ಜಿಯೊ ಪ್ರವೇಶದಿಂದ ಭಾರತದ ಜಿಡಿಪಿ ವೃದ್ಧಿಗೆ ಸಹಕಾರಿ

ಹೊಸದಿಲ್ಲಿ : ಅಗ್ಗದ ದರದಲ್ಲಿ 4ಜಿ ಸೇವೆ ಒದಗಿಸಿದ ರಿಲಯನ್ಸ್‌ ಜಿಯೊ, ಟೆಲಿಕಾಂ ಮಾರುಕಟ್ಟೆಯಲ್ಲಿ ಸಂಚಲನ ಹುಟ್ಟಿಸಿದೆ. ಇದರ ಜತೆಗೆ ಜಿಯೊ ಪ್ರವೇಶದಿಂದಾಗಿ ದೇಶದ ತಲಾದಾಯದ ಜಿಡಿಪಿ ಶೇ.5.65ರಷ್ಟು ಏರಿಕೆಯಾಗಲಿದೆ ಎಂದು ಸಂಸ್ಥೆಯೊಂದು ಅಂದಾಜು ಮಾಡಿದೆ.

ಜಿಯೊ ಬಂದ ಬಳಿಕ ಗ್ರಾಹಕರಿಗೆ 1,000 ಕೋಟಿ ಡಾಲರ್‌ ಹಣ ಉಳಿತಾಯವಾಗಿದೆ. ಜಿಯೊ ಪ್ರವೇಶದ ನಂತರ ಪ್ರತಿ ಜಿಬಿ ಅಂತರ್ಜಾಲ ಪ್ಯಾಕೆಟ್‌ನ ದರ 152 ರೂ.ನಿಂದ 10 ರೂ. ಗೆ ಇಳಿಕೆಯಾಗಿದೆ. ದೊಡ್ಡ ಮಟ್ಟದಲ್ಲಿ ಭಾರತೀಯರಿಗೆ ಇಂಟರ್‌ನೆಟ್‌ ಸೇವೆ ಸಿಗುವಂತಾಗಿದೆ. ಇದರಿಂದ ಭಾರತೀಯರ ತಲಾದಾಯದ ಜಿಡಿಪಿ ವೃದ್ಧಿಗೆ ಸಹಾಯವಾಗಲಿದೆ ಎಂದು ಗುರುಗ್ರಾಮ ಮೂಲದ ಇನ್‌ಸ್ಟಿಟ್ಯೂಟ್‌ ಫಾರ್‌ ಕಂಪಿಟೇಟಿವ್‌ನೆಸ್‌(ಐಎಫ್‌ ಸಿ) ಹೇಳಿದೆ.

ಹಾರ್ವರ್ಡ್‌ ಬಿಸಿನೆಸ್‌ ಸ್ಕೂಲ್‌ನ ಭಾರತೀಯ ಘಟಕವಾದ ಐಎಫ್‌ಸಿ, ಜಿಯೊ ಮೊದಲು ಮತ್ತು ನಂತರದಲ್ಲಿ ಭಾರತದಲ್ಲಾಗಿರುವ ಬೆಳವಣಿಗೆಗಳನ್ನು ವಿಶ್ಲೇಷಿಸಿದೆ.

ಕಳಪೆ ನೆಟ್‌ವರ್ಕ್‌ಗಳು ಮತ್ತು ದುಬಾರಿ ದರಗಳಿಂದಾಗಿ ಅಂತರ್ಜಾಲವು ದೇಶದ ಬಹುತೇಕರಿಗೆ ಮೊದಲು ದುರ್ಲಭವಾಗಿತ್ತು. ಜಿಯೊ ಪ್ರವೇಶದ ಬಳಿಕ ಗ್ರಾಮೀಣ ಪ್ರದೇಶಗಳೂ ಸೇರಿದಂತೆ ದೇಶದಲ್ಲಿ ಅಂತರ್ಜಾಲ ಬಳಕೆ ಪ್ರಮಾಣ ಹೆಚ್ಚಳವಾಗಿದೆ. ಜಿಯೊ ಆರಂಭವಾದ 6 ತಿಂಗಳಲ್ಲೇ ಭಾರತವು ಇಂಟರ್ನೆಟ್‌ ಡೇಟಾ ಬಳಕೆಯಲ್ಲಿ ವಿಶ್ವದಲ್ಲೇ ಮೊದಲ ಸ್ಥಾನ ತಲುಪಿತ್ತು. ಈ ಮೊದಲು ಭಾರತದ ಗ್ರಾಹಕರು ಪ್ರತಿ ತಿಂಗಳು 20 ಕೋಟಿ ಡೇಟಾ ಬಳಕೆ ಮಾಡುತ್ತಿದ್ದರು. ಜಿಯೊ ಬಂದ ತರುವಾಯ ಈ ಪ್ರಮಾಣ 100 ಕೋಟಿಗೆ ಏರಿಕೆಯಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

2017ರ ಅಂತ್ಯಕ್ಕೆ ಜಿಯೊ ಬಳಕೆದಾರರು ತಿಂಗಳಿಗೆ ಸರಾಸರಿ 10 ಜಿಬಿ ಇಂಟರ್ನೆಟ್‌, 700 ನಿಮಿಷಗಳ ಕರೆ, 134 ಗಂಟೆಗಳ ವಿಡಿಯೋ ಬಳಕೆ ಮಾಡುತ್ತಿದ್ದಾರೆ.