35,000 ಕೋಟಿ ರೂ. ಸಾಲ ತೀರಿಸಿದ ಅನಿಲ್‌ ಅಂಬಾನಿ

ಮುಂಬಯಿ : ಸಂಕಷ್ಟದ ನಡುವೆಯೂ ಕಳೆದ 14 ತಿಂಗಳುಗಳಲ್ಲಿ 35,000 ಕೋಟಿ ರೂ. ಸಾಲವನ್ನು ಮರು ಪಾವತಿಸಿರುವುದಾಗಿ ರಿಲಯನ್ಸ್‌ ಗ್ರೂಪ್‌ ಅಧ್ಯಕ್ಷ ಅನಿಲ್‌ ಅಂಬಾನಿ ಹೇಳಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ''ಆರ್ಥಿಕ ಪರಿಸ್ಥಿತಿ ಸವಾಲಿನಿಂದ ಕೂಡಿದ್ದರೂ, ಬ್ಯಾಂಕ್‌ಗಳ ನೆರವು ಇಲ್ಲದಿದ್ದರೂ 35,000 ಕೋಟಿ ರೂ. ಸಾಲವನ್ನು ರಿಲಯನ್ಸ್‌ ಗ್ರೂಪ್‌ ಪಾವತಿಸಿದೆ. ಮುಂದಿನ ದಿನಗಳಲ್ಲಿ ಎಲ್ಲ ಸಾಲಗಳನ್ನು ಸಕಾಲದಲ್ಲಿ ತೀರಿಸಲಾಗುವುದು. ರಿಲಯನ್ಸ್‌ ಗ್ರೂಪ್‌ನ ಷೇರುದಾರರು ಆತಂಕಪಡುವ ಅಗತ್ಯವಿಲ್ಲ,'' ಎಂದಿದ್ದಾರೆ.

ಗುತ್ತಿಗೆದಾರ ಕಂಪನಿಗೆ ಸಕಾಲದಲ್ಲಿ ಬಾಕಿ ಪಾವತಿಸಲಾಗದೇ ಜೈಲು ಪಾಲಾಗುವ ಸ್ಥಿತಿಯೂ ಅನಿಲ್‌ ಅವರಿಗೆ ಹಿಂದೆ ಬಂದಿತ್ತು. ಆದರೆ, ಹಿರಿಯ ಸಹೋದರ ಮುಕೇಶ್‌ ಅಂಬಾನಿ ಸಹಕಾರದಿಂದ ಬಿಕ್ಕಟ್ಟು ಇತ್ಯರ್ಥ ಮಾಡಿಕೊಂಡ 60 ವರ್ಷದ ಅನಿಲ್‌, ಹೂಡಿಕೆದಾರರಲ್ಲಿ ವಿಶ್ವಾಸ ಮೂಡಿಸಲು ಮುಂದಾಗಿದ್ದಾರೆ.

''ರಿಲಯನ್ಸ್‌ ಪವರ್‌ ಲಿಮಿಟೆಡ್‌ ಮತ್ತು ರಿಲಯನ್ಸ್‌ ಇನ್‌ಫ್ರಾಸ್ಟ್ರಕ್ಚರ್‌ ಲಿಮಿಟೆಡ್‌ನ ಷೇರುಗಳು ತೀವ್ರ ಕುಸಿಯುತ್ತಿವೆ ಎನ್ನುವ ವದಂತಿಗಳು ಹಬ್ಬುತ್ತಿವೆ,'' ಎಂದು ದೂರಿದ ಅಂಬಾನಿ, ''ಕಂಪನಿಯ ಆಸ್ತಿಗಳನ್ನು ಮಾರಾಟ ಮಾಡಿ(ಆಸ್ತಿ ನಗದೀಕರಣ) ಎಲ್ಲ ಸಾಲಗಳನ್ನು ತೀರಿಸುವ ಪ್ರಕ್ರಿಯೆ ಜಾರಿಯಲ್ಲಿದೆ. ಈಗಾಗಲೇ ವಿವಿಧ ಹಂತಗಳಲ್ಲಿ ಅದು ಜಾರಿಯಲ್ಲಿದೆ. 2018ರ ಏ.1ರಿಂದ 2019ರ ಮೇ 31ರ ಅವಧಿಯಲ್ಲಿ 24,800 ಕೋಟಿ ರೂ. ಅಸಲು ಮತ್ತು 10,600 ಕೋಟಿ ರೂ. ಬಡ್ಡಿಯನ್ನು ಕಂಪನಿ ತೀರಿಸಿದೆ. ಉಳಿದ ಸಾಲ ತೀರಿಸಲು ಕಂಪನಿ ಬದ್ಧವಾಗಿದೆ,'' ಎಂದಿದ್ದಾರೆ. ಷೇರುದಾರರು ಆತಂಕ ಪಡುವ ಅಗತ್ಯವಿಲ್ಲ ಎಂದು ಹೇಳಿದ್ದಾರೆ.

