ಕೋರಾ ವೆಬ್‍ಸೈಟ್ ಹ್ಯಾಕ್; 10 ಕೋಟಿ ಮಂದಿ ಡಾಟಾ ಗೋವಿಂದ

ಹೊಸದಿಲ್ಲಿ: ಪ್ರಮುಖ ಪ್ರಶ್ನೋತ್ತರ ವೆಬ್‍ಸೈಟ್ ಕೋರಾ ಹ್ಯಾಕ್ ಆಗಿದೆ. ಈ ವಿಷಯನ್ನು ಸ್ವತಃ ಕೋರಾ ಟ್ವಿಟರ್ ಮೂಲಕ ತಿಳಿಸಿದೆ. ಈ ಹಿನ್ನೆಲೆಯಲ್ಲಿ ಕೋರಾ ಖಾತಾದಾರರು ತಮ್ಮ ಪಾಸ್‍ವರ್ಡ್ ಬದಲಾಯಿಸಿಕೊಳ್ಳುವಂತೆ ಸೂಚಿಸಿದೆ.

ಅದೇ ರೀತಿ ಹ್ಯಾಕಿಂಗ್‍ಗೆ ಗುರಿಯಾಗಿರುವ ಬಳಕೆದಾರರಿಗೆ ವಿವರಗಳನ್ನು ನೀಡುತ್ತಿರುವುದಾಗಿ ತಿಳಿಸಿದೆ. ಸುಮಾರು 10 ಕೋಟಿ ಮಂದಿ ಬಳಕೆದಾರರ ಮಾಹಿತಿ ಕಳುವಾಗಿದೆ ಎಂದು ಕೋರಾ ವೆಬ್‌ಸೈಟ್ ತಿಳಿಸಿದೆ.

ನವೆಂಬರ್ 30ರಂದು ಈ 'malicious third party' ಗುರುತಿಸಿದೆವು, ಈ ಬಗ್ಗೆ ವಿಚಾರಣೆ ನಡೆಸುತ್ತಿದ್ದೇವೆ ವೆಬ್‍ಸೈಟ್ ತಿಳಿಸಿದ್ದು ಹೆಸರು, ಇಮೇಲ್ ವಿಳಾಸ, ಎನ್‌ಕ್ರಿಪ್ಟೆಡ್ ಪಾಸ್‌ವರ್ಡ್‌ಗಳು, ಲಿಂಕ್ಡ್ ನೆಟ್‌ವರ್ಕ್‌ನಲ್ಲಿ ರಿಪೋರ್ಟ್ ಮಾಡಿದ ಮಾಹಿತಿ ಜತೆಗೆ ಬಳಕೆದಾರರ ವೈಯಕ್ತಿಕ ವಿವರಗಳು ಸೋರಿಕೆಯಾಗಿದೆ ಎಂದು ಕಂಪೆನಿ ಸಿಇಒ ಆಡಮ್ ಡಿ ಎಂಜೆಲೊ ತನ್ನ ಬ್ಲಾಗ್‌ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ.


ಫೇಸ್‍ಬುಕ್ ಮಾಜಿ ಉದ್ಯೋಗಿಗಳಾದ ಆಡಮ್ ಡಿಎಂಜೆಲೊ, ಚಾರ್ಲಿ ಚೀವರ್ 2009ರಲ್ಲಿ ಕೋರಾ ವೆಬ್‍ಸೈಟನ್ನು ಹುಟ್ಟುಹಾಕಿದ್ದರು. ಸಾಮಾಜಿಕ ಮಾಧ್ಯಮ (ಫೇಸ್‍ಬುಕ್, ಟ್ವಿಟರ್, ವಾಟ್ಸ್‌ಆ್ಯಪ್‌) ಸೇರಿದಂತೆ ಹಲವು ಕ್ಷೇತ್ರಗಳಿಗೆ ಸಂಬಂಧಿಸಿದ ಪ್ರಶ್ನೆಗಳಿಗೆ ಉತ್ತರ ಸಿಗುವಂತೆ ಇದನ್ನು ವಿನ್ಯಾಸಪಡಿಸಲಾಗಿದೆ. ಅತಿ ಕಡಿಮೆ ಸಮಯದಲ್ಲಿ ಯುವ ಜನಾಂಗಕ್ಕೆ ಈ ವೆಬ್‍ಸೈಟ್‌ ತುಂಬಾ ಪ್ರಿಯವಾಗಿದೆ.