ಪ್ಲಾಸ್ಟಿಕ್‌ ವೇಸ್ಟ್‌ನಿಂದ ಡೀಸೆಲ್‌ ಉತ್ಪಾದನೆ

ಡೆಹ್ರಾಡೂನ್‌: ಪ್ಲಾಸ್ಟಿಕ್‌ ತ್ಯಾಜ್ಯದಿಂದ ಡೀಸೆಲ್‌ ಉತ್ಪಾದಿಸುವ ಘಟಕಕ್ಕೆ ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಹರ್ಷ ವರ್ಧನ್‌ ಅವರು ಮಂಗಳವಾರ ಚಾಲನೆ ನೀಡಿದ್ದಾರೆ.

ಒಂದು ಟನ್‌ ಪ್ಲಾಸ್ಟಿಕ್‌ ತ್ಯಾಜ್ಯದಿಂದ 800 ಲೀಟರ್‌ ಡೀಸೆಲ್‌ ಉತ್ಪಾದಿಸಬಹುದಾಗಿದೆ. ಎನ್‌ಜಿಗಳ ನೆರವಿನಿಂದ ಪ್ಲಾಸ್ಟಿಕ್‌ ಸಂಗ್ರಹಿಸಲಾಗುತ್ತದೆ. ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಪೆಟ್ರೋಲಿಯಂನಲ್ಲಿ(ಐಐಪಿ) ಈ ಘಟಕ ರೂಪುಗೊಂಡಿದ್ದು, ಇದಕ್ಕೆ ಶ್ರಮಿಸಿದ ಐಐಪಿ ವಿಜ್ಞಾನಿಗಳನ್ನು ಸಚಿವರು ಅಭಿನಂದಿಸಿದ್ದಾರೆ. ವರ್ಷಾನುಗಟ್ಟಲೇ ಸಂಶೋಧನೆ ಬಳಿಕ ಪ್ಲಾಸ್ಟಿಕ್‌ ತ್ಯಾಜ್ಯದಿಂದ ಡೀಸೆಲ್‌ ಕಂಡು ಹಿಡಿಯುವ ತಂತ್ರಜ್ಞಾನವನ್ನು ಅಭಿವೃದ್ಧಿ ಪಡಿಸಲಾಗಿದೆ.

''ಪ್ಲಾಸ್ಟಿಕ್‌ ತ್ಯಾಜ್ಯದಿಂದ ಹೆಚ್ಚಿನ ಡೀಸೆಲ್‌ ಉತ್ಪಾದನೆ ಮಾಡಬಹುದಾಗಿದೆ. ಪೆಟ್ರೋಲಿಯಂ ಉತ್ಪನ್ನಗಳಿಗಾಗಿ ಭಾರತವು ಇತರೆ ದೇಶಗಳ ಮೇಲೆ ಅವಲಂಬಿತವಾಗಿದ್ದು, ಈ ಘಟಕದಿಂದ ಅವಲಂಬನೆ ತುಸು ತಗ್ಗಲಿದೆ. ಪ್ಲಾಸ್ಟಿಕ್‌ ನಿರ್ವಹಣೆಗೂ ಉತ್ತಮ ಮಾರ್ಗ ಸಿಕ್ಕಿದಂತಾಗಿದೆ,'' ಎಂದು ಹರ್ಷ ವರ್ಧನ್‌ ಹೇಳಿದ್ದಾರೆ.