ಬೆಂಗಳೂರು: ಪೆಟ್ರೋಲ್‌ 51 ಪೈಸೆ, ಡೀಸೆಲ್‌ 61 ಪೈಸೆ ಏರಿಕೆ

ಹೊಸದಿಲ್ಲಿ: ಕಳೆದ ಎರಡು ತಿಂಗಳಿಂದ ಇಳಿಕೆಯ ಹಾದಿಯಲ್ಲಿದ್ದ ಇಂಧನ ದರ, ಈಗ ಯೂ ಟರ್ನ್‌ ಪಡೆದಿದೆ. ಸತತ ನಾಲ್ಕನೇ ದಿನವಾದ ಭಾನುವಾರವೂ ಏರಿಕೆಯಾಗಿದೆ. ದೇಶದ ಪ್ರಮುಖ ನಗರಗಳಲ್ಲಿ ಪೆಟ್ರೋಲ್‌ ದರ ಲೀಟರ್‌ಗೆ 48-60 ಪೈಸೆ, ಡೀಸೆಲ್‌ ದರ 60-75 ಪೈಸೆ ಏರಿಕೆಯಾಗಿದೆ.

ರಾಜಧಾನಿ ದಿಲ್ಲಿಯಲ್ಲಿ ಪೆಟ್ರೋಲ್‌ ದರ 49 ಪೈಸೆ ಏರಿಕೆಯಾಗಿದ್ದು ರೂ.69.75 ಮುಟ್ಟಿದೆ. ಡೀಸೆಲ್‌ ದರ ರೂ.63.69ಕ್ಕೆ ಏರಿದೆ. ವಾಣಿಜ್ಯ ನಗರಿ ಮುಂಬಯಿನಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಕ್ರಮವಾಗಿ 48 ಪೈಸೆ ಮತ್ತು 62 ಪೈಸೆ ಏರಿಕೆಯಾಗಿ 75.39 ರೂ ಮತ್ತು 66.66 ರೂ.ಗೆ ಜಿಗಿದಿವೆ.

ಬೆಂಗಳೂರಿನಲ್ಲಿಯೂ ಪೆಟ್ರೋಲ್‌ ದರ ಲೀಟರ್‌ಗೆ 51 ಪೈಸೆ ಏರಿಕೆಯಾಗಿದ್ದು ರೂ.72.04 ತಲುಪಿದೆ. ಡೀಸೆಲ್‌ ದರ 61 ಪೈಸೆ ಏರಿಕೆಯಾಗಿ ರೂ.65.78 ಮುಟ್ಟಿದೆ.

ಇತರ ಮೆಟ್ರೊ ಸಿಟಿಗಳಾದ ಚೆನ್ನೈ ಮತ್ತು ಕೋಲ್ಕೊತಾದಲ್ಲಿ ದರಗಳು 48ರಿಂದ 53 ಪೈಸೆಗೆ ಏರಿಕೆಯಾಗಿದೆ.

ಕಳೆದ ವರ್ಷದ ಅಕ್ಟೋಬರ್‌ನಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಸಾರ್ವತ್ರಿಕ ದಾಖಲೆ ಮಟ್ಟಕ್ಕೆ ಏರಿಕೆಯಾಗಿದ್ದವು. ಆಗ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರ ಬ್ಯಾರೆಲ್‌ಗೆ 86 ಡಾಲರ್‌ಗೆ ಮುಟ್ಟಿತ್ತು. ಆದರೆ, ಇತ್ತೀಚಿನ ದಿನಗಳಲ್ಲಿ ಶೇ.30ರಷ್ಟು ದರ ಕುಸಿದಿತ್ತು. ಈ ಪರಿಣಾಮ ದೇಶದಲ್ಲೂ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಇಳಿಕೆಯಾಗಿದ್ದವು.

ಕಳೆದ ತಿಂಗಳು ಕಚ್ಚಾ ತೈಲವು ಬ್ಯಾರೆಲ್‌ಗೆ 50 ಡಾಲರ್‌ಗೆ ಕುಸಿದಿದ್ದು, ಕಳೆದ ವಾರಾಂತ್ಯದಲ್ಲಿ 62 ಡಾಲರ್‌ಗೆ ಏರಿದೆ. ಇದೀಗ, ಒಪೆಕ್‌ ನೇತೃತ್ವದ ರಾಷ್ಟ್ರಗಳು ಇಂಧನ ಉತ್ಪಾದನೆ ಕಡಿಮೆ ಮಾಡಲು ನಿರ್ಧರಿಸಿದ್ದು, ಈ ಪರಿಣಾಮ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಮುಂದಿನ ದಿನಗಳಲ್ಲಿ ಇನ್ನಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ.