ಜಾಗತಿಕ ಆರ್ಥಿಕ ಹಿಂಜರಿತದ ಭೀತಿ ಯಾಕೆ?

ಹೊಸದಿಲ್ಲಿ : ಅಮೆರಿಕ, ಯುರೋಪ್‌ ಸೇರಿದಂತೆ ನಾನಾ ಕಡೆಗಳಲ್ಲಿ ಬಾಂಡ್‌ಗಳ ಹೂಡಿಕೆಯಲ್ಲಿ ಲಭಿಸುವ ಆದಾಯ ಕುಸಿಯುತ್ತಿದೆ. ಮತ್ತೊಂದು ಕಡೆ ಅಮೆರಿಕದ ಫೆಡರಲ್‌ ರಿಸರ್ವ್‌ ಈ ವರ್ಷ ಬಡ್ಡಿ ದರಗಳನ್ನು ಏರಿಸುವುದಿಲ್ಲ ಎಂದು ಕಳೆದ ವಾರ ತಿಳಿಸಿದೆ. ಫೆಡರಲ್‌ ರಿಸರ್ವ್‌ನ ಬಿಗಿ ಆರ್ಥಿಕ ನೀತಿಯು ಜಾಗತಿಕ ಆರ್ಥಿಕ ಹಿಂಜರಿತದ ಭೀತಿಯನ್ನು ಉಂಟು ಮಾಡಿತು. ಅಮೆರಿಕದಲ್ಲಿ ಬಾಂಡ್‌ಗಳ ಆದಾಯದ ಪ್ರಮಾಣ 10 ವರ್ಷಗಳಲ್ಲಿಯೇ ಕನಿಷ್ಠ ಮಟ್ಟಕ್ಕೆ ಇಳಿದಿದೆ. ವಿಶ್ವ ಆರ್ಥಿಕತೆಯ ಬಗ್ಗೆ ನಿರಾಶಾದಾಯಕ ಮುನ್ನೋಟವನ್ನು ಫೆಡರಲ್‌ ರಿಸರ್ವ್‌ ಬಿಂಬಿಸಿದೆ. ಹೀಗಾಗಿ ಅಮೆರಿಕ ಮತ್ತು ಇತರ ರಾಷ್ಟ್ರಗಳ ಆರ್ಥಿಕ ಹಿಂಜರಿತ ಇಡೀ ಜಗತ್ತನ್ನು ಆವರಿಸಲಿದೆಯೇ ಎಂಬ ಆತಂಕ ಷೇರು ಹೂಡಿಕೆದಾರರಲ್ಲಿದೆ.

ಭಾರತಕ್ಕೆ ಆತಂಕ ಬೇಡ ?

ಅಮೆರಿಕ ಹಾಗೂ ಜಾಗತಿಕ ಆರ್ಥಿಕತೆಗೆ ಹಿಂಜರಿತ ಸಂಭವಿಸಿದರೂ, ಭಾರತದ ಷೇರು ಹೂಡಿಕೆದಾರರು ಆತಂಕಪಡಬೇಕಾಗಿಲ್ಲ ಎಂದು ಮಾರುಕಟ್ಟೆ ವಿಶ್ಲೇಷಕರು ಹೇಳಿದ್ದಾರೆ. ಭಾರತದ ಜಿಡಿಪಿ ವೇಗವಾಗಿ ಬೆಳೆಯುತ್ತಿದೆ. ಹಣದುಬ್ಬರ ನಿಯಂತ್ರಣದಲ್ಲಿದೆ. ಹೀಗಾಗಿ ಆರ್‌ಬಿಐಗೆ ಬಡ್ಡಿ ದರಗಳನ್ನು ಇಳಿಸಲು ಅವಕಾಶ ಇದೆ. ಬಡ್ಡಿ ದರ ಇಳಿಸಿದರೆ ಆರ್ಥಿಕ ಬೆಳವಣಿಗೆಗೆ ಪೂರಕವಾಗಲಿದೆ ಎಂದು ತಜ್ಞರು ಹೇಳಿದ್ದಾರೆ.