ಮದ್ಯದ ಮೇಲೆ ಕೋವಿಡ್-19 ತೆರಿಗೆ: ಪಂಜಾಬ್ ಸರ್ಕಾರದ ನಿರ್ಣಯ!

ಚಂಡಿಗಢ: ಕೊರೊನಾ ವೈರಸ್ ನೀಡಿರುವ ಆರ್ಥಿಕ ಹೊಡೆತದಿಂದ ತಪ್ಪಿಸಿಕೊಳ್ಳಲು ಎಲ್ಲಾ ರಾಜ್ಯ ಸರ್ಕಾರಗಳೂ ಹೊಸ ಹೊಸ ಮಾರ್ಗಗಳನ್ನು ಅನ್ವೇಷಿಸುತ್ತಿವೆ.

ಕೇಂದ್ರ ಸರ್ಕಾರದ ವಿಶೇಷ ಪ್ಯಾಕೇಜ್ ಜೊತೆಗೆ ರಾಜ್ಯದಲ್ಲೂ ತೆರಿಗೆ ಸಂಗ್ರಹದ ಮೂಲಕ ಬೊಕ್ಕಸ ತುಂಬಿಸುವ ಕೆಲಸಕ್ಕೆ ಸರ್ಕಾರಗಳು ಕೈ ಹಾಕಿವೆ.

ಅದರಂತೆ ಪಂಜಾಬ್ ಸರ್ಕಾರ ರಾಜ್ಯದ ಖಜಾನೆ ಭರ್ತಿ ಮಾಡಲು ವಿನೂತನ ಕ್ರಮಕ್ಕೆ ಮೊರೆ ಹೋಗಿದ್ದು, ಮದ್ಯದ ಮೇಲೆ ಕೋವಿಡ್-19 ತೆರಿಗೆ ಹೇರಲು ಸಜ್ಜಾಗಿದೆ.


ಹೌದು, ಪಂಜಾಬ್‌ ಮುಖ್ಯಮಂತ್ರಿ ಕ್ಯಾ.ಅಮರೀಂದರ್ ಸಿಂಗ್ ನೇತೃತ್ವದ ರಾಜ್ಯ ಸರ್ಕಾರ, ಮದ್ಯ ಖರೀದಿ ಮೇಲೆ ಕೋವಿಡ್-19 ತೆರಿಗೆ ಹೇರುವ ನಿರ್ಣಯ ಕೈಗೊಂಡಿದೆ.

ವಿವಿಧ ಮದ್ಯದ ಪ್ರಕಾರಗಳ ಮೇಲೆ 2 ರೂ.ನಿಂದ 50 ರೂವರೆಗೆ ಕೋವಿಡ್-19 ತೆರಿಗೆ ಹೇರುವ ನಿರ್ಣಯ ಕೈಗೊಳ್ಳಲಾಗಿದ್ದು, ಹೆಚ್ಚುವರಿ 145 ಕೋಟಿ ರೂ.ಗಳನ್ನು ಸಂಗ್ರಹಿಸುವ ಗುರಿ ಹೊಂದಾಲಾಗಿದೆ.

ಜೂನ್ 1ರಿಂದಲೇ ಕೋವಿಡ್-19 ತೆರಿಗೆ ಜಾರಿಗೆ ಬರಲಿದ್ದು, ಎಲ್ಲಾ ಪ್ರಕಾರಗಳ ಮದ್ಯದ ಮೇಲೆ ವಿವಿಧ ರೂಪದ ತೆರಿಗೆ ಹೇರಲಾಗಿದೆ. ಇದು ರಾಜ್ಯದ ಆರ್ಥಿಕ ಸಮತೋಲನಕ್ಕೆ ಸಹಾಯಯಕಾರಿ ಎಂಬುದು ಸರ್ಕಾರದ ಸ್ಪಷ್ಟನೆಯಾಗಿದೆ.