ಹೊಸದಿಲ್ಲಿ: ದೇಶಿ ಹಣಕಾಸು ವ್ಯವಸ್ಥೆಯಲ್ಲಿ ನಗದು ಲಭ್ಯತೆಗೆ ಕೊರತೆ ಆಗದಂತೆ ನೋಡಿಕೊಳ್ಳಲು ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಮುಂದಿನ ವಾರ 30,000 ಕೋಟಿ ರೂ.ಗಳನ್ನು ನೀಡಲಿದೆ.

ಕೊರೊನಾ ವೈರಸ್‌ ಭೀತಿಯ ಹಿನ್ನೆಲೆಯಲ್ಲಿ ಮಾರುಕಟ್ಟೆಯಲ್ಲಿ ನಗದು ಕೊರತೆ ಉಂಟಾಗದಂತೆ ನೋಡಿಕೊಳ್ಳಲು ಆರ್‌ಬಿಐ ನಿರ್ಧರಿಸಿದೆ. ಹೀಗಾಗಿ ಎರಡು ಕಂತುಗಳಲ್ಲಿ 30 ಸಾವಿರ ಕೋಟಿ ರೂ. ಮೌಲ್ಯದ ಸರಕಾರಿ ಸಾಲಪತ್ರಗಳನ್ನು ಆರ್‌ಬಿಐ ಖರೀದಿಸಲಿದೆ.

ಮಾರ್ಚ್‌ 24 ಮತ್ತು 30ರಂದು ಇವುಗಳ ಹರಾಜು ನಡೆಯಲಿದೆ. ಮುಕ್ತ ಮಾರುಕಟ್ಟೆಯ ಕಾರ್ಯಾಚರಣೆಯ (ಒಎಂಒ) ಮೂಲಕ ಆರ್‌ಬಿಐ ಶುಕ್ರವಾರ 10 ಸಾವಿರ ಕೋಟಿ ರೂ.ಗಳನ್ನು ವ್ಯವಸ್ಥೆಗೆ ಸೇರ್ಪಡೆಗೊಳಿಸಿತ್ತು.

ಕೊರೊನಾ ವೈರಸ್‌ನಿಂದ ಆರ್ಥಿಕ ಕುಸಿತದ ಭೀತಿ: ತುರ್ತು ಕಾರ್ಯಪಡೆ ರಚಿಸಿದ ಪ್ರಧಾನಿ ಮೋದಿ

ಸರಕಾರಿ ಬಾಂಡ್‌ಗಳನ್ನು ಮುಕ್ತ ಮಾರುಕಟ್ಟೆಯಲ್ಲಿ ಖರೀದಿಸಿ ಮಾರಾಟ ಮಾಡುವ ಮೂಲಕ ಆರ್‌ಬಿಐ ಹಣಕಾಸು ಪೂರೈಕೆ ಸುಸ್ಥಿತಿಯಲ್ಲಿರುವಂತೆ ನೋಡಿಕೊಳ್ಳುತ್ತದೆ. ಕೊರೊನಾದ ಪರಿಣಾಮ ಹಣಕಾಸು ವ್ಯವಸ್ಥೆಯ ಕೆಲ ವಿಭಾಗಗಳಲ್ಲಿ ಹಣಕಾಸು ಪರಿಸ್ಥಿತಿ ಬಿಗಿಯಾಗಿದೆ. ಇದನ್ನು ತಿಳಿಗೊಳಿಸಲು ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಆರ್‌ಬಿಐ ಹೇಳಿದೆ.