ಕೋರ್ಟ್‌ನಲ್ಲಿ ಅಮೆಜಾನ್‌ಗೆ ಗೆಲುವು, ತೂಗುಯ್ಯಾಲೆಯಲ್ಲಿ ರಿಲಯನ್ಸ್‌-ಫ್ಯೂಚರ್‌ ಗ್ರೂಪ್‌ ಡೀಲ್‌

ಹೊಸದಿಲ್ಲಿ: ರಿಲಯನ್ಸ್‌ ಇಂಡಸ್ಟ್ರೀಸ್‌ ಲಿ. 24,713 ಕೋಟಿ ರೂಪಾಯಿಗೆ ಫ್ಯೂಚರ್‌ ಗ್ರೂಪ್‌ ಖರೀದಿಸಿದ ಸುದ್ದಿ ಕೆಲ ದಿನಗಳ ಹಿಂದೆ ಹೊರಬಿದ್ದಿತ್ತು. ಆದರೆ ಇದಕ್ಕೆ ಆಕ್ಷೇಪ ಎತ್ತಿದ್ದ ಅಮೆಜಾನ್‌ ಸಿಂಗಾಪುರ ನ್ಯಾಯಾಲಯದ ಮೆಟ್ಟಿಲೇರಿತ್ತು. ಇದೀಗ ಕೋರ್ಟ್‌ನಲ್ಲಿ ಇ-ಕಾಮರ್ಸ್‌ ದೈತ್ಯ ಅಮೆಜಾನ್‌ಗೆ ಮಧ್ಯಂತರ ಗೆಲುವು ಸಿಕ್ಕಿದ್ದು, ರಿಟೇಲ್‌ ಕ್ಷೇತ್ರದ ಬೃಹತ್‌ ಖರೀದಿ ಒಪ್ಪಂದ ತೂಗುಯ್ಯಾಲೆಯಲ್ಲಿದೆ.

ಈ ಹಿಂದೆ ಫ್ಯೂಚರ್‌ ಗ್ರೂಪ್‌ನ ಉದ್ಯಮ ‘ಫ್ಯೂಚರ್‌ ಕೂಪನ್ಸ್‌’ನ ಶೇ.49ರಷ್ಟು ಷೇರುಗಳನ್ನು ಅಮೆಜಾನ್‌ ಖರೀದಿಸಿತ್ತು. ಈ ವೇಳೆ ಮುಂದಿನ 3-10 ವರ್ಷಗಳ ಅವಧಿಯಲ್ಲಿ ಫ್ಯೂಚರ್‌ ರಿಟೇಲ್‌ ಖರೀದಿಯ ಹಕ್ಕನ್ನೂ ಅಮೆಜಾನ್‌ಗೆ ನೀಡಲಾಗಿತ್ತು.

ಹೀಗಿರುವಾಗಲೇ ಆಗಸ್ಟ್‌ನಲ್ಲಿ ತನ್ನ ರಿಟೇಲ್‌, ಹೋಲ್‌ಸೇಲ್‌ ಮತ್ತು ಲಾಜಿಸ್ಟಿಕ್‌ ಉದ್ಯಮವನ್ನು ರಿಲಯನ್ಸ್‌ ರಿಟೇಲ್‌ ವೆಂಚರ್ಸ್‌ಗೆ ಮಾರಾಟ ಮಾಡುತ್ತಿರುವುದಾಗಿ ಫ್ಯೂಚರ್‌ ಗ್ರೂಪ್‌ ಘೋಷಿಸಿತ್ತು. ಈ ಮೂಲಕ ತಮ್ಮ ನಡುವೆ ನಡೆದ ಒಪ್ಪಂದವನ್ನು ಫ್ಯೂಚರ್‌ ಗ್ರೂಪ್‌ ಉಲ್ಲಂಘಿಸಿದೆ ಎನ್ನುವುದು ಅಮೆಜಾನ್‌ನ ತಕರಾರು.

ರಿಲಯನ್ಸ್‌ - ಫ್ಯೂಚರ್‌ ಗ್ರೂಪ್ ಡೀಲ್‌ಗೆ ಆಕ್ಷೇಪ, ಲೀಗಲ್‌ ನೋಟಿಸ್‌ ಕಳಿಸಿದ ಅಮೆಜಾನ್‌
ಇದರ ವಿಚಾರಣೆ ನಡೆಸಿದ ಸಿಂಗಾಪುರದ ಅಂತಾರಾಷ್ಟ್ರೀಯ ನ್ಯಾಯಾಲಯ, ಮುಕೇಶ್‌ ಅಂಬಾನಿ ಒಡೆತನದ ರಿಲಯನ್ಸ್‌ ಜೊತೆಗಿನ ವ್ಯವಹಾರವನ್ನು ತಕ್ಷಣವೇ ಸ್ಥಗಿತಗೊಳಿಸುವಂತೆ ಕಿಶೋರ್‌ ಬಿಯಾನಿ ನೇತೃತ್ವದ ಫ್ಯೂಚರ್‌ ಗ್ರೂಪ್‌ಗೆ ಸೂಚಿಸಿದೆ.
ಹೀಗಿದ್ದೂ ತಾತ್ಕಾಲಿಕ ತಡೆ ಆದೇಶ ನೇರವಾಗಿ ಭಾರತದಲ್ಲಿ ಜಾರಿಗೆ ಬರುವುದಿಲ್ಲ. ಆದೇಶವನ್ನು ಭಾರತೀಯ ನ್ಯಾಯಾಲಯ ಅಂಗೀಕರಿಸಬೇಕಾಗುತ್ತದೆ ಎಂದು ಸುದ್ದಿ ಸಂಸ್ಥೆ ರಾಯ್ಟರ್ಸ್‌ ವರದಿ ಮಾಡಿದೆ.

ನ್ಯಾಯಾಲಯದ ಆದೇಶದ ನಡುವೆಯೂ ಫ್ಯೂಚರ್‌ ಗ್ರೂಪ್‌ ಮತ್ತು ರಿಲಯನ್ಸ್‌ ಎರಡೂ ಕಂಪನಿಗಳು ಆದಷ್ಟು ಬೇಗ ಈ ಮಾರಾಟ ಪ್ರಕ್ರಿಯೆಯನ್ನು ಮುಗಿಸುವ ಧಾವಂತದಲ್ಲಿವೆ. ಇದಕ್ಕಾಗಿ ಅಮೆಜಾನ್‌ ಜೊತೆ ಸಂಧಾನ ನಡೆಸುವ ಬಗ್ಗೆ ಎರಡೂ ಕಂಪನಿಗಳು ಚಿಂತನೆ ನಡೆಸುತ್ತಿವೆ.