1,019 ಕೋಟಿ ಲಾಭದೊಂದಿಗೆ ನಷ್ಟದ ಹಳಿ ಬದಲಿಸಿದ ಪಿಎನ್‌ಬಿ

ಹೊಸದಿಲ್ಲಿ : ನೀರವ್‌ ಮೋದಿ ವಂಚನೆ ಮತ್ತು ವಸೂಲಾಗದ ಸಾಲದ ಹೊರೆ ಮತ್ತಿತರ ಕಾರಣಗಳಿಂದ ನಷ್ಟದ ಹೊರೆ ಹೊತ್ತಿದ್ದ ಸರಕಾರಿ ಸ್ವಾಮ್ಯದ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌(ಪಿಎನ್‌ಬಿ), ಮತ್ತೆ ಲಾಭದ ಹಳಿಗೆ ಮರಳಿದೆ. ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಬ್ಯಾಂಕ್‌ 1,018 ಕೋಟಿ ರೂ. ನಿವ್ವಳ ಲಾಭ ದಾಖಲಿಸಿದೆ.

2018-19ರ ಏಪ್ರಿಲ್‌-ಜೂನ್‌ ಕೊನೆಯ ತ್ರೈಮಾಸಿಕದಲ್ಲಿ ಬ್ಯಾಂಕ್‌ 940 ಕೋಟಿ ರೂ. ನಿವ್ವಳ ನಷ್ಟವನ್ನು ದಾಖಲಿಸಿತ್ತು. ಮಾರ್ಚ್‌ಗೆ ಅಂತ್ಯವಾದ ಕಳೆದ ಹಣಕಾಸು ವರ್ಷದ ಕೊನೆಯ ತ್ರೈಮಾಸಿಕದಲ್ಲಿ ಬ್ಯಾಂಕ್‌ 4,749 ಕೋಟಿ ರೂ. ನಿವ್ವಳ ನಷ್ಟವನ್ನು ಹೊಂದಿತ್ತು.

ಜೂನ್‌ ತ್ರೈಮಾಸಿಕದಲ್ಲಿ ಬ್ಯಾಂಕ್‌ ಆದಾಯವು 15,161 ಕೋಟಿ ರೂ.ಗೆ ಏರಿಕೆಯಾಗಿತ್ತು. ಇದರ ಹಿಂದಿನ ಹಣಕಾಸು ವರ್ಷದ ಇದೇ ತ್ರೈಮಾಸಿಕದಲ್ಲಿ 15,072 ಕೋಟಿ ರೂ. ಆದಾಯ ಬಂದಿತ್ತು. ಪಿಎನ್‌ಬಿಯ ವಸೂಲಾಗದ ಸಾಲಗಳು(ಎನ್‌ಪಿಎ) ಜೂನ್‌ ಅಂತ್ಯಕ್ಕೆ ಶೇ.16.49ಕ್ಕೆ ಇಳಿಕೆಯಾಗಿದೆ. ಹಿಂದಿನ ಹಣಕಾಸು ವರ್ಷದ ಇದೇ ತ್ರೈಮಾಸಿಕದಲ್ಲಿ ಶೇ.18.26ರಷ್ಟು ಎನ್‌ಪಿಎ ಇತ್ತು.