ಎನ್‌ಪಿಎ ಹೆಚ್ಚಿಸುತ್ತಿರುವ ಮುದ್ರಾ: ಆರ್‌ಬಿಐ ಎಚ್ಚರಿಕೆ

ಹೊಸದಿಲ್ಲಿ: ವಸೂಲಾಗದ ಸಾಲಗಳ(ಎನ್‌ಪಿಎ) ಗಾತ್ರ ಹೆಚ್ಚುತ್ತಿದ್ದು ಬ್ಯಾಂಕ್‌ಗಳು ತತ್ತರಿಸಿವೆ. ಈ ಎನ್‌ಪಿಎ ಗಾತ್ರವನ್ನು ಮುದ್ರಾ ಯೋಜನೆ ಇನ್ನಷ್ಟು ಹಿಗ್ಗಿಸಲಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯವನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌(ಆರ್‌ಬಿಐ) ಎಚ್ಚರಿಸಿದೆ.

ಸಣ್ಣ ಕೈಗಾರಿಕೆಗಳು ಸೇರಿದಂತೆ ಸ್ವಯಂ ಉದ್ಯಮ ಆರಂಭಿಸಲು ನೆರವಾಗಲು ಕೇಂದ್ರ ಸರಕಾರ ಆರಂಭಿಸಿದ್ದ ಮಹತ್ವಾಕಾಂಕ್ಷೆಯ ಮುದ್ರಾ ಸಾಲ ಯೋಜನೆಯು ಬ್ಯಾಂಕ್‌ಗಳಿಗೆ ಭಾರವಾಗುತ್ತಿದೆ. ಈ ಯೋಜನೆಯಡಿ ವಸೂಲಾಗದ ಸಾಲಗಳ ಮೊತ್ತ 11,000 ಕೋಟಿ ರೂ. ಮುಟ್ಟಿದೆ ಎಂದು ಆರ್‌ಬಿಐ ಹೇಳಿದೆ.

ಹಣಕಾಸು ಸಚಿವಾಲಯದ ಮೂಲಗಳ ಪ್ರಕಾರ, ಮುದ್ರಾ ಯೋಜನೆಯ ಸಾಲವು ಬ್ಯಾಂಕಿಂಗ್‌ ವಲಯದಲ್ಲಿ ಬೃಹತ್‌ ಪ್ರಮಾಣದಲ್ಲಿ ಬೆಳೆಯಲಿದೆ ಎಂದು ಆರ್‌ಬಿಐ ಕಳವಳ ವ್ಯಕ್ತಪಡಿಸಿದೆ. ಮುದ್ರಾ ಯೋಜನೆಯ ವಾರ್ಷಿಕ ವರದಿ ಪ್ರಕಾರ, 2017-18ರಲ್ಲಿ 2.46 ಲಕ್ಷ ಕೋಟಿ ರೂ. ಸಾಲವನ್ನು ವಿತರಣೆ ಮಾಡಲಾಗಿದೆ. ಇದರ ಪೈಕಿ ಶೇ.40ರಷ್ಟನ್ನು ಮಹಿಳಾ ಉದ್ಯಮಿಗಳಿಗೆ, ಶೇ.33ರಷ್ಟನ್ನು ಸೋಷಿಯಲ್‌ ಕ್ಯಾಟಗರಿಗಳಿಗೆ ನೀಡಲಾಗಿದೆ. 4.81 ಕೋಟಿಗೂ ಅಧಿಕ ಸಣ್ಣ ಉದ್ಯಮಿಗಳಿಗೆ ಲಾಭವಾಗಿದೆ.

2015ರ ಏಪ್ರಿಲ್‌ನಲ್ಲಿ ಈ ಯೋಜನೆ ಆರಂಭಗೊಂಡಿತ್ತು. 10 ಲಕ್ಷ ರೂ. ತನಕ ಅತಿ ಸಣ್ಣ ಮತ್ತು ಸಣ್ಣ ಉದ್ಯಮಿಗಳಿಗೆ ಸಾಲ ನೀಡಲಾಗುತ್ತದೆ. ಸಾಲಗಳ ವಾಪಸಾತಿಯಲ್ಲಿ ನಿರೀಕ್ಷಿತ ಬೆಳವಣಿಗೆ ಕಂಡು ಬಂದಿಲ್ಲ. ಹೀಗಾಗಿ ಎನ್‌ಪಿಎಯಾಗಿ ಮುದ್ರಾ ಸಾಲದ ಮೊತ್ತವು ಬೆಳೆಯುತ್ತಿದೆ.