ಪೆಟ್ರೋಲ್‌ ದರ ನವೆಂಬರ್‌ನಲ್ಲಿ 5 ರೂ. ಇಳಿಕೆ

ಹೊಸದಿಲ್ಲಿ: ಇಂಧನ ದರಗಳ ಇಳಿಕೆ ಮುಂದುವರಿದಿದ್ದು, ನವೆಂಬರ್‌ ತಿಂಗಳಲ್ಲಿ ಈ ತನಕ ಪೆಟ್ರೋಲ್‌ ದರ 5 ರೂ. ಇಳಿಕೆಯಾಗಿದೆ. ಡೀಸೆಲ್‌ ದರ 4.30 ರೂ. ಕಡಿಮೆಯಾದಂತೆ ಆಗಿದೆ. ಇಂಧನ ದರ ಇಳಿಕೆಯಾಗುತ್ತಿರುವುದರಿಂದ ಗ್ರಾಹಕರು ನಿರಾಳಗೊಂಡಿದ್ದಾರೆ. ದೇಶದ ಆರ್ಥಿಕತೆ ವೃದ್ಧಿಗೆ ಮತ್ತು ಹಣದುಬ್ಬರ ನಿಯಂತ್ರಣಕ್ಕೆ ಸದ್ಯದ ಪರಿಸ್ಥಿತಿ ಅನುಕೂಲಕರವಾಗಿದೆ.

ಭಾನುವಾರ ಪೆಟ್ರೋಲ್‌ ದರ ಲೀಟರ್‌ಗೆ 40 ಪೈಸೆ ಇಳಿಕೆಯಾಗಿದೆ. ರಾಜಧಾನಿ ಹೊಸದಿಲ್ಲಿಯಲ್ಲಿ ಪೆಟ್ರೋಲ್‌ ದರ ರೂ.74.84ಕ್ಕೆ ಕುಸಿದಿದೆ. ಇತ್ತ ಡೀಸೆಲ್‌ ದರ 45 ಪೈಸೆ ಕಡಿಮೆಯಾಗಿದ್ದು, ದಿಲ್ಲಿಯಲ್ಲಿ 70ರ ಮಟ್ಟಕ್ಕಿಂತ ಕೆಳಗಿಳಿದಿದೆ(ರೂ.69.70).

ಬೆಂಗಳೂರಿನಲ್ಲಿ ಪೆಟ್ರೋಲ್‌ ದರ ರೂ.75.43, ಡೀಸೆಲ್‌ ದರ ರೂ.70.07ಕ್ಕೆ ಇಳಿಕೆಯಾಗಿದೆ. ಸದ್ಯದ ಜಾಗತಿಕ ಪರಿಸ್ಥಿತಿಯನ್ನು ಗಮನಿಸಿದರೆ, ಇಂಧನ ದರ ಇನ್ನಷ್ಟು ದಿನ ಇಳಿಕೆಯ ಹಾದಿಯಲ್ಲೇ ಇರಲಿದೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರ ಕುಸಿಯುತ್ತಿದ್ದು, ಬ್ಯಾರೆಲ್‌ಗೆ 3.34 ಡಾಲರ್‌ ಅಥವಾ ಶೇ.5.3 ಕಡಿಮೆಯಾಗಿದ್ದು 59.25 ಡಾಲರ್‌ಗೆ ಇಳಿಕೆಯಾಗಿದೆ. 2017ರ ಅಕ್ಟೋಬರ್‌ನಿಂದ ಈ ತನಕದ ಕನಿಷ್ಠ ಮಟ್ಟ ಇದಾಗಿದೆ.

ಜಾಗತಿಕ ಪ್ರಮಾಣದಲ್ಲಿ ತೈಲದ ಉತ್ಪಾದನೆ ಹೆಚ್ಚಿದ್ದು, ದರ ಇಳಿಕೆಗೆ ಕಾರಣವಾಗಿದೆ. ದರ ಕುಸಿತ ತಡೆಯಲು ಉತ್ಪಾದನೆ ತಗ್ಗಿಸಿ ಪೂರೈಕೆ ಕಡಿಮೆಗೊಳಿಸಲು ತೈಲ ಉತ್ಪಾದಕ ದೇಶಗಳು ಚಿಂತನೆ ನಡೆಸಿವೆ. ಡಿ.6ರ ಸಭೆ ಬಳಿಕ ಕಚ್ಚಾ ತೈಲದ ಉತ್ಪಾದನೆಯನ್ನು ಒಪೆಕ್‌ ಕಡಿತಗೊಳಿಸುವ ನಿರೀಕ್ಷೆ ಇದೆ.

ಆರ್‌ಬಿಐ ಬಡ್ಡಿ ದರ ಯಥಾಸ್ಥಿತಿ ಸಂಭವ
ಕಚ್ಚಾ ತೈಲದ ದರ ಇಳಿಕೆಯಾಗುತ್ತಿದ್ದು, ಡಾಲರ್‌ ಎದುರು ಕುಸಿದಿದ್ದ ರೂಪಾಯಿ ದರವೂ ಸ್ಥಿರವಾಗುತ್ತಿದೆ. ಈ ಪರಿಣಾಮ, ಮಾರ್ಚ್‌ ತನಕ ತನ್ನ ಬಡ್ಡಿ ದರವನ್ನು(ರೆಪೊ ದರ) ಆರ್‌ಬಿಐ ಯಥಾಸ್ಥಿತಿಯಲ್ಲಿ ಮುಂದುವರಿಸುವ ಸಾಧ್ಯತೆ ಇದೆ ಎಂದು ವಿತ್ತ ತಜ್ಞರು ವಿಶ್ಲೇಷಿಸಿದ್ದಾರೆ.