ಎಚ್‌ಡಿಎಫ್‌ಸಿ ಬ್ಯಾಂಕ್‌ಗೆ ಆರ್‌ಬಿಐ ಮೂಗುದಾರ; ಹೊಸ ಕ್ರೆಡಿಟ್‌ ಕಾರ್ಡ್, ಡಿಜಿಟಲ್‌ ಬಿಸಿನೆಸ್‌ಗೆ ನಿರ್ಬಂಧ

ಮುಂಬಯಿ: ಖಾಸಗಿ ರಂಗದ ಅತೀ ದೊಡ್ಡ ಬ್ಯಾಂಕ್‌ ಎಚ್‌ಡಿಎಫ್‌ಸಿ ಬ್ಯಾಂಕ್‌ಗೆ ಹೊಸ ಕ್ರೆಡಿಟ್‌ ಕಾರ್ಡ್‌ಗಳನ್ನು ವಿತರಿಸದಂತೆ ಹಾಗೂ ಹೊಸ ಡಿಜಿಟಲ್‌ ಬಿಸಿನೆಸ್‌ಗಳನ್ನು ಆರಂಭಿಸದಂತೆ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಸೂಚನೆ ನೀಡಿದೆ.

ಕಳೆದ ತಿಂಗಳು ಎಚ್‌ಡಿಎಫ್‌ಸಿ ಬ್ಯಾಂಕ್‌ನ ಡಿಜಿಟಲ್‌ ಪೇಮೆಂಟ್‌ ಸೇವೆಗಳಲ್ಲಿ ತಾಂತ್ರಿಕ ದೋಷ ಕಂಡು ಬಂದಿತ್ತು. ನವೆಂಬರ್‌ 21 ರಂದೂ ಡಿಜಿಟಲ್‌ ಸೇವೆಗಳಲ್ಲಿ ವ್ಯತ್ಯಯ ಕಂಡು ಬಂದಿತ್ತು. ಈ ಹಿನ್ನೆಲೆಯಲ್ಲಿ ಡಿಸೆಂಬರ್‌ 2 ರಂದು ಆರ್‌ಬಿಐ ಈ ಆದೇಶ ಹೊರಡಿಸಿದೆ.

ನವೆಂಬರ್‌ 21 ರಂದು ಪ್ರಮುಖ ಡಾಟಾ ಕೇಂದ್ರದಲ್ಲಿ ವಿದ್ಯುತ್‌ ವ್ಯತ್ಯಯವಾಗಿತ್ತು. ಪರಿಣಾಮ ಡಿಜಿಟಲ್‌ ಸೇವೆಗಳಲ್ಲಿ ಏರುಪೇರಾಗಿತ್ತು. ಈ ಹಿನ್ನೆಲೆಯಲ್ಲಿ ಬ್ಯಾಂಕ್‌ನ ಆಡಳಿತ ಮಂಡಳಿಗೆ ಸಮಸ್ಯೆಯನ್ನು ಪತ್ತೆ ಹಚ್ಚಿ ಸರಿಪಡಿಸುವಂತೆ ಆರ್‌ಬಿಐ ಸೂಚನೆ ನೀಡಿದೆ.

ವಿದ್ಯುತ್‌ ವ್ಯತ್ಯಯದ ಕಾರಣಕ್ಕೆ ನವೆಂಬರ್‌ 21ರಂದು ಡಿಜಿಟಲ್‌ ಪೇಮೆಂಟ್‌ ಸೇವೆಗಳು 12 ಗಂಟೆಗಳ ಕಾಲ ಸ್ಥಗಿತವಾಗಿದ್ದವು. ಈ ಹಿನ್ನೆಲಯೆಲ್ಲಿ ಹೊಸ ಡಿಜಿಟಲ್‌ ಉದ್ಯಮಗಳಿಗೆ ಚಾಲನೆ ನೀಡದಂತೆ ಆರ್‌ಬಿಐ ಸೂಚನೆ ನೀಡಿದೆ. ಜೊತೆಗೆ ಹೊಸ ಕ್ರೆಡಿಟ್‌ ಕಾರ್ಡ್‌ ಬಳಕೆದಾರರನ್ನೂ ಸ್ವೀಕರಿಸದಂತೆ ಸೂಚಿಸಿದೆ.

ತನ್ನ ಐಟಿ ವ್ಯವಸ್ಥೆಯನ್ನು ಬಲಪಡಿಸಲು ಕಳೆದೆರಡು ವರ್ಷಗಳಲ್ಲಿ ಹಲವಾರು ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಹೇಳಿರುವ ಎಚ್‌ಡಿಎಫ್‌ಸಿ ಬ್ಯಾಂಕ್‌, ಹೊಸ ಆದೇಶ ಸಂಬಂಧ ಆರ್‌ಬಿಐ ಜೊತೆ ಸಂಪರ್ಕದಲ್ಲಿ ಇರಲಿದ್ದೇವೆ ಎಂದು ಹೇಳಿದೆ.

ಆರ್‌ಬಿಐನ ಆದೇಶ ಚಾಲ್ತಿಯಲ್ಲಿರುವ ಕ್ರೆಡಿಟ್‌ ಕಾರ್ಡ್‌ ಉದ್ಯಮದ ಮೇಲೆ ಹಾಗೂ ಡಿಜಿಟಲ್‌ ಬ್ಯಾಂಕಿಂಗ್‌ ಸೇವೆಗಳ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಬ್ಯಾಂಕ್‌ ಸ್ಪಷ್ಟಪಡಿಸಿದೆ. ಜೊತೆಗೆ ಒಟ್ಟಾರೆ ವಹಿವಾಟಿನ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಅಂದುಕೊಂಡಿರುವುದಾಗಿ ಖಾಸಗಿ ರಂಗದ ದೈತ್ಯ ಬ್ಯಾಂಕ್‌ ಹೇಳಿದೆ.

ಆರ್‌ಬಿಐ ನಿರ್ಬಂಧದ ಸುದ್ದಿ ಹೊರಬೀಳುತ್ತಿದ್ದಂತೆ ಎಚ್‌ಡಿಎಫ್‌ಸಿ ಬ್ಯಾಂಕ್‌ ಷೇರುಗಳು ಶೇ. 1.84ರಷ್ಟು ಕುಸಿತ ಕಂಡಿದ್ದು, ಷೇರುಗಳ ಮೌಲ್ಯ 1,381 ರೂಪಾಯಿಗೆ ಕುಸಿತವಾಗಿದೆ.