ರಿಲಯನ್ಸ್‌ ಮಾರುಕಟ್ಟೆ ಮೌಲ್ಯ 16 ಲಕ್ಷ ಕೋಟಿ ರೂ.ಗೆ ಏರಿಕೆ, ಮಾರ್ಚ್‌ನಿಂದ ಈಚೆಗೆ 181% ಹೆಚ್ಚಳ!

ಮುಕೇಶ್‌ ಅಂಬಾನಿ ಒಡೆತನದ ರಿಲಯನ್ಸ್‌ ಇಂಡಸ್ಟ್ರೀಸ್‌ ಕಂಪನಿಯ (ಆರ್‌ಐಎಲ್‌) ಮಾರುಕಟ್ಟೆ ಬಂಡವಾಳವು ಬುಧವಾರ 16 ಲಕ್ಷ ಕೋಟಿ ರೂಪಾಯಿಗಳನ್ನು ದಾಟಿದೆ. ಕೆಲವೇ ದಿನಗಳ ಹಿಂದೆ 200 ಬಿಲಿಯನ್‌ ಡಾಲರ್‌ (15 ಲಕ್ಷ ಕೋಟಿ ರೂ.) ಮಾರುಕಟ್ಟೆ ಮೌಲ್ಯ ದಾಟಿದ ದೇಶದ ಮೊದಲ ಕಂಪನಿ ಎನ್ನುವ ಹೆಗ್ಗಳಿಕೆಗೆ ರಿಲಯನ್ಸ್‌ ಇಂಡಸ್ಟ್ರೀಸ್‌ ಪಾತ್ರವಾಗಿತ್ತು.

ಬುಧವಾರ ಒಂದು ಹಂತದಲ್ಲಿ ರಿಲಯನ್ಸ್‌ ಷೇರುಗಳ ಬೆಲೆ 2360.80 ರೂಪಾಯಿಗೆ ಏರಿಕೆಯಾಗಿ 16 ಲಕ್ಷ ಕೋಟಿ ರೂಪಾಯಿ ಮಾರುಕಟ್ಟೆ ಮೌಲ್ಯ ತಲುಪಿದ ಕಂಪನಿ ಎಂಬ ದಾಖಲೆ ಬರೆಯಿತು. ದಿನದಂತ್ಯಕ್ಕೆ ರಿಲಯನ್ಸ್‌ ಷೇರುಗಳ ಬೆಲೆ 2,324.90 ರೂಪಾಯಿಗೆ ವಹಿವಾಟು ಕೊನೆಗೊಳಿಸಿತು. ಸದ್ಯ ರಿಲಯನ್ಸ್‌ ಮೌಲ್ಯ 15.34 ಲಕ್ಷ ಕೋಟಿ ರೂಪಾಯಿಯಾಗಿದೆ. ಮಾರ್ಚ್‌ 23ರಿಂದ ಈಚೆಗೆ ರಿಲಯನ್ಸ್‌ ಇಂಡಸ್ಟ್ರೀಸ್‌ ಮಾರುಕಟ್ಟೆ ಬಂಡವಾಳವು ಶೇ.181ರಷ್ಟು ಏರಿಕೆಯಾಗಿದೆ.

83 ದಿನದಲ್ಲಿ 50 ಬಿಲಿಯನ್‌ ಡಾಲರ್
‌
ಆರ್‌ಐಎಲ್‌ ಕಂಪನಿಯು 83 ದಿನಗಳಲ್ಲಿಯೇ 50 ಬಿಲಿಯನ್‌ ಡಾಲರ್‌ ಮಾರುಕಟ್ಟೆ ಬಂಡವಾಳವನ್ನು ವೃದ್ಧಿಸಿಕೊಂಡಿದೆ. ಹಿಂದೆ 100 ರಿಂದ 150 ಬಿಲಿಯನ್‌ ಡಾಲರ್‌ಗೆ ಏರಿಕೆಯಾಗಲು ರಿಲಯನ್ಸ್‌ ಹನ್ನೆರಡೂವರೆ ವರ್ಷ ತೆಗೆದುಕೊಂಡಿತ್ತು. ಆದರೆ ಈಗ ಕೇವಲ 83 ದಿನಗಳಲ್ಲಿ 150 ರಿಂದ 200 ಬಿಲಿಯನ್‌ ಡಾಲರ್‌ಗೆ‌ ಮಾರುಕಟ್ಟೆ ಬಂಡವಾಳ ಹೆಚ್ಚಿಸಿಕೊಂಡಿದೆ.

