ಹುಬ್ಬಳ್ಳಿಗೆ ಬಂತು ಪಾಲಿಫೈಬರ್‌ ಸಿಲಿಂಡರ್‌

ವಿಜಯಕುಮಾರ ಪೂಜಾರಿ

ಹುಬ್ಬಳ್ಳಿ: ಅನೇಕ ಬಾರಿ ಮನೆಯ ಅಡುಗೆ ಸಿಲಿಂಡರ್‌ ಸ್ಫೋಟಗೊಂಡು ಪ್ರಾಣ ಹಾಗೂ ಆಸ್ತಿಪಾಸ್ತಿ ಹಾನಿಯಾದ ಘಟನೆ ಮತ್ತು ವರದಿಗಳನ್ನು ನಾವು ನೀವೆಲ್ಲ ನೋಡಿದ್ದೇವೆ, ಕೇಳಿದ್ದೇವೆ. ಆದರೆ ಇನ್ನು ಮುಂದೆ ಅಂಥ ಅನಾಹುತಕ್ಕೆ ಬ್ರೇಕ್‌ ಬೀಳಲಿದೆ. ಅಡುಗೆ ಸಿಲಿಂಡರ್‌ ಸ್ಫೋಟದಂತಹ ಅನಾಹುತ ತಪ್ಪಿಸುವ ನಿಟ್ಟಿನಲ್ಲಿ 'ಸ್ಮಾರ್ಟ್‌ ಆ್ಯಂಡ್‌ ಸೇಫ್‌' ಎಂಬ ಹೆಸರಿನ ಎಲ್‌ಪಿಜಿ ಪಾಲಿಫೈಬರ್‌ ಸಿಲಿಂಡರ್‌ ಹುಬ್ಬಳ್ಳಿಯ ಮಾರುಕಟ್ಟೆಗೆ ಬಂದಿದೆ.

ಅನಿಲ ಸೋರಿಕೆ ಹಾಗೂ ಬೆಂಕಿ ಅವಘಡದಂತಹ ದುರ್ಘಟನೆ ಸಂಭವಿಸಿದರೂ ಈ ಸಿಲಿಂಡರ್‌ ಸ್ಫೋಟಗೊಳ್ಳುವುದಿಲ್ಲ. ಬೆಂಕಿ ಹೊತ್ತಿದರೆ ಸಿಲಿಂಡರ್‌ ಉರಿದುಹೋಗಿ ಸಂಭವನೀಯ ಭಾರಿ ಅನಾಹುತ ತಪ್ಪಿಸುವುದು ಇದರ ವೈಶಿಷ್ಟ್ಯವಾಗಿದೆ. ಅಡುಗೆ ತಯಾರಿಸಲು ಹಾಗೂ ವಾಹನಕ್ಕೆ ಇಂಧನದಂತೆ ಬಳಸಲು ಸೇರಿದಂತೆ ವಿವಿಧ ನಮೂನೆಯಲ್ಲಿ ಈ ಪಾಲಿಫೈಬರ್‌ ಸಿಲಿಂಡರ್‌ಗಳು ಮಾರುಕಟ್ಟೆಯಲ್ಲಿ ಲಭ್ಯ ಇವೆ.

ವಿಶೇಷತೆಗಳು ಏನು?

ಪ್ಲಾಸ್ಟಿಕ್‌ ಪಾಲಿಮರ್‌ನಿಂದ ತಯಾರಾದ ಈ ನೂತನ ಸಿಲಿಂಡರ್‌ ತೂಕದಲ್ಲಿ ಅತ್ಯಂತ ಹಗುರವಾಗಿದೆ. ಗ್ರಾಹಕರಿಗೆ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಸಾಗಣೆ ಮಾಡಲು ಸರಳವಾಗಿದೆ. ಅವಘಡ ಸಂಭವಿಸಿದರೂ ಸಿಲಿಂಡರ್‌ ಸ್ಫೋಟಗೊಳ್ಳದ ಕಾರಣ ಪ್ರಾಣ ಹಾನಿ ಹಾಗೂ ಆಸ್ತಿ ಪಾಸ್ತಿ ನಷ್ಟ ತಡೆಯಬಹುದಾಗಿದೆ.