ರೈಲ್ವೆ ಪ್ರಯಾಣಕ್ಕೆ ಡಿಜಿಟಲ್‌ ಆಧಾರ್‌ ಸಾಕು

ಹೊಸದಿಲ್ಲಿ: ರೈಲ್ವೆ ಪ್ರಯಾಣದ ವೇಳೆ ಗುರುತು ದೃಢೀಕರಣದ ದಾಖಲೆಗಳನ್ನು(ಐಡಿ ಪ್ರೂಫ್‌) ಮರೆತು ಬಂದಿದ್ದೀರಾ? ಇನ್ನು ಮುಂದೆ ಚಿಂತೆ ಮಾಡುವ ಅಗತ್ಯವಿಲ್ಲ. ಐಡಿ ಪ್ರೂಫ್‌ ಆಗಿ ಡಿಜಿಟಲ್‌ ಆಧಾರ್‌ ಮತ್ತು ಡ್ರೈವಿಂಗ್‌ ಲೈಸೆನ್ಸ್‌ ಅನ್ನು ಬಳಸಬಹುದಾಗಿದೆ. ಡಿಜಿಲಾಕರ್‌ ಮೂಲಕ ಅವುಗಳನ್ನು ರೈಲ್ವೆ ಅಧಿಕಾರಿಗಳಿಗೆ ತೋರಿಸಬೇಕಾಗುತ್ತದೆ.

ಡಿಜಿಲಾಕರ್‌ನಲ್ಲಿನ ಈ ದಾಖಲೆಗಳನ್ನು ಐಡಿ ಪ್ರೂಫ್‌ ಆಗಿ ತೋರಿಸಲು ಅನುಕೂಲವಾಗುವಂತೆ ರೈಲ್ವೆ ಇಲಾಖೆ ಆದೇಶ ಹೊರಡಿಸಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರ ಡಿಜಿಟಲ್‌ ಇಂಡಿಯಾ ಯೋಜನೆಯಡಿ ಡಿಜಿ ಲಾಕರ್‌ ಸೌಲಭ್ಯವನ್ನು ನೀಡಲಾಗಿದ್ದು, ಸಾರ್ವಜನಿಕರು ತಮ್ಮ ಆಧಾರ್‌, ಡ್ರೈವಿಂಗ್‌ ಲೈಸೆನ್ಸ್‌ ಮತ್ತಿತರ ದಾಖಲೆಗಳನ್ನು ಸಂಗ್ರಹಿಸಿಟ್ಟುಕೊಳ್ಳಬಹುದು. ಅವುಗಳನ್ನು ಮೊಬೈಲ್‌ ಮತ್ತು ಕಂಪ್ಯೂಟರ್‌ ಮೂಲಕ ಅಗತ್ಯವಿದ್ದಾಗ ಬಳಸಬಹುದು.

ರೈಲ್ವೆ ಇಲಾಖೆಯ ಈ ನಿರ್ಧಾರದಿಂದಾಗಿ ಪ್ರಯಾಣಿಕರು ಕಾಗದದ ರೂಪದಲ್ಲಿನ ತಮ್ಮ ಗುರುತಿನ ದಾಖಲೆಗಳನ್ನು ಜತೆಯಲ್ಲಿ ಕೊಂಡೊಯ್ಯುವ ಅಗತ್ಯ ತಪ್ಪಲಿದೆ.
ಗಮನಿಸಿ
ಡಿಜಿ ಲಾಕರ್‌ನಲ್ಲಿರುವ ಆಧಾರ್‌ ಅಥವಾ ಡ್ರೈವಿಂಗ್‌ ಲೈಸೆನ್ಸ್‌ ಅನ್ನು ದೃಢೀಕರಣದ ಉದ್ದೇಶಕ್ಕೆ ರೈಲ್ವೆ ಅಧಿಕಾರಿಗಳಿಗೆ ಪ್ರಯಾಣಿಕರು ತೋರಿಸಬಹುದು. ಆದರೆ, ಆ ದಾಖಲೆಗಳು ಅಪ್‌ಲೋಡ್‌ ಸೆಕ್ಷನ್‌ನಲ್ಲಿ ಇದ್ದರೆ ರೈಲ್ವೆ ಇಲಾಖೆ ಪರಿಗಣಿಸುವುದಿಲ್ಲ.