ಆರ್ಥಿಕ ಅಪರಾಧಿಗಳ ವಿರುದ್ಧದ ವಿಧೇಯಕ ಅಂಗೀಕಾರ

ಹೊಸದಿಲ್ಲಿ : ಆರ್ಥಿಕ ಅಪರಾಧಿಗಳ ವಿರುದ್ಧದ ವಿಧೇಯಕವನ್ನು ಸಂಸತ್ತು ಅಂಗೀಕರಿಸಿದೆ. ವಿಜಯ್‌ ಮಲ್ಯ, ನೀರವ್‌ ಮೋದಿ ಮುಂತಾದವರು ಕಾನೂನುಕ್ರಮಗಳಿಂದ ನುಣುಚಿಕೊಳ್ಳಲು ವಿದೇಶಕ್ಕೆ ಪರಾರಿಯಾಗದಂತೆ ತಡೆಯಲು ವಿಧೇಯಕ ಸಹಕಾರಿಯಾಗಲಿದೆ.

ಘೋಷಿತ ಆರ್ಥಿಕ ಅಪರಾಧಿಗಳ ವಿಧೇಯಕ 2018 ರಾಜ್ಯಸಭೆಯಲ್ಲಿ ಧ್ವನಿಮತಗಳಿಂದ ಬುಧವಾರ ಅಂಗೀಕಾರವಾಯಿತು. ಜುಲೈ 19ರಂದು ಲೋಕಸಭೆಯಲ್ಲಿ ಅಂಗೀಕಾರವಾಗಿತ್ತು.

ದೇಶದಲ್ಲಿ ಅಕ್ರಮ ವ್ಯವಹಾರವೆಸಗಿ ವಿದೇಶಕ್ಕೆ ಪಲಾಯನ ಮಾಡುವವರ ಸಂಖ್ಯೆ ಹೆಚ್ಚುತ್ತಿದ್ದು, ಇದನ್ನು ತಡೆಯಲು ವಿಧೇಯಕದ ಅಗತ್ಯ ಇತ್ತು ಎಂದು ಹಣಕಾಸು ಖಾತೆ ಉಸ್ತುವಾರಿ ಸಚಿವ ಪಿಯೂಷ್‌ ಗೋಯಲ್‌ ತಿಳಿಸಿದರು.

100 ಕೋಟಿ ರೂ.ಗಿಂತ ಹೆಚ್ಚು ಮೊತ್ತದ ಆರ್ಥಿಕ ಅಪರಾಧಗಳು ಈ ವಿಧೇಯಕದ ಅಡಿಗೆ ಬರಲಿದೆ. ಸದ್ಯಕ್ಕೆ 55 ಘೋಷಿತ ಆರ್ಥಿಕ ಅಪರಾಧಿಗಳು ದೇಶವನ್ನು ತೊರೆದಿದ್ದಾರೆ. ತೆರಿಗೆ ವಂಚನೆ, ಸುಸ್ತಿ ಸಾಲ ಹಗರಣ, ಅಕ್ರಮ ಹಣ ವರ್ಗಾವಣೆ, ಬೇನಾಮಿ ಆಸ್ತಿ ಇತ್ಯಾದಿ ಆರೋಪಗಳನ್ನು ಎದುರಿಸುತ್ತಿದ್ದಾರೆ.