ಕೇರಳದಲ್ಲಿ ಬಿಯರ್‌ ಮೇಲೆ ಪ್ರವಾಹ ಸೆಸ್‌!

ತಿರುವನಂತಪುರ: ಕೇರಳದಲ್ಲಿ ಪ್ರವಾಹ ನಂತರದ ಪ್ರಥಮ ಬಜೆಟ್‌ ಮಂಡನೆಯಾಗಿದ್ದು, ಬಿಯರ್‌ ಮತ್ತು ಸಿನಿಮಾ ಟಿಕೆಟ್‌ ಮೇಲೆ ಹೆಚ್ಚುವರಿ 'ಪ್ರವಾಹ ಸೆಸ್‌' ವಿಧಿಸಲಾಗಿದೆ.

ಪ್ರವಾಹ ನಂತರದ ನಷ್ಟ ಸರಿದೂಗಿಸಲು ಹೆಣಗುತ್ತಿರುವ ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ನೇತೃತ್ವದ ಎಡರಂಗ ಸರಕಾರ, ಬಿಯರ್‌ ಮತ್ತು ಸಿನಿಮಾ ಟಿಕೆಟ್‌ ಅನ್ನು ಸಂಪನ್ಮೂಲ ಕ್ರೋಡೀಕರಣದ ಆಯ್ಕೆಯನ್ನಾಗಿ ಮಾಡಿಕೊಂಡಿದೆ.

'ಪ್ರವಾಹದಿಂದ ರಾಜ್ಯಕ್ಕೆ ಅಪಾರ ನಷ್ಟ ಉಂಟಾಗಿದೆ. ಮರು ನಿರ್ಮಾಣಕ್ಕೆ 1000 ಕೋಟಿ ರೂ.ಗಳ ಅಗತ್ಯ ಇದ್ದು, ವಿಲಾಸಿ ಸಾಧನಗಳ ಮೇಲೆ ಹೆಚ್ಚುವರಿ ಸೆಸ್‌ ವಿಧಿಸುವುದು ಅನಿವಾರ್ಯವಾಯಿತು' ಎಂದು ರಾಜ್ಯ ಹಣಕಾಸು ಸಚಿವ ಟಿ.ಕೆ.ಥಾಮಸ್‌ ಐಸಾಕ್‌ ಸಮರ್ಥನೆ ನೀಡಿದ್ದಾರೆ.

ಬಿಯರ್‌ ಮತ್ತು ವೈನ್‌ ಸೇರಿದಂತೆ ಎಲ್ಲಾ ರೀತಿಯ ವಿದೇಶಿ ಮದ್ಯದ ಮೇಲಿನ ತೆರಿಗೆ ಶೇ.2ರಷ್ಟು ಹೆಚ್ಚಿಸಲಾಗಿದೆ. ಸಿನಿಮಾ ಟಿಕೆಟ್‌ ಮೇಲೆ ಶೇ.10ರ ವರೆಗೆ ಹೆಚ್ಚಿನ ತೆರಿಗೆ ಸಂಗ್ರಹಿಸಲು ಸ್ಥಳೀಯ ಆಡಳಿತ ಮಂಡಳಿಗೆ ಅವಕಾಶ ನೀಡಿದೆ.