- ಐತಿಚಂಡ ರಮೇಶ್‌ ಉತ್ತಪ್ಪ
ಬುಧವಾರ ತಂದೆಯ ಹುಟ್ಟುಹಬ್ಬ ಆಚರಿಸಿರುವ ಅವರು ಸಾಂಪ್ರದಾಯಿಕ ಉಡುಪಿನಲ್ಲಿ ಮಿಂಚಿ, ಮತ್ತೆ ಜಾಗತಿಕವಾಗಿ ಪ್ರಶಂಸೆಗೆ ಒಳಗಾಗಿದ್ದಾರೆ. ಗೀತಾ ಗೋಪಿನಾಥ್‌ ಅವರು ಭಾರತೀಯ ಸಂಪ್ರದಾಯದಂತೆ ಸೀರೆ ಧರಿಸಿದ್ದು, ತಂದೆ -ತಾಯಿ ಕೂಡ ಸಾಂಪ್ರದಾಯಿಕ ಉಡುಪಿನಲ್ಲಿದ್ದಾರೆ.
ಈಗಾಗಲೇ ಅರ್ಥಶಾಸ್ತ್ರಜ್ಞೆಯಾಗಿ ಗಮನ ಸೆಳೆದಿರುವ ಅವರು, ಕುಟುಂಬದೊಂದಿಗೆ ಸಾಂಪ್ರದಾಯಿಕ ಉಡುಪಿನಲ್ಲಿರುವ ಫೋಟೋ ಟ್ವೀಟ್‌ ಮಾಡಿದ್ದಾರೆ. ಈ ಟ್ವೀಟ್‌ ವಿಶ್ವದ ಹಲವು ಪ್ರಮುಖರ ಪ್ರಶಂಸೆಗೆ ಒಳಗಾಗಿದೆ.
ಬಹುದೊಡ್ಡ ಹುದ್ದೆ
ಗೀತಾ ಗೋಪಿನಾಥ್‌ ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆಯ ಪ್ರಥಮ ಉಪಮುಖ್ಯಸ್ಥೆಯಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಇಲ್ಲಿಯವರೆಗೆ ಅವರು ಐಎಂಎಫ್‌ನ ಮುಖ್ಯ ಅರ್ಥಶಾಸ್ತ್ರಜ್ಞೆಯಾಗಿದ್ದರು. ಆರ್ಥಿಕ ಕ್ಷೇತ್ರದಲ್ಲಿ ಅವರ ಅನುಭವ ಹಾಗೂ ಚಿಂತನೆಗಳು ಬಹುಬೇಗನೇ ವಿಶ್ವದ ಗಮನ ಸೆಳೆದಿವೆ. ಆರ್ಥಿಕ ಚೇತರಿಕೆಗೆ ಅವರು ನೀಡಿರುವ ಹಲವು ಸಲಹೆಗಳು ಹಾಗೂ ಸುಧಾರಣೆಗಳು ಗಮನ ಸೆಳೆದಿವೆ.
ತಂದೆಗಾಗಿ ಬಂದರು
ಐಎಂಎಫ್‌ನ ಪ್ರಥಮ ಉಪ ಮುಖ್ಯಸ್ಥೆಯಾದ ನಂತರ ತಮ್ಮ ಪ್ರೀತಿಯ ತಂದೆ ಗೋಪಿನಾಥ್‌ ಅವರ 85ನೇ ಜನ್ಮ ದಿನದ ಸಂಭ್ರಮದಲ್ಲಿ ಅವರು ಭಾಗವಹಿಸಿರುವುದು ವಿಶೇಷವಾಗಿದೆ. ಅಮೆರಿಕಾದಿಂದ ಮೂರು ದಿನಗಳ ಹಿಂದೆ ಮೈಸೂರಿಗೆ ಆಗಮಿಸಿದ ಅವರು, ಬುಧವಾರ ಸಂಭ್ರಮದಲ್ಲಿ ಪಾಲ್ಗೊಂಡರು. ಬೆಳಗ್ಗೆಯಿಂದಲೇ ಲವಲವಿಕೆ ಇಂದ ಇದ್ದ ಅವರು ತಂದೆಯ 85ನೇ ಹುಟ್ಟು ಹಬ್ಬದ ಸಂಭ್ರಮವನ್ನು ಇಮ್ಮಡಿಗೊಳಿಸಿದರು.
ತಂದೆಯಿಂದ ಸಾಕಷ್ಟು ಪ್ರಭಾವಿತರಾಗಿರುವ ಗೀತಾ ತಂದೆಗೆ ಶುಭ ಹಾರೈಸುವುದಕ್ಕಾಗಿ ತಮ್ಮ ಬಿಡುವಿಲ್ಲದ ಕೆಲಸದ ನಡುವೆಯೂ ದೂರದಿಂದ ಆಗಮಿಸಿರುವುದು ಗೀತಾ ಅವರ ಕುಟುಂಬದಲ್ಲಿ ಸಂತಸದ ಮೂಡಿಸಿದೆ.
