ಖೋಟಾ ನೋಟು ಪತ್ತೆ, ಜಪ್ತಿ ನಿಯಮ ಪಾಲನೆಯಲ್ಲಿ ಲೋಪ: ಎಸ್‌ಬಿಐಗೆ 40 ಲಕ್ಷ ರೂ ದಂಡ

ಮುಂಬಯಿ: ಖೋಟಾ ನೋಟುಗಳ ಪತ್ತೆ ಹಾಗೂ ಜಪ್ತಿಗೆ ಸಂಬಂಧಿಸಿದಂತೆ ತನ್ನ ನಿರ್ದೇಶನಗಳನ್ನು ಪಾಲಿಸದ ಭಾರತೀಯ ಸ್ಟೇಟ್‌ ಬ್ಯಾಂಕಿಗೆ (ಎಸ್‌ಬಿಐ) ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) 40 ಲಕ್ಷ ರೂ.ಗಳ ದಂಡ ವಿಧಿಸಿದೆ.

ಖೋಟಾ ನೋಟುಗಳ ನಿಯಮಗಳಿಗೆ ತೋರುವ ಬದ್ಧತೆಯಲ್ಲಿ ಎಸ್‌ಬಿಐ ಲೋಪವೆಸಗಿರುವುದು ಪತ್ತೆಯಾಗಿದೆ ಎಂದು ಆರ್‌ಬಿಐ ಹೇಳಿದೆ. ಆದರೆ ಬ್ಯಾಂಕು ತನ್ನ ಗ್ರಾಹಕರ ಜತೆ ನಡೆಸುವ ವ್ಯವಹಾರಗಳ ಮೇಲೆ ಈ ದಂಡ ಪ್ರಭಾವ ಬೀರುವುದಿಲ್ಲ ಎಂದೂ ಆರ್‌ಬಿಐ ಸ್ಪಷ್ಟಪಡಿಸಿದೆ.

ದೇಶದ ಅತಿದೊಡ್ಡ ಬ್ಯಾಂಕ್‌ ಎನಿಸಿದ ಎಸ್‌ಬಿಐನ ಎರಡು ಕರೆನ್ಸಿ ಭಂಡಾರಗಳಲ್ಲಿ ತಪಾಸಣೆ ನಡೆಸಿದಾಗ, ಖೋಟಾ ನೋಟುಗಳ ಪತ್ತೆ ಮತ್ತು ಜಪ್ತಿ ವಿಚಾರದಲ್ಲಿ ನಿಯಮಗಳ ಪಾಲನೆಯಾಗದಿರುವುದು ಕಂಡುಬಂದಿದೆ. 'ತಪಾಸಣೆ ವರದಿ ಮತ್ತು ಇತರ ದಾಖಲೆಗಳನ್ನು ಆಧರಿಸಿ 2018ರ ಜನವರಿ 5ರಂದು ಬ್ಯಾಂಕಿಗೆ ಯಾಕೆ ದಂಡ ವಿಧಿಸಬಾರದು ಎಂದು ಪ್ರಶ್ನಿಸಿ ಆರ್‌ಬಿಐ ಶೋಕಾಸ್‌ ನೋಟೀಸ್‌ ಜಾರಿ ಮಾಡಿತ್ತು' ಎಂದು ಪ್ರಕಟಣೆ ತಿಳಿಸಿದೆ.

ಬ್ಯಾಂಕಿನ ಪ್ರತಿಕ್ರಿಯೆ ಗಮನಿಸಿ ವಿಚಾರಣೆ ನಡೆಸಿದ ಬಳಿಕ ಇದು ದಂಡ ವಿಧಿಸಲು ಅರ್ಹ ಪ್ರಕರಣ ಎಂದು ಆರ್‌ಬಿಐ ನಿರ್ಧರಿಸಿತು.