'ಪೇಟಿಎಂ ಇನ್ಶೂರೆನ್ಸ್‌' ಕಂಪನಿಯಲ್ಲಿ 950 ಕೋಟಿ ರೂ. ಹೂಡಿಕೆ ಮಾಡಲಿದೆ Paytm

ಪೇಟಿಎಂ ಜನರಲ್ ಇನ್ಶುರೆನ್ಸ್ ಲಿಮಿಟೆಡ್‌ನಲ್ಲಿ (ಪಿಜಿಐಎಲ್) ಪೇಟಿಎಂನ ಮಾತೃ ಸಂಸ್ಥೆ ಒನ್ 97 ಕಮ್ಯುನಿಕೇಷನ್ಸ್‌ 950 ಕೋಟಿ ರೂ.ವರೆಗೆ ಹೂಡಿಕೆ ಮಾಡಲಿದೆ. ಮುಂದಿನ 10 ವರ್ಷಗಳ ಅವಧಿಯಲ್ಲಿ ಕಂತು ಕಂತುಗಳ ರೂಪದಲ್ಲಿ ಈ ಹಣವನ್ನು ಹೂಡಿಕೆ ಮಾಡಲಿದೆ.

ಈ ಹೂಡಿಕೆ ಪ್ರಸ್ತಾಪಕ್ಕೆ ಶುಕ್ರವಾರ ನಡೆದ ಕಂಪನಿಯ ನಿರ್ದೇಶಕರ ಮಂಡಳಿಯ ಸಭೆಯಲ್ಲಿ ಅನುಮೋದನೆ ನೀಡಲಾಗಿದೆ. ಈ ಹೂಡಿಕೆಯ ನಂತರ ಕಂಪನಿಯ ಶೇ. 74ರಷ್ಟು ಮುಂಗಡ ಈಕ್ವಿಟಿ ಪಾಲನ್ನು ಹಿಡಿದಿಟ್ಟುಕೊಳ್ಳಲು ಒನ್‌97 ಕಮ್ಯೂನಿಕೇಷನ್ಸ್‌ಗೆ ಸಾಧ್ಯವಾಗಲಿದೆ. ಈ ಹೂಡಿಕೆಯ ನಂತರ ಪಿಜಿಐಎಲ್‌ ಕಂಪನಿಯ ಅಂಗಸಂಸ್ಥೆಯಾಗಲಿದೆ.

ಎಂಡಿ, ಸಿಇಒ ಸ್ಥಾನದಲ್ಲಿ ವಿಜಯ ಶೇಖರ್‌ ಶರ್ಮಾ ಮುಂದುವರಿಕೆ

ಪೇಟಿಎಂನ ಸಂಸ್ಥಾಪಕ ವಿಜಯ್ ಶೇಖರ್ ಶರ್ಮಾ ಅವರನ್ನು ಫಿನ್‌ಟೆಕ್ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಮರು ನೇಮಕ ಮಾಡಲಾಗಿದೆ ಎಂದು ಕಂಪನಿಯು ಶನಿವಾರ ವಿನಿಮಯ ಕೇಂದ್ರಗಳಿಗೆ ತಿಳಿಸಿದೆ. ಶರ್ಮಾ ಅವರು ಡಿಸೆಂಬರ್ 19, 2022ರಿಂದ ಐದು ವರ್ಷಗಳ ಅವಧಿಗೆ ಈ ಹುದ್ದೆಗೆ ಮರುನೇಮಕವಾಗಿದ್ದಾರೆ.

ಆದಾಯ ಏರಿಕೆಯಾದರೂ ನಿಲ್ಲದ ನಷ್ಟ, ಮೂರೇ ತಿಂಗಳಲ್ಲಿ ಪೇಟಿಎಂಗೆ 761 ಕೋಟಿ ರೂ. ಲಾಸ್‌!
ಇದೇ ಅಧಿಸೂಚನೆಯಲ್ಲಿ ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿ ಮಧುರ್ ದಿಯೋರಾ ಅವರನ್ನು ಹೆಚ್ಚುವರಿ ನಿರ್ದೇಶಕರಾಗಿ ನೇಮಿಸಲಾಗಿದೆ ಎಂದು ಕಂಪನಿ ತಿಳಿಸಿದೆ. ಮೇ 20, 2022 ಐದು ವರ್ಷಗಳ ಅವಧಿಗೆ ಅವರು ನಿರ್ದೇಶಕರಾಗಿ ಇರಲಿದ್ದಾರೆ.

ಕಂಪನಿಯು ತನ್ನ ಮಾರ್ಚ್ ತ್ರೈಮಾಸಿಕ ಫಲಿತಾಂಶಗಳನ್ನು ಶುಕ್ರವಾರ ಬಿಡುಗಡೆ ಮಾಡಿದ್ದು, ಕಂಪನಿಯ ನಿವ್ವಳ ನಷ್ಟವು ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿದ್ದ 441.8 ಕೋಟಿ ರೂ.ಗಳಿಂದ 761.4 ಕೋಟಿ ರೂ.ಗೆ ಏರಿಕೆಯಾಗಿದೆ.

ಇದೇ ವೇಳೆ ಪೇಟಿಎಂ ಕಾರ್ಯಾಚರಣೆಗಳಿಂದ 1540.9 ಕೋಟಿ ರೂ. ಆದಾಯ ಗಳಿಸಿದೆ. ಹಿಂದಿನ ವರ್ಷದ ಇದೇ ತ್ರೈಮಾಸಿಕದಲ್ಲಿ ಕಂಪನಿಯ ಆದಾಯ 815.3 ಕೋಟಿ ರೂ. ಇತ್ತು. ಇದಕ್ಕೆ ಹೋಲಿಸಿದರೆ ಕಂಪನಿಯ ಆದಾಯ ಶೇ. 88.99ರಷ್ಟು ಏರಿಕೆ ಕಂಡಿದೆ.