ರೈಲ್ವೆ ಇಲಾಖೆಯ ಸೊಂಬೇರಿ ಸಿಬ್ಬಂದಿಗೆ ಗೇಟ್‌ಪಾಸ್‌

ಹೊಸದಿಲ್ಲಿ: ಸೊಂಬೇರಿ ಸಿಬ್ಬಂದಿಯನ್ನು ಮನೆಗೆ ಕಳಿಸಲು ಮುಂದಾಗಿರುವ ಭಾರತೀಯ ರೇಲ್ವೆ ಇಲಾಖೆ, 55 ವರ್ಷ ದಾಟಿದ ಅಥವಾ ಮುಂದಿನ ವರ್ಷ ಮೊದಲಾರ್ಧದ ವೇಳೆಗೆ 30 ವರ್ಷ ಸೇವಾವಧಿ ಪೂರೈಸುವ ಸಿಬ್ಬಂದಿಯ ಪಟ್ಟಿ ಸಲ್ಲಿಸುವಂತೆ ಹಿರಿಯ ಅಧಿಕಾರಿಗಳಿಗೆ ಸೂಚನೆ ನೀಡಿದೆ.

ಈ ಎರಡೂ ವಿಭಾಗಗಳಲ್ಲಿರುವ ಸೊಂಬೇರಿ ಅಥವಾ ಅಸಮರ್ಥರನ್ನು ಗುರುತಿಸಿ, ಅವರನ್ನು ಗೌರವಯುತವಾಗಿ ಮನೆಗೆ ಕಳಿಸಲು ಚಿಂತನೆ ನಡೆದಿದೆ. ಇವತ್ತಿನ ಅಗತ್ಯಕ್ಕೆ ತಕ್ಕಂತೆ ಸ್ಪರ್ಧಾತ್ಮಕವಾಗಿ ಕೆಲಸ ಮಾಡುವ ಸಾಮರ್ಥ್ಯ‌ ಇಲ್ಲದವರಿಗೆ ಅವಧಿ ಪೂರ್ವ ನಿವೃತ್ತಿ ನೀಡಲಾಗುವುದು ಎಂದು ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ. ಆಗಸ್ಟ್‌ 9ರ ಒಳಗೆ ಎಲ್ಲಾ ಸಿಬ್ಬಂದಿಯ ಸೇವಾ ವಿವರ ಸಲ್ಲಿಸಲು ಸೂಚಿಸಿ ಕಳೆದ ಜುಲೈ 27ರಂದು ವಲಯ ಕಚೇರಿಯ ಮುಖ್ಯಸ್ಥರಿಗೆ ಸುತ್ತೋಲೆ ಕಳಿಸಿಕೊಡಲಾಗಿದೆ.