ಹೊಸದಿಲ್ಲಿ: ದೇಶದ ಶ್ರೀಸಾಮಾನ್ಯರ ಜೀವನಾಡಿ ಎನಿಸಿರುವ ಭಾರತೀಯ ರೈಲ್ವೆಯ ಅಭಿವೃದ್ಧಿಗೆ ಬಾರಿಯ ಬಜೆಟ್‌ನಲ್ಲಿ 1.48 ಲಕ್ಷ ಕೋಟಿ ರೂ. ಅನುದಾನ ಮೀಸಲಿಡಲಾಗಿದ್ದು, ಆಧುನೀಕರಣಗೊಳಿಸುವತ್ತ ಚಿತ್ತ ಹರಿಸಲಾಗಿದೆ. ರೈಲ್ವೆ ಸಾಮರ್ಥ್ಯ ಬಲವರ್ಧನೆಯ ನಿಟ್ಟಿನಲ್ಲಿ ಹಳಿಗಳ ವಿದ್ಯುದೀಕರಣ, ಸಿಗ್ನಲಿಂಗ್‌ ವ್ಯವಸ್ಥೆಯ ಆಧುನೀಕರಣ, ಘರ್ಷಣೆ ತಡೆ ಬೋಗಿಗಳ ಹೆಚ್ಚಳ, ಫಾಗ್‌ ಸೇಫ್ಟಿ ಸೇರಿದಂತೆ ಹಲವು ಬಗೆಯ ಸುರಕ್ಷಾ ಸಾಧನಗಳ ಅಳವಡಿಕೆ, ಪ್ರಯಾಣಿಕ ಸ್ನೇಹಿ ಸೌಲಭ್ಯಗಳ ಹೆಚ್ಚಳ ಇತ್ಯಾದಿ ಸುಧಾರಣಾ ಕ್ರಮಗಳಿಗೆ ಆದ್ಯತೆ ಕೊಡಲಾಗಿದೆ.
3,600 ಕಿ.ಮೀ ಹಳಿಗಳ ನವೀಕರಣದ ಗುರಿಯನ್ನು ಪ್ರಸ್ತುತ ಆರ್ಥಿಕ ವರ್ಷದಲ್ಲಿ ಹೊಂದಲಾಗಿದೆ. ಮುಂದಿನ ಎರಡು ವರ್ಷಗಳಲ್ಲಿ 4267 ಮಾನವ ರಹಿತ ರೈಲ್ವೆ ಕ್ರಾಸಿಂಗ್‌ಗಳನ್ನು ತೆಗೆದುಹಾಕುವುದಾಗಿ ಬಜೆಟ್‌ನಲ್ಲಿ ಘೋಷಿಸಲಾಗಿದೆ. 600 ನಿಲ್ದಾಣಗಳಲ್ಲಿ ವೈ ಫೈ ಸೌಕರ್ಯ, ಪ್ರಯಾಣಿಕರ ಸುರಕ್ಷತೆಗೆ ಸಿಸಿಟಿವಿ ಕ್ಯಾಮೆರಾಗಳ ಅಳವಡಿಕೆ ಹಾಗೂ ದಿನವಹಿ ಪ್ರಯಾಣಿಕರೂ ಸೇರಿದಂತೆ 25,000ಕ್ಕಿಂತಲೂ ಹೆಚ್ಚಿನ ಜನದಟ್ಟಣೆ ಇರುವ ರೈಲ್ವೆ ನಿಲ್ದಾಣಗಳಲ್ಲಿ ಎಸ್ಕಲೇಟರ್‌ಗಳನ್ನು ನಿರ್ಮಿಸಲು ಉದ್ದೇಶಿಸಲಾಗಿದೆ. ಸಾಮರ್ಥ್ಯ ಹೆಚ್ಚಿಸಲು 18,00 ಕಿ.ಮೀ. ಹಳಿ ಮಾರ್ಗವನ್ನು ಜೋಡಿ ಹಳಿ ಮಾರ್ಗವಾಗಿ ಮೇಲ್ದರ್ಜೆಗೇರಿಸುವುದು ಹಾಗೂ 5000 ಕಿ.ಮೀ. ಮಾರ್ಗದ ಗೇಜ್‌ ಪರಿವರ್ತನೆಯ ಗುರಿ ಹೊಂದಲಾಗಿದೆ.
ವಡೋದರಾದಲ್ಲಿ ರೈಲ್ವೆ ವಿವಿ: 2017ರ ಸೆಪ್ಟೆಂಬರ್‌ 14ರಂದು ಮಹತ್ವಾಕಾಂಕ್ಷೆಯ ಮುಂಬಯಿ-ಅಹಮದಾಬಾದ್‌ ಬುಲೆಟ್‌ ರೈಲು ಯೋಜನೆಗೆ ಚಾಲನೆ ದೊರೆತಿದೆ. ಈ ಯೋಜನೆಯೂ ಸೇರಿದಂತೆ ಹೈ ಸ್ಪೀಡ್‌ ರೈಲ್ವೆ ಪ್ರಾಜೆಕ್ಟ್ಗಳ ಅನುಷ್ಠಾನಕ್ಕೆ ಅಗತ್ಯವಿರುವ ಮಾನವ ಸಂಪನ್ಮೂಲ ತರಬೇತಿಗೆ ವಡೋದರಾದಲ್ಲಿ ರೈಲ್ವೆ ವಿವಿ ಸ್ಥಾಪನೆ ಈ ವರ್ಷದಲ್ಲಿ ಪೂರ್ಣ ಪ್ರಮಾಣದಲ್ಲಿ ಜಾರಿಗೆ ತರುವ ಭರವಸೆಯನ್ನೂ ಬಜೆಟ್‌ನಲ್ಲಿ ನೀಡಲಾಗಿದೆ.