ಕಳೆದ ವಾರವಷ್ಟೇ, ರೇಡಿಯೋ ಸ್ಟೇಷನ್‌ ಮತ್ತು ಮ್ಯೂಚುವಲ್‌ ಫಂಡ್‌ ಬ್ಯುಸಿನೆಸ್‌ ಅನ್ನು ಅನಿಲ್‌ ಅಂಬಾನಿ ಮಾರಾಟ ಮಾಡಿದ್ದರು. ತಮ್ಮ ಜನರಲ್‌ ಇನ್ಷೂರೆನ್ಸ್‌ ಘಟಕ ಮಾರಾಟ ಸಂಬಂಧ ಮಾತುಕತೆ ನಡೆಸಿರುವುದಾಗಿ ಅವರು ಹೇಳಿದ್ದಾರೆ. ಅನಿಲ್‌ ಸಮೂಹವು ತರಂಗಗುಚ್ಛಗಳು ಮತ್ತು ಟವರ್‌ ಬ್ಯುಸಿನೆಸ್‌ ಅನ್ನು ಮಾರಾಟ ಮಾಡಲು ಮುಂದಾಗಿದೆ. ಆದಾಗ್ಯೂ, ಆಡಳಿತಾತ್ಮಕ ಅಡೆತಡೆಗಳು ಎದುರಾಗಿವೆ.

ತಮ್ಮ ಗ್ರೂಪ್‌ ಮೇಲಿನ ಸಾಲದ ಹೊರೆಯನ್ನು ಹಗುರಗೊಳಿಸಿ, ಹೂಡಿಕೆದಾರರಿಗೆ ಹೆಚ್ಚಿನ ರಿಟರ್ನ್ಸ್‌ ಬರುವಂತೆ ಮಾಡುವ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದ್ದಾರೆ. ''ನ್ಯಾಯಾಲಯದ ತೀರ್ಪುಗಳು ಮತ್ತು ಸರಕಾರದ ಸಂಸ್ಥೆಗಳ ವಿಳಂಬ ಧೋರಣೆಯಿಂದ, ರಿಲಯನ್ಸ್‌ ಗ್ರೂಪ್‌ಗೆ ಬರಬೇಕಿದ್ದ 30 ಸಾವಿರ ಕೋಟಿ ರೂಪಾಯಿಗೂ ಹೆಚ್ಚು ಬಾಕಿ ಹಾಗೆಯೇ ಉಳಿದಿದೆ. ಬ್ಯಾಂಕ್‌ಗಳು, ಮ್ಯೂಚುವಲ್‌ ಫಂಡ್‌ಗಳು, ಇನ್ಷೂರೆನ್ಸ್‌ ಕಂಪನಿಗಳು ಹೆಚ್ಚುವರಿ ಸಾಲವನ್ನು ನೀಡಿಲ್ಲ. ಆದಾಗ್ಯೂ, ಪರಿಸ್ಥಿತಿಯನ್ನು ನಿಭಾಯಿಸಲಾಗುತ್ತಿದೆ. ಆಸ್ತಿ ನಗದೀಕರಣದ ಮೂಲಕ ಸವಾಲನ್ನು ನಿಭಾಯಿಸಲಾಗುತ್ತಿದೆ,'' ಎಂದಿದ್ದಾರೆ.

ಕರಗಿದ ಕುಬೇರನ ಆಸ್ತಿ

ಹಿಂದೊಮ್ಮೆ ಭಾರತದ ಕುಬೇರರ ಪಟ್ಟಿಯಲ್ಲಿ ಪ್ರಮುಖ ಸ್ಥಾನದಲ್ಲಿದ್ದ ಅನಿಲ್‌ ಅಂಬಾನಿ ಅವರ ಸಂಪತ್ತು ಕಳೆದ 5 ವರ್ಷಗಳಲ್ಲಿ ಕರಗಿದೆ. ಅವರ ಕಂಪನಿಗಳ ಸಾಲದ ಹೊರೆ ಹಿಗ್ಗಿದ್ದು, ಕಳೆದ ಜನವರಿಯಿಂದ ಈಚೆಗೆ ಅನಿಲ್‌ ಕಂಪನಿಗಳ ಷೇರು ಮೌಲ್ಯ ಶೇ.65ರಷ್ಟು ಕುಸಿದಿದೆ. ಮೂಲಸೌಕರ್ಯದಿಂದ ಫೈನಾನ್ಸ್‌ ತನಕ ನಾನಾ ಕಂಪನಿಗಳನ್ನು ಹೊಂದಿರುವ ರಿಲಯನ್ಸ್‌ ಗ್ರೂಪ್‌ 1 ಲಕ್ಷ ಕೋಟಿ ರೂ.ಸಾಲವನ್ನು ಹೊಂದಿದೆ.