ಪಿಎಂಸಿ ಬ್ಯಾಂಕನ್ನು ಯುನಿಟಿ ಸ್ಮಾಲ್‌ ಫೈನಾನ್ಸ್‌ ಬ್ಯಾಂಕ್‌ ಜತೆ ವಿಲೀನಕ್ಕೆ ಸಿದ್ಧತೆ

ಹೊಸದಿಲ್ಲಿ: ಪಂಜಾಬ್‌ ಆ್ಯಂಡ್‌ ಮಹಾರಾಷ್ಟ್ರ ಕೋಪರೇಟಿವ್‌ ಬ್ಯಾಂಕ್‌ ಅನ್ನು ದಿಲ್ಲಿ ಮೂಲದ ಯುನಿಟಿ ಸ್ಮಾಲ್‌ ಫೈನಾನ್ಸ್‌ ಬ್ಯಾಂಕ್‌ (ಯುಎಸ್‌ಎಫ್‌ಬಿ) ಜತೆಗೆ ವಿಲೀನಗೊಳಿಸಲು ಸಿದ್ಧತೆ ನಡೆಯುತ್ತಿದೆ. ಸರಕಾರದ ಅನುಮತಿ ಲಭಿಸಿದರೆ ಪ್ರಕ್ರಿಯೆ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ.

ಬ್ಯಾಂಕ್‌ಗಳ ವಿಲೀನ ಪ್ರಕ್ರಿಯೆಯ ನಾನಾ ಆಯಾಮಗಳನ್ನು ಪರಿಶೀಲಿಸಲಾಗುವುದು. ಸರಕಾರ ತನ್ನ ಸಲಹೆಗಳನ್ನು ಸಲ್ಲಿಸಲಿದೆ ಎಂದು ಆರ್‌ ಬಿಐ ಮೂಲಗಳು ತಿಳಿಸಿವೆ.

ಕಳೆದ 2019ರ ಸೆಪ್ಟೆಂಬರ್‌ನಲ್ಲಿಆರ್‌ಬಿಐ ಪಿಎಂಸಿ ಬ್ಯಾಂಕ್‌ ಅನ್ನು ಸೂಪರ್‌ಸೀಡ್‌ ಮಾಡಿತ್ತು. ರಿಯಾಲ್ಟಿ ಡೆವಲಪರ್‌ ಎಚ್‌ಡಿಐಎಲ್‌ಗೆ ನೀಡಿದ್ದ ಸಾಲದ ಪ್ರಕರಣದಲ್ಲಿ ಅವ್ಯವಹಾರಗಳು ನಡೆದಿರುವುದು ವರದಿಯಾಗಿತ್ತು. ನಂತರ ಆರ್‌ ಬಿಐ, ಬ್ಯಾಂಕಿನ ಠೇವಣಿದಾರರ ಹಿತಾಸಕ್ತಿ ದೃಷ್ಟಿಯಿಂದ ಅಗತ್ಯ ಕ್ರಮಗಳನ್ನು ಜರುಗಿಸಿತ್ತು. ಠೇವಣಿಗಳ ಹಿಂತೆಗೆತಕ್ಕೆ ನಿರ್ಬಂಧಗಳನ್ನು ವಿಧಿಸಿತ್ತು. ಡಿಸೆಂಬರ್‌ ತನಕ ವಿಸ್ತರಿಸಿದ್ದ ನಿರ್ಬಂದಗಳನ್ನು 2022ರ ಮಾರ್ಚ್ ತನಕ ಮುಂದುವರಿಸಿದೆ.

ಬ್ಯಾಂಕಿಂಗ್‌ ನಿಯಂತ್ರಕ ಕಾಯಿದೆಯ ಪ್ರಕಾರ, ಬ್ಯಾಂಕ್‌ ಗಳ ವಿಲೀನಕ್ಕೆ ಸರಕಾರದ ಅನುಮೋದನೆಯ ಅಗತ್ಯ ಇದೆ. ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ವಿಲೀನದ ಕರಡು ಯೋಜನೆಯನ್ನು ರೂಪಿಸಿತ್ತು. ಹಾಗೂ ಕಳೆದ ನವೆಂಬರ್‌ 22ರಂದು ಸಾರ್ವಜನಿಕರ ಅಹವಾಲು ಸ್ವೀಕೃತಿಗೆ ಮುಂದಿಟ್ಟಿತ್ತು. ಡಿಸೆಂಬರ್‌ 10ರ ತನಕ ಅಹವಾಲು ಸಲ್ಲಿಸಲು ಅವಕಾಶ ನೀಡಲಾಗಿತ್ತು.

ಆರ್‌ ಬಿಐ ಪ್ರಕಾರ ಸಣ್ಣ ಹಣಕಾಸು ಬ್ಯಾಂಕ್‌ ಸ್ಥಾಪನೆಗೆ 200 ಕೋಟಿ ರೂ. ಬಂಡವಾಳದ ಅಗತ್ಯ ಇದೆ. ಆದರೆ ಯುಎಸ್‌ಎಫ್‌ಬಿಗೆ 1,100 ಕೋಟಿ ರೂ. ಬಂಡವಾಳ ಇದೆ. ಹೀಗಾಗಿ ಬಂಡವಾಳದ ಅರ್ಹತೆ ಇದೆ.