ಅಚ್ಚರಿಯ ಲಾಭ ದಾಖಲಿಸಿದ ಪಿಎನ್‌ಬಿ!

ಹೊಸದಿಲ್ಲಿ: ತೀವ್ರ ನಷ್ಟದ ಹೊರೆ ಹೊತ್ತಿದ್ದ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌(ಪಿಎನ್‌ಬಿ) ಇದೇ ಮೊದಲ ಬಾರಿಗೆ ಲಾಭ ದಾಖಲಿಸಿದೆ. ಅಕ್ಟೋಬರ್‌-ಡಿಸೆಂಬರ್‌ ತ್ರೈಮಾಸಿಕದಲ್ಲಿ ಅಚ್ಚರಿ ಎಂಬಂತೆ ಬ್ಯಾಂಕ್‌ನ ನಿವ್ವಳ ಲಾಭ ಶೇ.7.12 ಏರಿಕೆಯಾಗಿದ್ದು, 246.51 ಕೋಟಿ ರೂ. ಇದೆ. ಎರಡನೇ ತ್ರೈಮಾಸಿಕದಲ್ಲಿ 4,532 ಕೋಟಿ ರೂ. ನಿವ್ವಳ ನಷ್ಟವನ್ನು ದಾಖಲಿಸಿತ್ತು.

ದೇಶದ ಎರಡನೇ ಬೃಹತ್‌ ಸರಕಾರಿ ಸ್ವಾಮ್ಯದ ಬ್ಯಾಂಕ್‌ ಆದ ಪಿಎನ್‌ಬಿ, ಮೂರನೇ ತ್ರೈಮಾಸಿಕ ಅವಧಿಯಲ್ಲಿ ನಿವ್ವಳ ನಷ್ಟ ದಾಖಲಿಸಲಿದೆ ಎನ್ನುವ ವಿಶ್ಲೇಷಕರ ಲೆಕ್ಕಾಚಾರಗಳು ಹುಸಿಯಾಗಿವೆ. ವಸೂಲಾಗದ ಸಾಲಗಳನ್ನು(ಎನ್‌ಪಿಎ) ನಿಭಾಯಿಸಲು ತೆಗೆದಿರಿಸಲಾಗುತ್ತಿದ್ದ ಮೊತ್ತವನ್ನು ಗಣನೀಯವಾಗಿ ಕಡಿಮೆ ಮಾಡಿರುವುದು ಬ್ಯಾಂಕ್‌ನ ನಿವ್ವಳ ಲಾಭಕ್ಕೆ ಕಾರಣ. ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ನಲ್ಲಿ ನೀರವ್‌ ಮೋದಿ ನಡೆಸಿದ್ದ 14,356 ಕೋಟಿ ರೂ. ಮೊತ್ತದ ಹಗರಣವು, ಬ್ಯಾಂಕ್‌ ಅನ್ನು ನಷ್ಟದ ಹಾದಿಗೆ ತಿರುಗಿಸಿತ್ತು.

ಈ ತ್ರೈಮಾಸಿಕದಲ್ಲಿ ಎನ್‌ಪಿಎ ನಿಭಾಯಿಸಲು 2,565 ಕೋಟಿ ರೂ. ತೆಗೆದಿರಿಸಲಾಗಿದೆ. ಅದರ ಹಿಂದಿನ ತ್ರೈಮಾಸಿಕದಲ್ಲಿ 7,733 ಕೋಟಿ ರೂ. ತೆಗೆದಿರಿಸಲಾಗಿದ್ದು, ಇದಕ್ಕೆ ಹೋಲಿಸಿದರೆ ಶೇ.67ರಷ್ಟು ಕಡಿಮೆ ಮಾಡಲಾಗಿದೆ.

''ಬ್ಯಾಂಕ್‌ನ ಸಾಲ ವಸೂಲಾತಿ ಪ್ರಕ್ರಿಯೆ ಉತ್ತಮವಾಗಿದೆ. ಬ್ಯಾಂಕ್‌ ಮತ್ತೆ ಪ್ರಗತಿಯ ಹಳಿಗೆ ಮರಳಿದೆ,'' ಎಂದು ಬ್ಯಾಂಕ್‌ನ ಸಿಇಒ ಸುನಿಲ್‌ ಮೆಹ್ತಾ ಹೇಳಿದ್ದಾರೆ.