ಜನವರಿಯಲ್ಲಿ ಜಿಯೊ ತೆಕ್ಕೆಗೆ 80 ಲಕ್ಷ ಗ್ರಾಹಕರು

ಕೋಲ್ಕೊತಾ: ರಿಲಯನ್ಸ್‌ ಜಿಯೊ 4ಜಿ ಮೊಬೈಲ್‌ ಜಾಲಕ್ಕೆ ಜನವರಿಯಲ್ಲಿ 83 ಲಕ್ಷ ಗ್ರಾಹಕರು ಸೇರ್ಪಡೆಯಾಗಿದ್ದಾರೆ. ಇದರೊಂದಿಗೆ ಜನವರಿಯಲ್ಲಿ ಕಂಪನಿಯ ಮಾರುಕಟ್ಟೆ ಷೇರು 14 ಪರ್ಸೆಂಟ್‌ ವೃದ್ಧಿಸಿದೆ.

ಇದೇ ಅವಧಿಯಲ್ಲಿ ಜಿಯೊ ಪ್ರತಿಸ್ಪರ್ಧಿ ಕಂಪನಿಗಳಾದ ಏರ್‌ಟೆಲ್‌ 15 ಲಕ್ಷ, ವೊಡಾಫೋನ್‌ 12 ಲಕ್ಷ ಮತ್ತು ಐಡಿಯಾ ಸೆಲ್ಯುಲರ್‌ 14 ಲಕ್ಷ ಗ್ರಾಹಕರನ್ನು ತನ್ನ ತೆಕ್ಕೆಗೆ ಸೇರಿಸಿಕೊಂಡಿವೆ. ಟೆಲಿಕಾಂ ವಲಯದಲ್ಲಿನ ತೀವ್ರ ಸ್ಪರ್ಧೆ ಮತ್ತು ಮೊಬೈಲ್‌ ಜಾಲಗಳ ಹೊಸ ಬಳಕೆದಾರರಿಗೆ ಸಂಬಂಧಿಸಿದ ಅಂಕಿಅಂಶಗಳ ವರದಿಯನ್ನು ಟ್ರಾಯ್‌ ಶುಕ್ರವಾರ ಬಿಡುಗಡೆ ಮಾಡಿದೆ.

ದರ ಸಮರಗಳು ಮುಂದುವರೆದಿದ್ದು, ಜಿಯೊ ಸ್ಪರ್ಧೆ ತೀವ್ರವಾಗಿದೆ. ಆದಾಗ್ಯೂ, 29 ಕೋಟಿ ಗ್ರಾಹಕರನ್ನು ಹೊಂದಿರುವ ಏರ್‌ಟೆಲ್‌ ದೇಶದ ಬೃಹತ್‌ ಟೆಲಿಫೋನ್‌ ಕಂಪನಿ ಎನ್ನುವ ಹೆಗ್ಗಳಿಕೆಯನ್ನು ಕಾಯ್ದುಕೊಂಡಿದೆ. ಮುಕೇಶ್‌ ಅಂಬಾನಿ ನೇತೃತ್ವದ ಜಿಯೊ 16 ಕೋಟಿ ಗ್ರಾಹಕರನ್ನು ಹೊಂದಿದೆ. ಎರಡನೇ ಸ್ಥಾನದಲ್ಲಿರುವ ವೋಡಾಫೋನ್‌ 21 ಕೋಟಿ, ನಂತರದ ಸ್ಥಾನದಲ್ಲಿರುವ ಐಡಿಯಾ 19 ಕೋಟಿ ಗ್ರಾಹಕರನ್ನು ಹೊಂದಿದೆ.