ತೈಲ ಬೆಲೆ ಕುಸಿತ: ಕೇಂದ್ರ ಸರಕಾರಕ್ಕೆ ತಾತ್ಕಾಲಿಕ ರಿಲೀಫ್

ಹೊಸದಿಲ್ಲಿ: ನಿರಂತರ ಏರುಗತಿಯಲ್ಲಿದ್ದ ತೈಲ ಬೆಲೆ ಇಳಿಕೆಯಾಗುತ್ತಿದ್ದು, ಇಂಧನ ಬೆಲೆ ಏರಿಕೆಯ ಬಿಸಿಯಲ್ಲಿದ್ದ ಕೇಂದ್ರ ಸರಕಾರಕ್ಕೆ ತಾತ್ಕಾಲಿಕ ರಿಲೀಫ್ ನೀಡಿದೆ.

ಡಾಲರ್ ಎದುರು ಸದ್ಯಕ್ಕೆ ರೂಪಾಯಿ ಸ್ಥಿರವಾಗಿದೆ. ಅಲ್ಲದೆ ಕಚ್ಚಾ ತೈಲ ಬೆಲೆ ಕೂಡ ಇಳಿಕೆಯತ್ತ ಸಾಗಿದೆ. ಇದರಿಂದ ಪೆಟ್ರೋಲ್ ಡೀಸೆಲ್ ಬೆಲೆ ಇಳಿಕೆಯಾಗುತ್ತಿದೆ. ಹೀಗಾಗಿ ತೈಲ ಬೆಲೆ ಏರಿಕೆಯಿಂದ ಜನಸಾಮಾನ್ಯರ ಆಕ್ರೋಶಕ್ಕೆ ತುತ್ತಾಗಿದ್ದ ಕೇಂದ್ರ ಸರಕಾರಕ್ಕೆ ಸ್ವಲ್ಪ ನೆಮ್ಮದಿ ದೊರೆತಿದೆ.

ಆದರೆ ಬೆಲೆ ಇಳಿಕೆಯ ಟ್ರೆಂಡ್ ಇದೇ ರೀತಿ ಇರಲಿಕ್ಕಿಲ್ಲ, ಅದು ಬದಲಾಗಬಹುದು ಮತ್ತು ಲೋಕಸಭೆ ಚುನಾವಣೆಯವರೆಗೂ ಇದೇ ರೀತಿ ಇರುವುದು ಅನುಮಾನ ಎನ್ನಲಾಗಿದೆ.

ತೈಲ ಬೆಲೆ ಇಳಿಕೆ ಟ್ರೆಂಡ್ ಮುಂದುವರಿದರೆ ಮತ್ತು ಮುಂದೆ ಏರಿಕೆಯಾಗದೇ ಇದ್ದರೆ, ಅದರಿಂದ ಲೋಕಸಭಾ ಚುನಾವಣೆಯಲ್ಲಿ ಕೇಂದ್ರ ಸರಕಾರಕ್ಕೆ ಪ್ರಯೋಜನವಾಗುವ ಸಾಧ್ಯತೆಯಿದೆ. ಆದರೆ ಈಗಾಗಲೇ ಇರಾನ್‌ನಿಂದ ತೈಲ ಆಮದು ಮಾಡಿಕೊಳ್ಳುತ್ತಿರುವ ಭಾರತದ ಕ್ರಮಕ್ಕೆ ವಿರೋಧ ವ್ಯಕ್ತಪಡಿಸುತ್ತಿರುವ ಅಮೆರಿಕ ಮತ್ತೇನಾದರೂ ನಿರ್ಬಂಧ ವಿಧಿಸಿದರೆ, ಸಹಜವಾಗಿಯೇ ತೈಲ ಬೆಲೆ ಏರಿಕೆ ಸಮಸ್ಯೆಯಾಗಲಿದೆ.

ಜತೆಗೆ ಸೌದಿ ಅರೇಬಿಯಾ ಕೂಡ ತೈಲ ಬೆಲೆ ನಿಯಂತ್ರಣಕ್ಕಾಗಿ ತೈಲ ಉತ್ಪಾದನೆ ಕಡಿತಗೊಳಿಸುವುದಾಗಿ ಹೇಳಿದೆ. ಇದರಿಂದ ಬೆಲೆ ನಿಯಂತ್ರಣ ಸಾಧ್ಯವಾಗಲಿದೆ.