ಪ್ರಧಾನಿ ಚಿತ್ರ ಬಳಕೆ: ಕ್ಷಮೆಯಾಚಿಸಿದ ಜಿಯೋ, ಪೇಟಿಎಂ

ಹೊಸದಿಲ್ಲಿ: ಹೊಸದಿಲ್ಲಿ: ಸರಕಾರದ ಅನುಮತಿ ಪಡೆಯದೆ ಪ್ರಧಾನಿ ನರೇಂದ್ರ ಮೋದಿ ಭಾವಚಿತ್ರಗಳನ್ನು ತಮ್ಮ ಸರಕಿನ ಜಾಹಿರಾತಿನಲ್ಲಿ ಬಳಸಿರುವುದಕ್ಕಾಗಿ ರಿಲಯನ್ಸ್‌ ಜಿಯೋ ಮಾಲೀಕ ಮುಖೇಶ್‌ ಅಂಬಾನಿ ಹಾಗೂ ಪೇಟಿಎಂ ಸಂಸ್ಥಾಪಕ ವಿಜಯ್‌ ಶೇಖರ್‌ ಶರ್ಮಾ ಕ್ಷ ಮೆ ಕೋರಿದ್ದಾರೆ.

ವಾಣಿಜ್ಯ ಲಾಭಗಳಿಗಾಗಿ ಪ್ರಧಾನಿಯ ಹೆಸರು ಹಾಗೂ ಭಾವಚಿತ್ರ ಬಳಸಿ, ನೀತಿಸಂಹಿತೆಯನ್ನು ಕಡೆಗಣಿಸಿದ ಎರಡೂ ಕಂಪನಿಗಳಿಗೆ ವಿವರಣೆ ಕೋರಿ ಸರಕಾರ ನೋಟಿಸ್‌ ನೀಡಿತ್ತು. ಗ್ರಾಹಕ ವ್ಯವಹಾರಗಳ ಸಚಿವಾಲಯವು ದಂಡ ವಿಧಿಸುವುದಾಗಿ ಹೇಳಿ ಲಿಖಿತ ರೂಪದಲ್ಲಿ ಎಚ್ಚರಿಕೆ ನೀಡಿತ್ತು.

ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ಜಿಯೋ 4ಜಿ ಆಫರ್‌ ನೀಡುವಾಗ ರಿಲಯನ್ಸ್‌ ಕಂಪನಿಯು ತನ್ನ ಸೇವೆಯನ್ನು ಮೋದಿ ಸರಕಾರದ ಡಿಜಿಟಲ್‌ ಇಂಡಿಯಾ ಪ್ರಾಜೆಕ್ಟ್ಗೆ ಅರ್ಪಿಸಿತ್ತಲ್ಲದೆ, 'ರಿಲಯನ್ಸ್‌ ಜಿಯೋ; ಡಿಜಿಟಲ್‌ ಲೈಫ್‌' ಇಡೀ ಪುಟದ ಜಾಹಿರಾತಿನಲ್ಲಿ ಮೋದಿಯವರ ಭಾವಚಿತ್ರ ಬಳಸಿತ್ತು.

ನಂತರ ನವೆಂಬರ್‌ನಲ್ಲಿ ಕೇಂದ್ರ ಸರಕಾರ 500 ಹಾಗೂ 1000ದ ನೋಟುಗಳನ್ನು ನಿಷೇಧಿಸಿ ಆದೇಶ ಹೊರಡಿಸಿದಾಗ, ಅದರ ಲಾಭ ಪಡೆದ ಪೇಟಿಎಂ ಕೂಡಾ ಮೋದಿ ಫೋಟೋ ಬಳಸಿ ಜಾಹಿರಾತು ನೀಡಿತ್ತು.

ಇದೀಗ ನೋಟಿಸ್‌ ಬಿಸಿ ತಟ್ಟಿದ ಬಳಿಕ ಎರಡೂ ಕಂಪನಿಗಳು ಸರಕಾರದ ಕ್ಷ ಮೆ ಕೋರಿವೆ.