ಷೇರು ಪೇಟೆಯಲ್ಲಿ ರಿಲಯನ್ಸ್‌ ಅಬ್ಬರ, ಕಂಪನಿ ಮಾರುಕಟ್ಟೆ ಮೌಲ್ಯ 15 ಲಕ್ಷ ಕೋಟಿ ರೂ.ಗೆ ಏರಿಕೆ

ಹಲವು ದೇಶಗಳ ಜಿಡಿಪಿಗಿಂತ ರಿಲಯನ್ಸ್‌ ಮೌಲ್ಯವೇ ಮೇಲು

* ನ್ಯೂಜಿಲೆಂಡ್‌ ಮತ್ತು ಕತಾರ್‌ ದೇಶಗಳಿಗಿಂತಲೂ ರಿಲಯನ್ಸ್‌ ಕಂಪನಿಯ ಮಾರುಕಟ್ಟೆ ಬಂಡವಾಳದ ಮೌಲ್ಯವೇ ಜಾಸ್ತಿ.
* ಭಾರತದ ದೊಡ್ಡ ರಾಜ್ಯ ಉತ್ತರ ಪ್ರದೇಶದ ಜಿಡಿಪಿಗಿಂತಲೂ ರಿಲಯನ್ಸ್‌ ಬಂಡವಾಳವೇ ಅಧಿಕ. ಇನ್ನು ಉದ್ಯಮ ರಾಜ್ಯವಾದ ಮಹಾರಾಷ್ಟ್ರದ ಜಿಡಿಪಿಯ ಅರ್ಧದಷ್ಟನ್ನು ಆರ್‌ಐಎಲ್‌ ಹೊಂದಿದೆ.

ಜಾಗತಿಕ ಕಂಪನಿಗಳ ಮಾರುಕಟ್ಟೆ ಬಂಡವಾಳ ಶ್ರೇಯಾಂಕ (ಬಿಲಿಯನ್‌ ಡಾಲರ್‌)

1. ಆ್ಯಪಲ್‌ - 2,006
2. ಸೌದಿ ಅರೇಬಿಯನ್‌ ಆಯಿಲ್‌ ಕಂಪನಿ (ಅರಾಮ್ಕೊ) - 1,909
3. ಅಮೆಜಾನ್‌ - 1,637
4. ಮೈಕ್ರೊಸಾಫ್ಟ್‌ - 1,599
5. ಆಲ್ಫಾಬೆಟ್ (ಗೂಗಲ್‌)‌ -1,056
42. ರಿಲಯನ್ಸ್‌ ಇಂಡಸ್ಟ್ರೀಸ್‌ - 208.77

ಹೂಡಿಕೆದಾರರ ಕತೆ?

1993ರಲ್ಲಿ ರಿಲಯನ್ಸ್‌ ಇಂಡಸ್ಟ್ರೀಸ್‌ನಲ್ಲಿ 1 ಲಕ್ಷ ರೂ. ಹೂಡಿಕೆ ಮಾಡಿದ್ದರೆ, ಕಳೆದ ಗುರುವಾರ ಅದು 77 ಲಕ್ಷ ರೂ. ಆಗಿ ವೃದ್ಧಿಯಾಗಿತ್ತು. ವಾರ್ಷಿಕ 17.6% ರಿಟರ್ನ್ಸ್‌ ರಿಲಯನ್ಸ್‌ ಹೂಡಿಕೆದಾರರಿಗೆ ಸಿಕ್ಕಿದೆ.