ಸಾಂಪ್ರದಾಯಿಕ ಉಡುಪು
ಐಎಂಎಫ್‌ನ ಪ್ರಥಮ ಉಪ ಮುಖ್ಯಸ್ಥೆಯಾಗಿದ್ದರೂ ಕೂಡ ಅವರು ಭಾರತೀಯ ಸಂಸ್ಕೃತಿಯನ್ನು ಹೆಚ್ಚು ಇಷ್ಟಪಡುತ್ತಾರೆ. ತಂದೆಯ ಜನ್ಮ ದಿನದ ಸಂದರ್ಭ ಸೀರೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ತಂದೆ ಹಾಗೂ ತಾಯಿಯೊಂದಿಗೆ ಸಾಂಪ್ರದಾಯಿಕ ಉಡುಪಿನಲ್ಲಿ ಫೋಟೋ ತೆಗೆಯಿಸಿಕೊಂಡು ಅದನ್ನು ಅವರು ಟ್ವೀಟ್‌ ಮಾಡಿದ್ದು, ವೈರಲ್‌ ಆಗಿದೆ. ಟ್ವೀಟ್‌ ಮಾಡಿದ ಒಂದೇ ದಿನದಲ್ಲಿ ಗಂಟೆಯಲ್ಲಿಯೇ 1300ಕ್ಕೂ ಹೆಚ್ಚು ರೀ ಟ್ವೀಟ್‌ ಆಗಿದ್ದು, 37 ಸಾವಿರ ಮಂದಿ ಲೈಕ್‌ ಮಾಡಿದ್ದಾರೆ. ವಿಶ್ವದೆಲ್ಲೆಡೆಯಿಂದ ಅಭಿನಂದನೆ ಹಾಗೂ ಶುಭಾಶಯಗಳ ಮಹಾಪೂರವೇ ಹರಿದು ಬಂದಿದೆ. ನಿಮ್ಮನ್ನು ಈ ರೀತಿ ಸಾಂಪ್ರದಾಯಿಕ ಉಡುಪಿನಲ್ಲಿ ನೋಡುತ್ತಿರುವುದೇ ವಿಶೇಷ. 'ನೀವು ಅಪ್ಪಟ್ಟ ಭಾರತೀಯಳಾಗಿ ಕಾಣುತ್ತಿದ್ದೀರಿ' ಎಂದು ಸಂದೇಶ ಹಾಕಿದ್ದಾರೆ. 'ತಂದೆಯ ಜನ್ಮ ದಿನಕ್ಕಾಗಿ ಆಗಮಿಸಿರುವ ನಿಮ್ಮ ಪ್ರೀತಿ ಅದ್ಭುತ' ಎಂದು ಇನ್ನು ಕೆಲವರು ಪ್ರತಿಕ್ರಿಯಿಸಿದ್ದಾರೆ.
ವರುಣ್‌ ಗಾಗ್‌ ಎನ್ನುವವರು ಟ್ವೀಟ್‌ ಮಾಡಿ, ‘‘ಐಎಂಎಫ್‌ನ ಬಹುದೊಡ್ಡ ಹುದ್ದೆಯಲ್ಲಿದ್ದರೂ, ಸರಳವಾಗಿ ಕಾಣಿಸುತ್ತಿದ್ದೀರಿ. ಇದನ್ನೇ ನಮ್ಮ ಭಾರತೀಯ ಸಂಪ್ರದಾಯ ಬೋಧಿಸುತ್ತದೆ. ನೀವು ಅದೆಷ್ಟೋ ಭಾರತೀಯರಿಗೆ ಮಾದರಿಯಾಗಿದ್ದೀರಿ,’’ ಎಂದು ಹೇಳಿದ್ದಾರೆ.
ಮೈಸೂರಿನಲ್ಲಿ ಶಿಕ್ಷಣ
ಗೀತಾ ಮೈಸೂರಿನ ನಿರ್ಮಲಾ ಕಾನ್ವೆಂಟ್‌ನಲ್ಲಿ ಪ್ರಾಥಮಿಕ ಶಿಕ್ಷಣ ಪೂರೈಸಿದರು. ನಂತರ ಉನ್ನತ ಶಿಕ್ಷಣವನ್ನು ದೆಹಲಿ ಹಾಗೂ ಹಾರ್ವರ್ಡ್‌ ವಿಶ್ವವಿದ್ಯಾಲಯದಲ್ಲಿ ಪೂರೈಸಿದ್ದರು.
ಮಗಳು ನನ್ನ ಹುಟ್ಟುಹಬ್ಬದಲ್ಲಿ ಪಾಲ್ಗೊಂಡಿರುವುದು ಸಂತಸ ತಂದಿದೆ. ಸಾಕಷ್ಟು ಮಂದಿ ನನ್ನ 85ನೇ ಜನ್ಮದಿನಕ್ಕೆ ಶುಭಾಶಯ ಕೋರಿದ್ದಾರೆ. ವಂದನೆಗಳು.