BSNL ಹಿಂದಿಕ್ಕಿದ Jio, ಬ್ರಾಡ್‌ಬ್ಯಾಂಡ್‌ ಉದ್ಯಮದಲ್ಲಿಯೂ ಈಗ ರಿಲಯನ್ಸ್‌ ಜಿಯೋ ನಂ.1

ಕೇವಲ 2 ವರ್ಷಗಳ ಹಿಂದೆ ಫಿಕ್ಸೆಡ್‌ ಲೈನ್‌ ಬ್ರಾಡ್‌ಬ್ಯಾಂಡ್‌ ವಾಣಿಜ್ಯ ಸೇವೆ ಆರಂಭಿಸಿದ್ದ ರಿಲಯನ್ಸ್‌ ಜಿಯೋ, 20 ವರ್ಷಗಳಿಂದ ಉದ್ಯಮದಲ್ಲಿ ಏಕಮಾದ್ವಿತೀಯನಾಗಿ ಮೆರೆಯುತ್ತಿದ್ದ ಬಿಎಸ್‌ಎನ್‌ಎಲ್‌ನ್ನು ಹಿಂದಿಕ್ಕಿ ಮೊದಲ ಸ್ಥಾನಕ್ಕೇರಿದೆ. ಟೆಲಿಕಾಂ ನಿಯಂತ್ರಕ ಟ್ರಾಯ್ ಮಂಗಳವಾರ ಬಿಡುಗಡೆ ಮಾಡಿರುವ ಮಾಸಿಕ ಟೆಲಿಕಾಂ ಚಂದಾದಾರರ ವರದಿಯಿಂದ ಈ ವಿಚಾರ ತಿಳಿದು ಬಂದಿದೆ. ಜಿಯೋ ಈಗ 43.4 ಲಕ್ಷ ಗ್ರಾಹಕರೊಂದಿಗೆ ಫಿಕ್ಸೆಡ್‌ ಲೈನ್ ಬ್ರಾಡ್‌ಬ್ಯಾಂಡ್ ವಿಭಾಗದ ಮುಂಚೂಣಿ ಕಂಪನಿಯಾಗಿ ಮೂಡಿ ಬಂದಿದೆ.

ಸುಮಾರು 20 ವರ್ಷಗಳ ಹಿಂದೆ ಪ್ರಾರಂಭವಾದಾಗಿನಿಂದಲೂ ಫಿಕ್ಸೆಡ್‌ ಲೈನ್‌ ಬ್ರಾಡ್‌ಬ್ಯಾಂಡ್‌ ಕ್ಷೇತ್ರದಲ್ಲಿ ಸರಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌ ಪ್ರಾಬಲ್ಯ ಹೊಂದಿತ್ತು.

ರಿಲಯನ್ಸ್‌ ಜಿಯೋ ಫಿಕ್ಸೆಡ್‌ ಲೈನ್‌ ಬ್ರಾಡ್‌ಬ್ಯಾಂಡ್‌ ಬಳಕೆದಾರರ ಸಂಖ್ಯೆ 43.4 ಲಕ್ಷಕ್ಕೆ ಏರಿಕೆಯಾಗಿದೆ. ಅಕ್ಟೋಬರ್‌ನಲ್ಲಿ ಸಂಸ್ಥೆ 41.6 ಲಕ್ಷ ಬಳಕೆದಾರರನ್ನು ಹೊಂದಿತ್ತು. ಇದೇ ವೇಳೆ ಬಿಎಸ್‌ಎನ್‌ಎಲ್‌ ಗ್ರಾಹಕರ ಸಂಖ್ಯೆಯಲ್ಲಿ ಭಾರೀ ಕುಸಿತ ದಾಖಲಾಗಿದ್ದು, ಅಕ್ಟೋಬರ್‌ನಲ್ಲಿ 47.2 ಲಕ್ಷ ಗ್ರಾಹಕರನ್ನು ಹೊಂದಿದ್ದ ಸರಕಾರಿ ಸ್ವಾಮ್ಯದ ಕಂಪನಿಯ ಗ್ರಾಹಕರ ಸಂಖ್ಯೆ ನವೆಂಬರ್‌ನಲ್ಲಿ 42 ಲಕ್ಷಕ್ಕೆ ಇಳಿಕೆಯಾಗಿದೆ.

ಇನ್ನು ನವೆಂಬರ್‌ನಲ್ಲಿ ಭಾರ್ತಿ ಏರ್‌ಟೆಲ್‌ ಫಿಕ್ಸೆಡ್‌ ಲೈನ್‌ ಬ್ರಾಡ್‌ಬ್ಯಾಂಡ್‌ ಬಳಕೆದಾರರ ಸಂಖ್ಯೆ 40.8 ಲಕ್ಷ ಇದ್ದು, ಈ ವಲಯದಲ್ಲಿ ಮೂರನೇ ಅತೀ ಹೆಚ್ಚು ಗ್ರಾಹಕರನ್ನು ಹೊಂದಿರುವ ಕಂಪನಿಯಾಗಿದೆ.