ಅತ್ಯಾಧುನಿಕ ಬೋಗಿಗಳ ಅಳವಡಿಕೆ: ಬರುವ ಹಣಕಾಸು ವರ್ಷದಲ್ಲಿ ಅತ್ಯಾಧುನಿಕ ಸೌಕರ್ಯಗಳಿರುವ ಬೋಗಿಗಳನ್ನು ಸರಕಾರ ಹಂತಹಂತವಾಗಿ ಪರಿಚಯಿಸಲಿದೆ. ಪೆರಂಬೂರಿನಲ್ಲಿರುವ ಇಂಟಿಗ್ರೇಟೆಡ್‌ ಕೋಚ್‌ ಫ್ಯಾಕ್ಟರಿಯಲ್ಲಿ ಬೋಗಿಗಳ ವಿನ್ಯಾಸ ಸಿದ್ಧಗೊಳ್ಳಲಿದೆ.
ಕರ್ನಾಟಕದ ವಿಶೇಷ
ಹೊಸ ಮಾರ್ಗ: ಗಂಗಾವತಿ-ಕಾರಟಗಿ (28 ಕಿ.ಮೀ.)
218.73 ಕಿ.ಮೀ ಉದ್ದದ 13 ಮಾರ್ಗಗಳ ಡಬ್ಲಿಂಗ್‌ ಯೋಜನೆ
ಬಬಲಾದ-ಕಲಬುರಗಿ (5.42 ಕಿ.ಮೀ)
ಬಿಂಕಿದಕಟ್ಟಿ-ಹುಲಿಕೋಟಿ (7.62 ಕಿ.ಮೀ)
ಗದಗ-ಬಿಂಕದಕಟ್ಟಿ (4.98 ಕಿ.ಮೀ)
ಗಾಣಗಾಪುರ ರಸ್ತೆ -ಹುಣಸಿಹಡಗಲಿ ( 6.58 ಕಿ.ಮೀ)
ಹರಳಾಪುರ-ಕಣಗಿನಹಾಳ (9.83 ಕಿ.ಮೀ)
ಹುಬ್ಬಳ್ಳಿ ದಕ್ಷಿಣ- ಸವಣೂರು (51 ಕಿ.ಮೀ)
ಹುಲುಕೋಟಿ-ಅಣ್ಣಿಗೇರಿ (10.06 ಕಿ.ಮೀ)
ಹುಣಸಿಹಡಗಲಿ-ಸವಳಗಿ (7.05 ಕಿ.ಮೀ)
ಕಣಗಿಹಾಳ-ಗದಗ (8.32 ಕಿ.ಮೀ)
ಕೊಪ್ಪಳ-ಗಿಣಗೇರಾ-ಮುನಿರಾಬಾದ್‌ (21.83 ಕಿ.ಮೀ)
ಸವಳಗಿ-ಬಬಲಾದ (7.58 ಕಿ.ಮೀ)
ತುಮಕೂರು-ಗುಬ್ಬಿ (18 ಕಿ.ಮೀ)
ಗುಲ್ಬರ್ಗ-ಅಕ್ಕಲಕೋಟೆ (60 ಕಿ.ಮೀ)
ಸರಕು ಸಾಗಣೆ ಕಾರಿಡಾರ್‌ ನಿರ್ಮಾಣ
ರೈಲ್ವೆ ಇಲಾಖೆ ಆದಾಯದ ಪ್ರಮುಖ ಮೂಲವಾಗಿರುವ ಸರಕು ಸಾಗಣೆ ವಹಿವಾಟು ಹೆಚ್ಚಳಕ್ಕೆ ಮಹತ್ವ ಕೊಡಲಾಗಿದ್ದು, 2018-19ನೇ ಸಾಲಿನಲ್ಲಿ ಅದನ್ನು ಇನ್ನಷ್ಟು ಮೇಲ್ಜರ್ಜೆಗೇರಿಸುವ ಗುರಿಯನ್ನು ಹೊಂದಲಾಗಿದೆ. ಪೂರ್ವ ಮತ್ತು ಪಶ್ಚಿಮ ವಲಯದಲ್ಲಿ ಪ್ರತ್ಯೇಕ ಸರಕು ಸಾಗಣೆ ಮಾರ್ಗ (ಡೆಡಿಕೇಟೆಡ್‌ ಫ್ರೈಟ್‌ ಕಾರಿಡಾರ್‌) ನಿರ್ಮಾಣ ಪ್ರಗತಿಯಲ್ಲಿದ್ದು, ಈ ವರ್ಷದಲ್ಲಿ ಇದಕ್ಕಾಗಿ 12,000 ವ್ಯಾಗನ್‌, 5160 ಬೋಗಿಗಳು ಹಾಗೂ ಅಂದಾಜು 700 ಲೋಕೋಮೋಟಿವ್‌ ಎಂಜಿನ್‌ಗಳು ಸೇವೆಗೆ ಸಿದ್ಧಗೊಳ್ಳಲಿವೆ.