ಭಾರತದ ಆರ್ಥಿಕತೆ ಶೀಘ್ರ 5 ಲಕ್ಷ ಕೋಟಿ ಡಾಲರ್‌!

ಸೋಲ್‌: ಭಾರತದ ಆರ್ಥಿಕತೆಯ ಬುನಾದಿ ಪ್ರಬಲವಾಗಿದ್ದು, ದೇಶ ಶೀಘ್ರದಲ್ಲಿಯೇ 5 ಲಕ್ಷ ಕೋಟಿ ಡಾಲರ್‌ ಗಾತ್ರದ ಆರ್ಥಿಕತೆಯಾಗಲಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.

ದಕ್ಷಿಣ ಕೊರಿಯಾದಲ್ಲಿ ಹೂಡಿಕೆದಾರರನ್ನು ಉದ್ದೇಶಿಸಿ ಮಾತನಾಡಿದ ಅವರು, ಭಾರತ ಈಗ ಹೂಡಿಕೆದಾರರ ಸ್ವರ್ಗ ಎಂದು ಬಣ್ಣಿಸಿದರು.

'' ಜಗತ್ತಿನಲ್ಲಿ ಯಾವುದೇ ಬೃಹತ್‌ ರಾಷ್ಟ್ರ ಭಾರತದಂತೆ ಪ್ರತಿ ವಬರ್ಷ ಸರಾಸರಿ 7ಕ್ಕಿಂತ ಹೆಚ್ಚು ದರದ ಆರ್ಥಿಕ ಬೆಳವಣಿಗೆ ದಾಖಲಿಸುತ್ತಿಲ್ಲ'' ಎಂದರು.

ಭಾರತದಲ್ಲಿ ದಕ್ಷಿಣ ಕೊರಿಯಾದ ಹುಂಡೈ, ಸ್ಯಾಮ್‌ಸಂಗ್‌ ಮತ್ತು ಎಲ್‌ಜಿ ಎಲೆಕ್ಟ್ರಾನಿಕ್ಸ್‌ ಸೇರಿದಂತೆ 600ಕ್ಕೂ ಹೆಚ್ಚು ಕಂಪನಿಗಳು ಈಗಾಗಲೆ ಬಂಡವಾಳ ಹೂಡಿಕೆ ಮಾಡಿವೆ. ಮತ್ತಷ್ಟು ಕಂಪನಿಗಳಿಗೆ ಹಾಗೂ ಹೂಡಿಕೆದಾರರನ್ನು ನಾವು ಸ್ವಾಗತಿಸುತ್ತಿದ್ದೇವೆ ಎಂದು ಪ್ರಧಾನಿ ತಿಳಿಸಿದರು.

ಬಿಸಿನೆಸ್‌ ಭೇಟಿ ಸುಗಮಗೊಳಿಸಲು ಕಳೆದ ವರ್ಷದಿಂದ ದಕ್ಷಿಣ ಕೊರಿಯಾದ ಜನತೆಗೆ, ಕ್ಷಿಪ್ರ ಗತಿಯಲ್ಲಿ ವೀಸಾ ವ್ಯವಸ್ಥೆ ಕಲ್ಪಿಸಲಾಗುತ್ತಿದೆ. ಜಿಎಸ್‌ಟಿ ಹಾಗೂ ವಿದೇಶಿ ಹೂಡಿಕೆಗೆ ಮತ್ತಷ್ಟು ಕ್ಷೇತ್ರಗಳನ್ನು ತೆರೆದಿರುವುದರಿಂದ ವಿಶ್ವಬ್ಯಾಂಕ್‌ನ ಬಿಸಿನೆಸ್‌ ಸ್ನೇಹಿ ರಾರ‍ಯಂಕಿಂಗ್‌ನಲ್ಲೂ ಭಾರತ 77ಕ್ಕೆ ಏರಿದೆ. ಮುಂದಿನ ವರ್ಷ 50 ರೊಳಗೆ ಬರುವ ನಿರೀಕ್ಷೆ ಇದೆ ಎಂದರು.

ದಕ್ಷಿಣ ಕೊರಿಯಾದ ಮಾಹಿತಿ ತಂತ್ರಜ್ಞಾನ ಅಭಿವೃದ್ಧಿ ಸಂಸ್ಥೆಯು ಬೆಂಗಳೂರಿನಲ್ಲಿ ಕಚೇರಿ ತೆರೆದಿದೆ. ಭಾರತ-ಕೊರಿಯಾ ಸ್ಟಾರ್ಟಪ್‌ ಸೆಂಟರ್‌ ಆರಂಭವಾಗಲಿದೆ ಎಂದು ಪ್ರಧಾನಿ ಮೋದಿ ತಿಳಿಸಿದ್ದಾರೆ.