ಜಿಯೋ ಫೈಬರ್‌ ಹೆಸರಿನಲ್ಲಿ ಜಿಯೋ 2019ರ ಅಕ್ಟೋಬರ್‌ನಲ್ಲಿ ಬ್ರಾಡ್‌ಬ್ಯಾಂಡ್‌ ಸೇವೆಗಳನ್ನು ಜನರಿಗೆ ನೀಡಲು ಆರಂಭಿಸಿತ್ತು. ಅಲ್ಲಿಂದ ಕೇವಲ 2 ವರ್ಷಗಳಲ್ಲೇ ದೇಶದಲ್ಲಿ ಮೊದಲ ಸ್ಥಾನಕ್ಕೇರಿದೆ. ಜಿಯೋ ಫೈಬರ್‌ ಸೇವೆ ಆರಂಭಿಸುವುದಕ್ಕೂ ಮೊದಲು ಅಂದರೆ 2019ರ ಸೆಪ್ಟೆಂಬರ್‌ನಲ್ಲಿ ಬಿಎಸ್‌ಎನ್‌ಎಲ್‌ 86.9 ಲಕ್ಷ ಗ್ರಾಹಕರನ್ನು ಹೊಂದಿತ್ತು. ಅದೀಗ ಕೇವಲ 2 ವರ್ಷಗಳಲ್ಲಿ ಅರ್ಧಕ್ಕಿಂತ ಹೆಚ್ಚು ಕುಸಿತ ಕಂಡಿದೆ.

ಈ ಸಂದರ್ಭದಲ್ಲಿ ಅಂದರೆ 2019ರ ಸೆಪ್ಟೆಂಬರ್‌ನಲ್ಲಿ ಏರ್‌ಟೆಲ್‌ ಬ್ರಾಡ್‌ಬ್ಯಾಂಡ್‌ ಬಳಕೆದಾರರ ಸಂಖ್ಯೆ 24.1 ಲಕ್ಷ ಇತ್ತು. ಅಲ್ಲಿಂದ ಏರ್‌ಟೆಲ್‌ ಗ್ರಾಹಕರ ಸಂಖ್ಯೆ ಶೇ. 70ರಷ್ಟು ಹೆಚ್ಚಾಗಿದ್ದು ಇದೀಗ 2021ರ ನವೆಂಬರ್‌ ವೇಳೆಗೆ 40.8 ಲಕ್ಷಕ್ಕೆ ಬಂದು ನಿಂತಿದೆ. ಇದೇ ರೀತಿ ಮುಂದುವರಿದಲ್ಲಿ ಏರ್‌ಟೆಲ್‌ ಕೆಲವೇ ತಿಂಗಳಲ್ಲಿ ಬಿಎಸ್‌ಎನ್‌ಎಲ್‌ನ್ನು ಹಿಂದಿಕ್ಕಿ ಮೊದಲ ಸ್ಥಾನಕ್ಕೇರಲಿದೆ.

ಇನ್ನು ಅಕ್ಟೋಬರ್‌ನಲ್ಲಿ ದೇಶದಲ್ಲಿ 79.89 ಕೋಟಿ ಬ್ರಾಡ್‌ಬ್ಯಾಂಡ್‌ (ವೈರ್‌-ವೈರ್‌ಲೆಸ್‌ ಎರಡೂ ಸೇರಿ) ಬಳಕೆದಾರರಿದ್ದರೆ, ಈ ಸಂಖ್ಯೆ ನವೆಂಬರ್‌ನಲ್ಲಿ 80.16 ಕೋಟಿಗೆ ಏರಿಕೆಯಾಗಿದೆ.

ನವೆಂಬರ್‌ ಅಂತ್ಯಕ್ಕೆ ಒಟ್ಟು ಬ್ರಾಡ್‌ಬ್ಯಾಂಡ್‌ ಬಳಕೆದಾರರಲ್ಲಿ ಅಗ್ರ ಐದು ಕಂಪನಿಗಳ ಪಾಲು ಶೇ. 98.68ರಷ್ಟಿದೆ ಎಂದು ಟ್ರಾಯ್‌ ಹೇಳಿದೆ. ರಿಲಯನ್ಸ್‌ ಜಿಯೋದ ಬ್ರಾಡ್‌ಬ್ಯಾಂಡ್‌ ಚಂದಾದಾರರ ಸಂಖ್ಯೆ 43.29 ಕೋಟಿ ಇದ್ದರೆ, ಭಾರ್ತಿ ಏರ್‌ಟೆಲ್‌ ನಂತರದ ಸ್ಥಾನದಲ್ಲಿದ್ದು 21.01 ಕೋಟಿ ಗ್ರಾಹಕರನ್ನು ಹೊಂದಿದೆ. ವೊಡಾಫೋನ್‌ ಐಡಿಯಾ 12.24 ಕೋಟಿ ಗ್ರಾಹಕರೊಂದಿಗೆ ಮೂರನೇ ಸ್ಥಾನದಲ್ಲಿದ್ದರೆ ನಾಲ್ಕನೇ ಸ್ಥಾನದಲ್ಲಿರುವ ಬಿಎಸ್‌ಎನ್‌ಎಲ್‌ ಬಳಿ 2.36 ಕೋಟಿ ಗ್ರಾಹಕರಿದ್ದಾರೆ. ಏಟ್ರಿಯಾ ಕನ್ವರ್ಜೆನ್ಸ್‌ 19.8 ಲಕ್ಷ ಗ್ರಾಹಕರನ್ನು ಹೊಂದಿದೆ.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.