ಡೇಟಾ ಬಳಕೆದಾರರ ಗೌಪ್ಯತೆ ರಕ್ಷಣೆಗೆ ಟ್ರಾಯ್‌ ಶಿಫಾರಸು

ಹೊಸದಿಲ್ಲಿ: ಟೆಲಿಕಾಂ ವಲಯದಲ್ಲಿ ಬಳಕೆದಾರರ ಮಾಹಿತಿಗಳನ್ನು ರಕ್ಷಿಸುವ ನಿಯಮಗಳು ತೃಪ್ತಿದಾಯಕವಾಗಿಲ್ಲ. ಗ್ರಾಹಕರ ಡೇಟಾ ಮೇಲೆ ಕಂಪನಿಗಳಿಗೆ ಹಕ್ಕಿಲ್ಲ. ಗ್ರಾಹಕರ ಡೇಟಾದ ಸುರಕ್ಷತೆ ಬಗ್ಗೆ ಟೆಲಿಕಾಂ ಕಂಪನಿಗಳು ಕೈಗೊಂಡಿರುವ ಕ್ರಮಗಳು ಸಮರ್ಪಕವಾಗಿಲ್ಲ. ಅಲ್ಲದೇ ತಮ್ಮ ಮಾಹಿತಿಗಳ ಗೌಪ್ಯತೆ ಕಾಯ್ದುಕೊಳ್ಳುವುದನ್ನು ಗ್ರಾಹಕರೂ ಮರೆತಿದ್ದಾರೆ ಎಂದು ದೂರ ಸಂಪರ್ಕ ನಿಯಂತ್ರಕ ಟ್ರಾಯ್‌ ಅಭಿಪ್ರಾಯಪಟ್ಟಿದೆ.

ಖಾಸಗಿತನ, ಭದ್ರತೆ, ಟೆಲಿಕಾಂ ನೆಟ್‌ವರ್ಕ್‌ಗಳಲ್ಲಿನ ಡೇಟಾ ಒಡೆತನ ಕುರಿತಾಗಿ ಟ್ರಾಯ್‌ ಒಂದಷ್ಟು ಶಿಫಾರಸುಗಳನ್ನು ಮಾಡಿದೆ. ''ಗ್ರಾಹಕರು ತಮ್ಮ ಡೇಟಾಕ್ಕೆ ಒಡೆಯರಾಗಿದ್ದು, ಕಂಪನಿಗಳು ಡೇಟಾ ಬಳಕೆಯ ಹಕ್ಕನ್ನು ಹೊಂದಿಲ್ಲ,'' ಎಂದು ಟ್ರಾಯ್‌ ಹೇಳಿದೆ.

''ಆಯ್ಕೆಯ ಹಕ್ಕು, ಗಮನಿಸುವುದು ಮತ್ತು ಸಮ್ಮತಿಸುವ ಹಕ್ಕು, ಡೇಟಾ ಪೋರ್ಟಬಿಲಿಟಿ ಆಯ್ಕೆಗಳನ್ನು ಗ್ರಾಹಕರಿಗೆ ನೀಡಬೇಕು,'' ಎಂದು ಟೆಲಿಕಾಂ ಇಲಾಖೆಗೆ ಟ್ರಾಯ್‌ ಶಿಫಾರಸು ಮಾಡಿದೆ. ಗ್ರಾಹಕರ ಗೌಪ್ಯತೆ, ಹಕ್ಕುಗಳ ರಕ್ಷಣೆಗೆ ಸರಕಾರವು ಸೂಕ್ತ ವ್ಯವಸ್ಥೆ ರೂಪಿಸಬೇಕು ಎಂದೂ ಶಿಫಾರಸು ಮಾಡಿದೆ.