ಇಂಡಿಗೊ ಅಧ್ಯಕ್ಷ ಘೋಷ್‌ ರಾಜೀನಾಮೆ

ಹೊಸದಿಲ್ಲಿ: ಅಚ್ಚರಿಯ ಬೆಳವಣಿಗೆಯಲ್ಲಿ ಇಂಡಿಗೊ ಏರ್‌ಲೈನ್ಸ್‌ ಅಧ್ಯಕ್ಷ ಆದಿತ್ಯ ಘೋಷ್‌ ಅವರಿಂದ ರಾಜೀನಾಮೆ ಪಡೆಯಲಾಗಿದ್ದು, ಹಂಗಾಮಿ ಸಿಇಒ ಆಗಿ ರಾಹುಲ್‌ ಭಾಟಿಯಾ ಅವರನ್ನು ನೇಮಕ ಮಾಡಲಾಗಿದೆ. ಅವರು ನಿರ್ದೇಶಕರಾಗಿಯೂ ಮುಂದುವರಿಯುವರು.

ಕಂಪನಿಯ ಆಡಳಿತ ಮಂಡಳಿ ಶುಕ್ರವಾರ ಸಭೆ ನಡೆಸಿ, ಘೋಷ್‌ ಅವರ ರಾಜೀನಾಮೆಯನ್ನು ಪಡೆದಿದ್ದು, ಜು.31ಕ್ಕೆ ಅನ್ವಯವಾಗುವಂತೆ ಅದನ್ನು ಅಂಗೀಕರಿಸಿದೆ ಎಂದು ಮೂಲಗಳು ತಿಳಿಸಿವೆ. ಘೋಷ್‌ ಅವರು ತಮ್ಮ ಪೂರ್ಣಾವಧಿಯ ನಿರ್ದೇಶಕ ಸ್ಥಾನಕ್ಕೂ ರಾಜೀನಾಮೆ ಸಲ್ಲಿಸಿದ್ದು, ಅದು ತಕ್ಷಣದಿಂದಲೇ ಜಾರಿಗೆ ಬಂದಿದೆ.

2008ರಿಂದ ಕಂಪನಿಯನ್ನು ನಿಭಾಯಿಸುತ್ತಿದ್ದ ಘೋಷ್‌ ವಿರುದ್ಧ ಇತ್ತೀಚೆಗೆ ದೂರು ಮತ್ತು ಅಸಮಾಧಾನಗಳು ವ್ಯಕ್ತವಾಗಿದ್ದವು. ತಾಂತ್ರಿಕ ಕಾರಣಗಳಿಂದ ಇಂಡಿಗೊ ವಿಮಾನಗಳ ಸಂಚಾರಕ್ಕೆ ತೊಡಕು ಮತ್ತು ಸಿಬ್ಬಂದಿಯ ದುರ್ನಡತೆ ಪ್ರಕರಣಗಳು ಹೆಚ್ಚಿದ್ದವು.

ದೇಶೀಯ ವಿಮಾನ ಸೇವೆಗಳ ಬೃಹತ್‌ ಕಂಪನಿಯಾಗಿ ಇಂಡಿಗೊ ಗುರ್ತಿಸಿಕೊಂಡಿದ್ದು, ಮಾರುಕಟ್ಟೆಯಲ್ಲಿ ಶೇ.40ರ ಪಾಲನ್ನು ಹೊಂದಿದೆ.