೊತೆ ಸಹಭಾಗಿತ್ವಕ್ಕೆ ಆಸಕ್ತಿ ತೋರಿಸಿವೆ. ಆದರೆ, ನಾವು ಈ ಬಗ್ಗೆ ಗಮನ ಹರಿಸಿಲ್ಲ,'' ಎಂದಿದ್ದಾರೆ. ''ಪತಂಜಲಿ ವ್ಯವಹಾರವೊಂದರಿಂದಲೇ 12,000 ಕೋಟಿ ರೂ. ನಿರೀಕ್ಷಿಸಿದ್ದೇವೆ. ರುಚಿ ಸೋಯಾದಿಂದ ಉಳಿದ ಆದಾಯ ಬರಲಿದೆ,'' ಎಂದು ವಿವರಿಸಿದ್ದಾರೆ. ಸಾಲದ ಹೊರೆಯಿಂದಾಗಿ ಕಾರ್ಪೊರೇಟ್‌ ದಿವಾಳಿ ಪ್ರಕ್ರಿಯೆಗೆ ಒಳಗಾಗಿದ್ದ ರುಚಿ ಸೋಯಾವನ್ನು ಕಳೆದ ವರ್ಷ ಪತಂಜಲಿಯು 4,500 ಕೋಟಿ ರೂ.ಗಳಿಗೆ ಖರೀದಿಸಿತ್ತು.

''ದೇಶದ ಬೃಹತ್‌ ಎಫ್‌ಎಂಸಿಜಿ ಕಂಪನಿಗಳಲ್ಲಿ ಪತಂಜಲಿ ಮುಂಚೂಣಿಗೆ ಬರಲಿದ್ದು, ಮುಂದಿನ 5 ವರ್ಷಗಳಲ್ಲಿ ನಮ್ಮ ವಹಿವಾಟು 50,000 ಕೋಟಿ ರೂ.ನಿಂದ 1 ಲಕ್ಷ ಕೋಟಿ ರೂ. ತನಕ ಮುಟ್ಟಲಿದೆ. ಆ ಮೂಲಕ ಹಿಂದೂಸ್ಥಾನ್‌ ಯುನಿಲಿವರ್‌ (ಎಚ್‌ಯುಎಲ್‌) ಅನ್ನು ಹಿಂದಿಕ್ಕಲಿದೆ," ಎಂದು ರಾಮದೇವ್‌ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಮುಂದಿನ ವರ್ಷ ಮಾರುಕಟ್ಟೆ ಚೇತರಿಕೆ

ದೇಶದ ಮಂದ ಆರ್ಥಿಕತೆ ಕುರಿತು ಪ್ರತಿಕ್ರಿಯಿಸಿರುವ ರಾಮದೇವ್‌, ''ಮುಂದಿನ ಹಣಕಾಸು ವರ್ಷದಲ್ಲಿ ಮಾರುಕಟ್ಟೆ ಚೇತರಿಸಿಕೊಳ್ಳುವ ಲಕ್ಷಣಗಳು ಕಾಣಿಸಿವೆ,'' ಎಂದಿದ್ದಾರೆ.

ಕಳೆದ ವರ್ಷ ಎಚ್‌ಯುಎಲ್‌ 38,000 ಕೋಟಿ ರೂ. ವಹಿವಾಟು ನಡೆಸಿತ್ತು. ಜಿಎಸ್‌ಕೆ ಕನ್ಸೂಮರ್‌ ಜೊತೆಗೆ ವಿಲೀನವು ಪೂರ್ಣವಾದ ಬಳಿಕ ಎಚ್‌ಯುಎಲ್‌ ವಹಿವಾಟು ಹೆಚ್ಚಳವಾಗುವ ಸಾಧ್ಯತೆ ಇದೆ.