ಪೆಟ್ರೋಲ್‌ ಕಾರು ನೋಂದಣಿ ಶುಲ್ಕ ಏರಿಕೆ ಸಂಭವ

ಹೊಸದಿಲ್ಲಿ : ಪೆಟ್ರೋಲ್‌ ಮತ್ತು ಡೀಸೆಲ್‌ ಕಾರುಗಳ ನೋಂದಣಿ ಶುಲ್ಕಗಳನ್ನು ಏರಿಸಲು ಕರಡು ಅಧಿಸೂಚನೆಯನ್ನು ಸಾರಿಗೆ ಸಚಿವಾಲಯ ಉದ್ದೇಶಿಸಿದೆ.

ಈ ಸಂಬಂಧ ಇಲಾಖೆ ಕರಡು ಅಧಿಸೂಚನೆಯನ್ನು ಸಿದ್ಧಪಡಿಸಿದೆ. ಅದರ ಪ್ರಕಾರ ಹೊಸ ಪೆಟ್ರೋಲ್‌ ಅಥವಾ ಡೀಸೆಲ್‌ ಕಾರು ಖರೀದಿಗೆ ನೋಂದಣಿ ಶುಲ್ಕವು ಈಗಿನ 600 ರೂ.ಗಳಿಂದ 5,000 ರೂ.ಗಳಿಗೆ ಏರಿಕೆಯಾಗಲಿದೆ. ಪೆಟ್ರೋಲ್‌-ಡೀಸೆಲ್‌ ಬಳಕೆಯನ್ನು ನಿರುತ್ತೇಜನಗೊಳಿಸಲು ಹಾಗೂ ಎಲೆಕ್ಟ್ರಿಕ್‌ ವಾಹನಗಳ ಬಳಕೆ ಉತ್ತೇಜಿಸಲು ಈ ಕ್ರಮ ಕೈಗೊಳ್ಳುವ ನಿರೀಕ್ಷೆ ಇದೆ.

ದ್ವಿಚಕ್ರ ವಾಹನಗಳ ನೋಂದಣಿಗೆ ಶುಲ್ಕವು ಈಗಿನ 50 ರೂ.ಗಳಿಂದ 1,000 ರೂ.ಗೆ ಏರಿಕೆಯಾಗಲಿದೆ. ನವೀಕರಣ ಶುಲ್ಕ 2,000 ರೂ.ಗೆ ವೃದ್ಧಿಸುವ ಸಂಭವ ಇದೆ. ಕ್ಯಾಬ್‌ಗಳಿಗೆ ನೋಂದಣಿ ಹಾಗೂ ನವೀಕರಣ ಶುಲ್ಕವು ಅನುಕ್ರಮವಾಗಿ 10,000 ರೂ. ಮತ್ತು 20,000 ರೂ.ಗೆ ಪರಿಷ್ಕರಣೆಯಾಗುವ ಸಾಧ್ಯತೆ ಇದೆ. ಆಮದಾಗುವ ವಾಹನಗಳ ನೋಂದಣಿ ಶುಲ್ಕವನ್ನು 5,000 ರೂ.ಗಳಿಂದ 40,000 ರೂ.ಗೆ ವೃದ್ಧಿಸುವ ಪ್ರಸ್ತಾಪವೂ ಇದೆ. ಮುಂದಿನ 40-45 ದಿನಗಳಲ್ಲಿ ಅಂತಿಮ ಶುಲ್ಕ ಪಟ್ಟಿ ಪ್ರಕಟವಾಗುವ ಸಾಧ್ಯತೆ ಇದೆ.