ಬ್ಯಾಂಕ್‌ ಸರ್ವರ್‌ಗೆ ಕನ್ನ: 2 ದಿನದಲ್ಲಿ 94 ಕೋಟಿ ರೂ. ಕಳವು

ಪುಣೆ: ಆನ್‌ಲೈನ್‌ ಬ್ಯಾಂಕಿಂಗ್‌ನಲ್ಲಿ ಇತ್ತೀಚೆಗೆ ವಂಚನೆ ಪ್ರಕರಣಗಳು ಹೆಚ್ಚುತ್ತಿವೆ. ಈ ಬೆನ್ನಲ್ಲಿಯೇ, ಪುಣೆ ಮೂಲದ ಕಾಸ್ಮಾಸ್‌ ಬ್ಯಾಂಕ್‌ನ ಸರ್ವರ್‌ಗೆ ಕನ್ನ ಹಾಕಿದ ಹ್ಯಾಕರ್‌ಗಳು 2 ದಿನಗಳಲ್ಲಿ 94 ಕೋಟಿ ರೂ. ದೋಚಿರುವ ಪ್ರಕರಣ ವರದಿಯಾಗಿದೆ. ಹ್ಯಾಕರ್‌ಗಳು ಅನೇಕರ ವೀಸಾ ಮತ್ತು ರುಪೇ ಡೆಬಿಟ್‌ ಕಾರ್ಡ್‌ಗಳ ವಿವರಗಳನ್ನು ಕದ್ದಿದ್ದಾರೆ.

ಕದ್ದ ಮಾಹಿತಿಗಳನ್ನು ಬಳಸಿದ ಹ್ಯಾಕರ್‌ಗಳು 28 ದೇಶಗಳಲ್ಲಿ ಆಗಸ್ಟ್‌ 11ರಂದು 78 ಕೋಟಿ ರೂ. ಮೌಲ್ಯದ ವ್ಯವಹಾರಗಳನ್ನು ನಡೆಸಿದ್ದಾರೆ. ಮತ್ತೆ ಆಗಸ್ಟ್‌ 13ರಂದು ಬ್ಯಾಂಕ್‌ನ ಸ್ವಿಫ್ಟ್‌ ವಹಿವಾಟಿನ ಸರ್ವರ್‌ ಮೇಲೆ ಮಾಲ್‌ವೇರ್‌ ದಾಳಿ ನಡೆಸಿ, 14.42 ಕೋಟಿ ರೂ. ಮೌಲ್ಯದ ಹಣವನ್ನು ಹಾಂಕಾಂಗ್‌ ಮೂಲದ ಕಂಪನಿಯೊಂದರ ಖಾತೆಗೆ ಜಮೆ ಮಾಡಿದ್ದಾರೆ. ಒಟ್ಟು 94.42 ಕೋಟಿ ರೂ. ಹಣವನ್ನು ಹ್ಯಾಕರ್‌ಗಳು ಕದ್ದಿದ್ದಾರೆ.

''ಕೆನಡಾದಿಂದ ಈ ಕೃತ್ಯ ನಡೆದಿರಬಹುದು. ಆರ್‌ಬಿಐ ಮತ್ತು ಆದಾಯ ತೆರಿಗೆ ಇಲಾಖೆ ತಂಡಗಳು ತನಿಖೆ ನಡೆಸಲಿವೆ,'' ಎಂದು ಕಾಸ್ಮಸ್‌ ಬ್ಯಾಂಕ್‌ನ ಅಧ್ಯಕ್ಷ ಮಿಲಿಂದ್‌ ಕಾಳೆ ತಿಳಿಸಿದ್ದಾರೆ. ಬ್ಯಾಂಕ್‌ನ ಐಟಿ ಭದ್ರತಾ ವ್ಯವಸ್ಥೆಯ ವೈಫಲ್ಯ ಕುರಿತ ಪ್ರಶ್ನೆಗೆ, ''ಎಲ್ಲ ಪ್ರಮುಖ ಬ್ಯಾಂಕ್‌ಗಳು ಬಳಸುವ ವ್ಯವಸ್ಥೆಯನ್ನೇ ನಾವೂ ಬಳಸುತ್ತಿದ್ದೇವೆ,'' ಎಂದಿದ್ದಾರೆ.

ಪುಣೆ ಮೂಲದ ಕಾಸ್ಮಾಸ್‌ ಸಹಕಾರಿ ಬ್ಯಾಂಕ್‌ ಭಾರತದ ಹಳೆಯ ನಗರ ಸಹಕಾರಿ ಬ್ಯಾಂಕುಗಳಲ್ಲಿ ಪ್ರಮುಖವಾದುದಾಗಿದೆ. 2006ರ ಜ.18ರಂದು ಶತಮಾನೋತ್ಸವವನ್ನು ಈ ಬ್ಯಾಂಕ್‌ ಆಚರಿಸಿಕೊಂಡಿತ್ತು.