ಸರಕಾರದ ಆಟ ಟಿ20 ರೀತಿಯದಾದರೆ, ನಮ್ಮದು ಟೆಸ್ಟ್‌ ಮ್ಯಾಚ್‌

ಮುಂಬಯಿ: ಭಾರತೀಯ ರಿಸರ್ವ್‌ ಬ್ಯಾಂಕ್‌ಗೆ(ಆರ್‌ಬಿಐ) ಸ್ವಾಯತ್ತತೆಯ ಅಗತ್ಯವನ್ನು ಮತ್ತೆ ಒತ್ತಿ ಹೇಳಿರುವ ಡೆಪ್ಯುಟಿ ಗವರ್ನರ್‌ ವಿರಳ್‌ ವಿ ಆಚಾರ್ಯ, ''ಬ್ಯಾಂಕ್‌ನ ಸಾರ್ವಭೌಮತ್ವವನ್ನು ಸರಕಾರ ಗೌರವಿಸದೇ ಹೋದರೆ, ಹಣಕಾಸು ಮಾರುಕಟ್ಟೆ ಕುಸಿಯಲಿದೆ,'' ಎಂದು ಎಚ್ಚರಿಸಿದ್ದಾರೆ.

ಈ ಸಂಗತಿಯನ್ನು ಕ್ರಿಕೆಟ್‌ ಪರಿಭಾಷೆಯಲ್ಲಿ ವಿವರಿಸಿದ ಅವರು, ''ಸರಕಾರ ತೆಗೆದುಕೊಳ್ಳುವ ತೀರ್ಮಾನಗಳು ಟಿ20 ಮ್ಯಾಚ್‌ನಂತೆ ಅಲ್ಪಾವಧಿಯನ್ನು ಹೊಂದಿರುತ್ತವೆ. ಆದರೆ, ಆರ್‌ಬಿಐ ಕಾರ್ಯನಿರ್ವಹಣೆಯು ಟೆಸ್ಟ್‌ ಮ್ಯಾಚ್‌ನಂತೆ ಇರುತ್ತದೆ. ಪ್ರತಿ ಮ್ಯಾಚ್‌ ಅನ್ನು ಗೆಲ್ಲಲು ಪ್ರಯತ್ನಿಸುತ್ತದೆ. ಅಲ್ಲದೇ, ಮುಂದಿನ ಅವಧಿಯಲ್ಲಿಯೂ ಗೆಲುವನ್ನು ಸಾಧಿಸಲು ಆಟವನ್ನು ಉಳಿಸಿಕೊಳ್ಳುತ್ತದೆ,'' ಎಂದಿದ್ದಾರೆ.

ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ''1935ರ ಆರ್‌ಬಿಐ ಕಾಯ್ದೆ ಹಾಗೂ 1949ರ ಬ್ಯಾಂಕಿಂಗ್‌ ರೆಗ್ಯುಲೇಶನ್‌ ಕಾಯ್ದೆಗಳನ್ವಯ ಆರ್‌ಬಿಐಗೆ ಅನೇಕ ಪ್ರಮುಖ ಅಧಿಕಾರಗಳಿವೆ. ಆದರೆ, ಅವುಗಳನ್ನು ಪರಿಣಾಮಕಾರಿಯಾಗಿ ಚಲಾಯಿಸಲು ಸ್ವಾಯತ್ತತೆ ಅಗತ್ಯವಿದೆ,'' ಎಂದು ಹೇಳಿದ್ದಾರೆ.

''ಸಾರ್ವಜನಿಕ ವಲಯದ ಬ್ಯಾಂಕ್‌ಗಳನ್ನು ನಿಭಾಯಿಸಲು ಆರ್‌ಬಿಐಗೆ ಈಗಿರುವ ಅಧಿಕಾರ ಸಾಲದು. ಹೀಗಾಗಿ, ತಪ್ಪೆಸಗುವ ಇಂಥ ಬ್ಯಾಂಕ್‌ಗಳ ವಿರುದ್ಧ ಕ್ರಮ ಜರುಗಿಸಲು ಆರ್‌ಬಿಐಗೆ ಅಧಿಕಾರದ ಮಿತಿ ಎದುರಾಗಿದೆ,'' ಎಂದು ಆಚಾರ್ಯ ಹೇಳಿದರು.